Wase e 83

Veivakani e Dua na Farisi

E SA tiko voli ga ko Jisu ena nona vale na Farisi kilai ka se qai vakabulai koya oti ga na tagane buketevatu. Ni sa vakaraici ira na vulagi ena nodra digitaka na veitikina dokai ena gauna ni kana, sa qai vakatavuvulitaka na ka ni vuli ni yalomalumalumu.

Sa qai vakamacalataka ko Jisu, “Ni sa sureti iko e dua ki na dua na kana ni vakamau, kakua ni laki dabe e na dua na tikina dokai, de sa sureti tale ga e dua e cecere cake mai vei iko, ka na qai lako yani ko koya e a sureti kemudrau ka kaya vei iko, Vagalala mada me dabe e keri ko koya oqo, ko na qai madua ni ko sa na la’ki tiko e na tikina e ra sara.”

Sa qai vakasalataka ko Jisu: “Ia ni ko sa sureti, la’ki tiko e na tikina e ra sara, me na qai lako mai ko koya ka sureti iko, ka na qai kaya vei iko, Noqu i tokani, lako yani ki cake, ko na qai dokai e matadra kece ko ni tiko vata e na kana.” Sa qai tinia ena nona kaya ko Jisu: “O koya yadua e dau vakalevulevui koya e na vakalolovirataki, ia ko koya yadua e dau vakalolovirataki koya, e na vakalevulevui.”

E tarava na nona vosa ko Jisu vua na Farisi a sureti koya ki na kana ka qai vakamacalataka na i valavala ni caka magiti ka vakadonuya na Kalou. “Ni ko sa cakava e dua na magiti me i vakasigalevu se i vakayakavi, kakua ni sureti ira na nomu i tokani, se tuakamu, se na tacimu, se ko ira na kai nomu vutuniyau, de ra na sureti iko tale e muri me kena i dole, ka sa na saumi lesu kina vei iko. Ia ni ko sa caka magiti, sureti ira na dravudravua, na lokiloki, na gera, na mataboko; ko na qai kalougata kina, ka ni ra na sega ni dolea rawa vei iko.”

Na vakarautaki ni kakana me baleti ira era dravudravua ena vakamarautaki koya e vakarautaka, na vuna sa qai vakamacalataka ko Jisu vua na i taukei ni soqo, “Ena qai dolei vei iko ni ra sa tucake tale mai na mate na yalododonu.” Nona vakamacalataka ko Jisu na kanavata vakadonui oqo e vakavotuya mai ena nona vakasama e dua tale na sureti e dua tale na mataqali kanavata. E kaya o koya e sureti oqo, “Sa kalougata ko koya e na kana e na kanavata ka na caka e na matanitu ni Kalou.” Ia e sega ni tamata kece era taura vakabibi na veika namaki oqo me vaka e qai vakaraitaka ko Jisu ena dua na vosa vakatautauvata.

“E a cakava e dua na magiti levu ni kanavata e dua na tamata, ka sureti ira kina e lewe vuqa. . . . Sa qai talai ira na nona tamata me ra tukuna vei ira ka sureti tu, Mo ni lako mai, ni sa vakarau oti tu na veika kece! Ia era sa qai vakaiulubale kece. E a kaya na i matai ni tamata ki vua, Au sa volia e dua na tiki ni vanua, ka sa dodonu me’u la’ki raica mada; au sa kerea mo vosota ni’u na sega ni lako yani! E dua tale e kaya, Au sa volia e tini na bulumakau, ka’u sa lako tiko me’u la’ki vakatovolei ira. Au kerea me’u vosoti kina. E dua tale e kaya, Au sa qai vakamau wale ga oqo, sa i koya sa na sega kina ni rawa ni’u lako yani.”

Sa ra ulubale lokiloki dina! E dauivalavala matau me dikevi vakailiu e dua na tiki ni vanua se bulumakau ni bera ni voli, ena sega ni tiko dina kina na vuna me ra via laki raici tale vakusakusa mai muri. Sa vakatalega kina na nona vakamau e dua ena sega ni dodonu me tarovi koya mai na nona ciqoma na veisureti bibi vaka o ya. O koya oqo ni sa rogoci ira na ulubale oqo na turaga, sa cudru vakalevu sara ka vakaroti koya na nona bobula:

“Lako vakatotolo ki na veigaunisala kei na veisaqata ni koro ka kauti ira mai na dravudravua, kei na gera, kei ira na mataboko, kei ira na lokiloki. Oti koya sa qai mai kaya tale na tamata koya, Sa vakayacori oti saka na nomuni lewa, ka sa vo ga na vale. Sa qai kaya vua na tamata koya na nona turaga, Lako ki na veigaunisala lelevu kei na veisala lalai, ka cikevi ira na tamata me ra lako mai, me sinai sara na noqu vale. . . . Ena sega sara ni dua vei ira na sureti me na kania e dua na ka e na noqu i vakayakavi oqo!”

Na i tuvaki vakacava e vakamacalataki ena vosa vakatautauvata? Io, “na turaga” ka vakarautaka na magiti e vakatayaloyalotaka na Kalou ko Jiova; “na tamata” ka veisureti, ko Jisu Karisito; ia na “magiti levu ni kanavata,” na kena dolavi tu na sala me na rawa ni sauvi kina na Matanitu vakalomalagi.

Me o cei tale, ni ra a sureti duadua e liu o ira na i liuliu ni lotu vaka-Jiu ena gauna i Jisu me ra na laki taukena na Matanitu. Ia, era a cata na veisureti o ya. O koya gona, me tekivu sara mai na Penitiko ni 33 S.K., e baci dulaki yani na i karua ni veisureti vei ira era tamata beci ka lolovira mai na nodra matanitu na Jiu. Ia a sega ni rauta na kedra i wiliwili o ira era a ciqoma me ra na laki tawana na 144,000 na i tikotiko ena Matanitu vakalomalagi ni Kalou. O koya oqo ena 36 S.K., ni tolu veimama tale na yabaki ni oti o ya, na i katolu kei na i otioti ni veisureti e dulaki yani vei ira na tawacilivi era sega ni Jiu, ia na nodra vakasoqonivatataki mai o ira oqori se tomani tikoga me yacova mai na noda gauna. Luke 14:1-24.

▪ Na ka ni vuli cava e vakatavulica ko Jisu me baleta na yalomalumalumu?

▪ Ena rawa vakacava vua e dua na i taukei ni soqo me vakarautaka na magiti e vakadonuya na Kalou, ia a cava ena solia kina vua na mamarau?

▪ Ena vuku ni cava era vakaulubale lokiloki kina ko ira era a sureti?

▪ Na cava e vakatayaloyalotaka na i vakatautauvata i Jisu me baleta na “magiti levu ni kanavata”?