Wase e 90

Na iNuinui ni Veivakaturi

SA YACOVA yani ko Jisu na i bili kei Pecani, na koro ka rauta ni tolu na kilomita na kena yawa mai Jerusalemi. A se qai bogi vica ga na mate i Lasarusa kei na nona bulu. E rau yasovaki koya voli ga na ganena ko Meri kei Marica, ka ra lewe vuqa sara era lako yani me ra vakacegui rau ena nodrau vale.

Ena nodra tagi yaso tiko, a mai tukuna sara vei Marica e dua ni sa lako mai ko Jisu. A biuti ira tu yani ka mai tavaki koya, e rairai sega ni tukuna vei tacina. Ni yaco yani vei Jisu, e tukuna tale vua ko Marica na veika e rau dautukuna beka vakavuqa kei Meri ena va na siga sa oti: “Kevaka ko ni a tiko e ke, ke a sega ni mate na ganequ.”

Ia e vakaraitaka ko Marica na nona vakanuinui, ka vaka me vakaliuliutaka tiko ni na vakayacora e dua na ka vei ganena ko Jisu. “Ia ka’u sa kila ena solia vei kemuni edaidai na Kalou na ka kecega ko ni sa kerea vua na Kalou,” e kaya o koya.

“Ena tu cake tale na ganemu,” na vosa ni yalayala i Jisu.

E kila ko Marica ni vosataka tiko ko Jisu na veivakaturi ena vakayacori mai muri e vuravura, a vakanuinui tale tu ga kina ko Eparaama kei ira na dauveiqaravi ni Kalou ena gauna e liu. A mani sauma ko Marica: “Au sa kila ena tu cake tale o koya e na siga maimuri era na tu cake tale kina na mate.”

Ia, e solia na vakanuinui ko Jisu me rawati na vakacegu ena gauna vata ga o ya ena nona sauma lesu: “Oi au na vu ni tu-cake-tale, kei na vu-ni-bula.” E vakadeitaka vei Marica ni sa solia tu vua na Kalou na kaukauwa me lewa na mate, ni a kaya: “Ko koya sa vakabauti au, kevaka sa mate, ena bula ga: ia ko koya yadua sa bula ka vakabauti au, ena sega sara ni mate.”

A sega ni vakaibalebaletaka tiko ko Jisu vei Marica ni ra na sega ni mate o ira era yalodina voli ena gauna oqori. Sega, ia na tikina e kauta cake mai ni o ira era cakacakataka na nodra vakabauti koya era na rawata na bula tawamudu. Na bula oqori era na marautaka e lewe vuqa na tamata e na nodra vakaturi mai na mate ena siga maimuri. Ia o ira na so tale era yalodina voli ga era na bulata yani na i cavacava ni i vakarau ni veika oqo e vuravura, ena vakayacori dina kina vei ira oqo na vosa i Jisu. Era na sega sara ni mate! Ni sa oti na vosa veivakurabuitaki oqo, a mani tarogi Marica ko Jisu, “Ko sa vakabauta na ka oqo?”

“Io, Turaga,” a sauma o koya. “Au sa vakabauta ni sa i kemuni na Karisito, na Luve ni Kalou, o koya ka a namaki tiko me na lako mai ki vuravura.”

A lesu totolo tale yani ko Marica me laki kacivi tacina mai, ka kaya lo vua: “Sa lako mai nai Vakavuvuli, a sa tarogi iko.” E sega ni bera sa biuta mai na vale ko Meri. Ni ra sa raica o ira tale na so na nona biuta mai na vale, era muri koya yani, na nodra nanuma ni sa lako ki na i bulubulu.

Ni yaco yani vei Jisu, sa qai cuva sobu e matana ko Meri ena nona tagi. “Turaga, kevaka ko ni a tiko e ke, ke a sega ni mate na ganequ,” a kaya o koyaSa vutugu dina na loma i Jisu ena nona raici Meri kei ira na wekadrau ni ra tagi kece. “Evei na vanua dou a buluti koya kina?” e taroga ko Jisu.

Era sauma yani, “Turaga, ni mai raica.”

E tagi talega ko Jisu, ka vakavuna me ra kaya kina na Jiu: “Raica na kena levu ni nona loloma vei koya!”

Era nanuma lesu e so me baleti Jisu, ena Solevu ni Vale Vakacevaceva ena vica na vula yani ki muri, a vakabula o koya e dua na gone tagane sucu mataboko, era mani taroga: “Sa sega beka ni rawata ko koya oqo, ko koya sa basuka na mata ni mataboko, me lewa talega me kakua ni mate na tamata oqo?” Joni 5:21; 6:40; 9:1-7; 11:17-37.

▪ Ena gauna cava sa qai yaco yani kina ko Jisu ki na i bili kei Pecani, ia na cava e yaco tiko mai kea?

▪ Na yavu cava e vakabauta kina ko Marica na veivakaturi mai na mate?

▪ Na cava e tuburi Jisu ena mate i Lasarusa?