Wase e 95

Na Veika ni Vuli ena Veisere kei na Nodra Lomani na Gone

SA LAKO yani oqo ko Jisu kei ira na nona tisaipeli ki Jerusalemi me ra tikova na Lakosivia ena 33 S.K. Era takosova yani na Uciwai na Joritani ka muria yani na yasayasa vaka-Peria. A tiko voli ko Jisu e Peria ena vica na macawa yani ki liu, ia a kacivi lesu ki Jutia ni tauvimate na wekana ko Lasarusa. Ena nona tiko voli mai Peria, a vosa vei ira na Farisi ko Jisu me baleta na veisere, ia era baci kauta cake tale mai oqo.

Sa tu vei ira na Farisi na duidui vakasama me baleta na veisere. A kaya ko Mosese ni rawa ni sereki e dua na yalewa ke sa kunei “vua e dua na ka sa sega ni savasava kina.” Era vakabauta e so ni vakaibalebaletaki ga oqo ena nona i tovo dukadukali. Ia era vakasamataka tale na so ni “ka sa sega ni savasava” era okati kina na veicala lalai sara. O koya oqo era sa qai vakatovolei Jisu kina na Farisi, ena nodra taroga: “Sa tara vua na tagane me biuta na watina e na vuku ni ka kecega, se segai?” Era nuidei tu ni veitalia ga se cava e tukuna ko Jisu ena vakavuna na nona coko ena dua na veidre kei ira na Farisi, e duidui sara na nodra rai.

E maqosataka sara nona sauma na taro ko Jisu, e sega ni goleva e dua na vakasama vakatamata, ia e vosa lesu ga ki na i naki taumada ni vakamau. E taroga o koya, “Dou sa sega beka ni wilika ni sa buli rau ga me dua e tagane ka dua e yalewa ko koya na Dauveibuli mai na i vakatekivu, ka kaya, E na vuku ni ka oqo sa na biuti tamana kei tinana kina na tagane ka kabita na watina, ka rau sa yaco me duabau ga na lewe rua? E rau sa qai sega ni lewe rua tiko ga, e rau sa duabau ga. Na ka sa vauca vata na Kalou me kakua ni tawasea na tamata.”

Na i naki taumada ni Kalou, e vakaraitaka ko Jisu, me rau veikabiti tikoga na veiwatini, me rau kakua ni veisere. Kevaka e vakaoqori, era sauma yani na Farisi, “Na cava ga e a qai vakarota kina ko Mosese me solia ga vua na i vola vakadinadina ni veisere, ka qai sereki koya?”

“E na vuku ga ni nomudou yalo kaukauwa, e a vakatarai kemudou kina ko Mosese mo dou veisere kei na watimudou,” e sauma yani ko Jisu, “ia e a sega tu ni vaka kina mai na i vakatekivu.” Io, ena gauna a tauyavutaka kina na Kalou na i vakatagedegede dina ni vakamau mai na were ko Iteni, a sega ni vakatara me caka na veisere.

E tomana ko Jisu ka kaya vei ira na Farisi: “Ia, au sa kaya vei kemudou, o koya sa veisere kei na watina, kevaka e sega ni vuna na dautagane [mai na vosa va-Kirisi, por·neiʹa], ka la’ki veiwatini kei na dua tale, sa dauyalewa.” E vakaraitaka kina o koya ni por·neiʹa, o ya na veiyacovi dukadukali ca sara, na yavu duadua ga e vakadonuya na Kalou me ia kina na veisere.

Ni sa tiko na yavu duadua ga oqo ni veisere, era kila kina na tisaipeli ni vakamau e ka tudei ka ra mani kaya: “Kevaka sa vaka oqo na ka e yaco vua na tagane kei na watina, e vinaka cake me sa kakua ga na vakawati.” E sega ni vakabekataki ni o koya e nakita me vakawati e dodonu me vakasamataka vakabibi na kena tudei na i vau ni vakawati!

Sa qai vosa ko Jisu ena i tutu ni bula vakadawai. E vakamacalataka o koya ni so na cauravou era na sega ni vakawati ni ra a sucu ga mai vakakina, ena kena sega ni tubu na nodra i yaya ni veiyacovi. E so tale era sega ni vakawati ni ra sa selevi ira ka vakacacana na nodra gacagaca na tamata. Na kena i tinitini, ni so era tarova nodra gagadre ni vakawati kei na rekitaki ni veiyacovi me rawa ni ra soli ira taucoko ena veika e vauca na Matanitu vakalomalagi. E tinia nona vosa ko Jisu: “O koya sa rawata me muria oqori [na i tutu vakadawai], me muria ga.”

Era sa qai tekivu kauti ira na luvedra lalai vei Jisu na tamata. Sa ra karaci ira na gone na tisaipeli, ka saga me ra vakatalai ira tani, ena nodra via taqomaki Jisu beka me kakua ni vakaocai. Ia sa qai kaya ko Jisu: “Laivi ira na gone lalai me ra lako mai vei au, ka kakua ni tarovi ira, ni sa nodra na gone vaka oqo na matanitu ni Kalou. Au sa kaya vakaidina vei kemudou, ko koya e na sega ni ciqoma na matanitu ni Kalou me vaka na gone lailai e na sega ni curu kina.”

E dua dina na ka ni vuli vinaka e vakarautaka e ke ko Jisu! Me da rawata na Matanitu ni Kalou, sa dodonu me da vakadamurimuria nodra yalomalumalumu kei na nodra tuberi rawarawa na gone lalai. E vakaraitaka talega na i vakaraitaki i Jisu na kena bibi, vakauasivi vei ira na i tubutubu, me dautiko na gauna me ra vakayagataka vata kei ira na luvedra. E vakaraitaka oqo ko Jisu na nona loloma vei ira na gone lalai ena nona keveti ira ka vosa vakalougatataki ira. Maciu 19:1-15; Vakarua 24:1; Luke 16:18; Marika 10:1-16; Luke 18:15-17.

▪ Na duidui i tovo ni rai cava e tu vei ira na Farisi me baleta na veisere, ia era vakatovolei Jisu vakacava?

▪ Na cava e vakayacora ko Jisu ena nodra saga na Farisi me ra vakatovolei koya, ia na cava e solia me yavu duadua ga ni veisere?

▪ Ena vuku ni cava era kaya kina na tisaipeli ni sega ni vukutaki na vakawati, ia na cava e qai vakatura ko Jisu?

▪ Na cava e vakatavulica vei keda ko Jisu ena nona veitaratara kei ira na gone?