Wase e 100

Vosa Vakatautauvata me Baleta na Paudi

RAIRAI a se tiko voli ga ko Jisu ena vale i Sakiusa, na vanua a mai cegu kina ena nona i lakolako ki Jerusalemi. Era nanuma na nona tisaipeli ena gauna me yaco yani ki Jerusalemi, ena laki kacivaka o koya ni Mesaia ka tauyavutaka na nona Matanitu. Me vakadodonutaka na vakasama oqo ka vakaraitaka ni se yawa sara na Matanitu, e qai solia ko Jisu e dua na vosa vakatautauvata.

E tukuna o koya ni “sa dua na turaga, sa lako ki na dua na vanua yawa, me buli me tui, me qai lesu tale mai.” Sa i Jisu na “turaga,” ia ko lomalagi na “vanua yawa.” Ni sa tadu yani ki kea ko Jisu, sa na solia vua o Tamana na nona kaukauwa vakatui.

Ni bera ni lako, sa solia na turaga vei ira yadua na lewe tini na nona bobula e dua na paudi (silver minas), ka kaya: “Dou volivoli tiko, ka yacova na noqu lesu tale mai.” O iratou na le tini na bobula ena i matai ni kena i vakayaco e vakatayaloyalotaki ira na i muri taumada i Jisu. Na kena i vakayaco rabailevu, eratou vakatayaloyalotaki ira kece era na rawa ni veiliutaki kei koya ena Matanitu vakalomalagi.

Na paudi era tiki ni i lavo talei, era vakatautauvatataki yadua ki na i sau ni tamata cakacaka ena loga ni teitei ena loma ni tolu na vula. Ia na cava e vakatayaloyalotaka na paudi? Ia na mataqali bisinisi cava me ra na vakayacora kina na nona bobula?

Na paudi oqori e vakatayaloyalotaka na ka talei e rawa ni ra taurivaka na tisaipeli lumuti ena yalo tabu me ra kauti ira mai kina e so tale me ra mai duavata kei ira ena veiliutaki ena Matanitu vakalomalagi, me yacova na lako mai i Jisu ni sa Tui ena Matanitu yalataki. Ni sa vakaturi oti ka laki rairai vei ira na nona tisaipeli, a solia vei iratou na paudi i vakatakarakara me ratou vakayaco tisaipeli vakalevu me ra vakuria na i lawalawa era na bula ena Matanitu vakalomalagi.

E tomana ko Jisu, “ia, ko ira na nona lewe ni koro era sa cati koya, a ra sa tala na mata me muri koya yani me kaya, Keitou sa sega ni vinakata me lewai keitou ko koya oqo.” O ira na lewe ni koro era Isireli se Jiu, era sega ni wiliki kina na nona tisaipeli. Nona lesu ki lomalagi ko Jisu, ena nodra vakacacani ira na nona tisaipeli o ira na Jiu oqori, era vakaraitaka na nodra cati koya me mai nodra tui. Ena sala oqori era vakataki ira kina na lewe ni koro o ya era tala yani na i lawalawa mata me matataki ira.

Era vakayagataka vakacava na tini na bobula oqori na nodra paudi? Sa qai vakamacalataka ko Jisu: “Ia ni sa lesu tale mai ko koya, ni sa buli me tui, sa kaya me ra kacivi mai vua ko ira na tamata oqori, ko ira ka solia vei ira ko koya nai lavo, me kila se ra yavica tale era sa rawata ni ra sa veivoli. Sa qai lako mai ko koya sa liu, ka kaya, Kemuni na Turaga, sa tini tale na paudi sa rawa ena nomuni paudi e dua. A sa kaya vua ko koya, E vinaka, na tamata vinaka: ia ni ko sa dina e na ka lailai sara, mo lewa na koro e tini. A sa lako mai nai karua, ka kaya, Kemuni na Turaga, sa lima tale na paudi sa rawa e na nomuni paudi e dua. A sa kaya talega vua ko koya, O iko talega mo lewa na koro e lima.”

Na bobula a soli vua e tini na paudi e vakatayaloyalotaki ira e dua na i lawalawa tisaipeli me tekivu sara mai na Siga ni Penitiko 33 S.K. me yacova mai edaidai era okati kina na i apositolo. Na bobula a rawata mai e lima na paudi, e vakatayaloyalotaka talega e dua na i lawalawa ena gauna vata tikoga oqori, na ka era rawata kei na rawaka e tu vei ira, era vakalevutaka kina na i yau nei koya na nodra tui e vuravura. Oi rau na i wasewase ruarua oqori era gumatua ni vunautaka voli na i tukutuku vinaka, sa qai yaco kina me ra mai lotu va-Karisito e lewe vuqa ka vinaka tu na i vakarau ni lomadra. E lewe ciwa vei ira na bobula oqori era vakayacora vinaka sara na nodra caka bisinisi, ka vakalevutaka na nodra i yau.

Ia, e tomana ko Jisu, “sa lako mai e dua tale, ka kaya, Kemuni na Turaga, raica na nomuni paudi, ka’u sa maroroya e na dua nai tavoi: ni’u a rerevaki kemuni, ni kemuni sa tamata dredre: ko ni sa taura cake na ka ko ni sa sega ni biuta sobu, ka tamusuka na ka ko ni sa sega ni kaburaka. A sa kaya vua ko koya, Au na lewai iko e na nomu vosa, na tamata ca! ko sa kila ni’u sa tamata dredre, sa taura cake na ka ka’u sa sega ni biuta sobu, ka tamusuka na ka ka’u sa sega ni kaburaka: ia ka vakaevei ni ko sa sega ni solia kina na noqui lavo ki na baqe, me’u taroga tale kei na kenai kere niu sa lako tale mai? A sa kaya ko koya vei ira era sa tu voleka, Kauta tani vua na paudi, ka solia vua sa tini na nona paudi.”

Ena vukuna na bobula ca, na kena yali na i lavo i vakatakarakara sa kena i balebale ni kau tani mai vua na nona tikina ena Matanitu vakalomalagi. Io, e vaka ga sa calata na i solisoli dokai ni veiliutaki ena loma ni tini na koro kei na lima na koro. Mo kila talega ni a sega ga ni kainaki vua na bobula oqori me tamata ca ena vuku ni ka ca e vakayacora, ia, ena nona sega ni cakacakataka me vakatuburi na i yau ni matanitu ni nona turaga.

Ni sa mai soli na nona paudi na bobula ca vua na i matai ni bobula, e qai kudruvaki: “Na Turaga, sa tu vua e tini na paudi.” Ia, e sauma ko Jisu: “O koya yadua sa tu vua na ka, ena soli vua; ia ko koya sa sega ni tu vua na ka, ena kau tani mai vua na ka sa tu vua. Ia ko ira na noqu meca oqo era sa sega ni vinakata me’u lewai ira, kauti ira mai ki ke, ka vakamatea e mataqu.” Luke 19:11-27; Maciu 28:19, 20.

▪ Na cava a uqeti Jisu me tukuna kina na vosa vakatautauvata ni paudi?

▪ O cei na turaga, ia na vanua yawa cava e lakova?

▪ O cei o ira na bobula, ka cava e vakatayaloyalotaka na paudi?

▪ O cei li o ira na lewe ni koro, ia era vakaraitaka vakacava na nodra cata?

▪ Na cava na vuna e vakatokai kina e dua na bobula me tamata ca, ka cava na kena i balebale na nona vakayalia na nona paudi?