Wase e 101

Mai Pecani, ena Vale i Saimoni

NI SA biuti Jeriko ko Jisu, e lako sara yani ki Pecani. E taura ga e dua na siga taucoko ni lakovi ni cabeti kina e rauta ni 19 na kilomita ena vanua dredre. Ko Jeriko e rauta ni 250 na mita ena i vakatautauvata e ra ni wasawasa, ia ko Pecani e rauta ni 760 na mita ena i vakatautauvata mai na dela ni wasawasa. O rawa ni nanuma lesu ni ko Pecani, e i tikotiko i Lasarusa kei rau na ganena. E rauta ni tolu na kilomita na veiyawaki ni koro lailai oqo mai Jerusalemi, e toka ena baba tokalau ena Ulunivanua ni Veiolive.

Sa ra tekivu yacoyaco tiko yani na lewe vuqa ki Jerusalemi me baleta na Lakosivia. Era yaco totolo yani me ra laki vakasavasavataki ira ena kena i valavala. Rairai era a tara beka e dua na yago mate se dua tani tale na ka era a vakayacora ka vakadukadukalitaki ira kina. Era sa qai muria na kena i vakarau me ra vakasavasavataki ira me rawa ni ra vakadonui ena gauna sa solevutaki kina na Lakosivia. Ni ra soqovata yani na yaco totolo mai oqo ki na valenisoro, era vakananuma e lomadra na lewe vuqa se na lako beka yani ki na Lakosivia ko Jisu.

Era veitarogi vakataki ira mai Jerusalemi me baleti Jisu. Sa kilai raraba ni ra vakasaqara na i liuliu ni lotu me ra vesuka ka vakamatea. Na kena dina ni ra vakarota kevaka e kila e dua na vanua sa tiko kina, me ra tukuna yani vei ira. A yaco vakatolu ena vica na vula se qai oti ga​—ena Solevu ni Vale Vakacevaceva, ena Solevu ni Vakatabui, kei na gauna a vakaturi Lasarusa oti kina​—era a saga na i liuliu oqo me ra vakamatei koya. Sa ra vakananuma gona na tamata, ena rairai beka ena matana levu ko Jisu ena dua tale na gauna? “A cava dou vakananuma?” era veitarogi vakataki ira.

Sa tadu yani ki Pecani ena gauna oqo ko Jisu ni vo e ono na siga me qai caka na Lakosivia, ni na caka ena 14 Naisani ena nodra i vola ni vula na Jiu. Ena yakavibogi ni Siga Vakaraubuka e tadu yani ki Pecani ko Jisu, na i tekivu ni 8 Naisani. Ena sega ni rawa me lako yani ki Pecani ena Siga Vakarauwai na vuna ni veilakoyaki ena Siga ni Vakacecegu​—mai na dromunisiga ena Siga Vakaraubuka ki na dromunisiga ena Siga Vakarauwai​—e vakatabui ena nodra lawa na Jiu. Rairai lako beka yani ko Jisu ki na vale i Lasarusa, me vaka na nona a lako mada kina ena dua na gauna e liu, ka tiko e kea ena bogi ni Siga Vakaraubuka.

Ia, e dua tale ka vakaitikotiko mai Pecani e sureti Jisu kei ira na nona i lawalawa me ra laki kana kina ena kena yakavibogi ni Siga Vakarauwai. Oqori ko Saimoni, a vukavuka tu e liu, e rairai a vakabulai mai vei Jisu. Me vaka na nona i vakarau ni daucakacaka ko Marica, sa qaravi ira voli na vulagi. Me vaka ga na nona i vakarau, e vakarorogo voli vei Jisu ko Meri, ia ena gauna oqo ena sala e tubu kina na veileti.

Sa qai dolava na kato ni waiwai alapasita ko Meri, se tavaya raraba na botona, ka rauta ni veimama na lita na waiwai boi vinaka, “a narita dina.” Oqo na waiwai talei sara. Io, ni vakatauvatani na kena talei e rauta ni i sau ni tamata cakacaka ena dua na yabaki! Ni sa livia yani na waiwai ko Meri ena ulu i Jisu kei na yavana ka qai qusia na yavana ena drauniuluna, sa curuoso na vale ena i boisareguregu ni waiwai.

Era cudru kina na tisaipeli ka taroga: “Sa biu walega na waiwai oqo ena vuku ni cava?” Sa qai kaya cake mai ko Jutasa Isikarioti: “E na cava sa sega ni volitaki na waiwai oqo e na pene e tolu na drau, ka soli vei ira na dravudravua?” Ia e sega ni nanumi ira dina na dravudravua ko Jutasa, ni daubutako mai na kato i lavo eratou daumaroroya voli na tisaipeli.

Sa qai totaki Meri ko Jisu: “Laivi koya ga,” e vakarota yani. “Dou sa saga ena vuku ni cava? Sa cakava vei au e dua na cakacaka vinaka: Sa tiko vakadua kei kemudou ko ira na dravudravua; ia dou sa via cakava na ka sa yaga vei ira, sa rawarawa ga: ia koi au, au sa sega ni tiko vakadua kei kemudou. Sa kitaka ko koya na ka sa rawata: Sa lako mai eliu ko koya me lumuta na yagoqu me bulu. Au sa kaya vakaidina vei kemudou, E na veiyasana kecega e vuravura taucoko ena vunautaki kina na i tukutuku vinaka oqo, ena bau tukuni talega kina na ka sa kitaka na yalewa oqo, me kena i divi.”

Sa rauta ni sivia oqo e 24 na aua nona tiko voli mai Pecani ko Jisu, sa qai rogovaki yani na i tukutuku ni nona sa tiko. Sa ra qai lako yani e lewe vuqa ki na vale i Saimoni me ra raici Jisu, ia era lako talega mai me ra bau mai raici Lasarusa, ni tiko talega e kea. Sa ra qai bosea vata na bete i liuliu e sega ni ra vakamatei Jisu duadua ga ia ko Lasarusa talega. Na vuna ni lewe vuqa era vakabauti Jisu ena vuku ni nodra raica sa bula tale o koya a vakatura mai na mate! E rui toro sobu dina na nodra i vakarau ca na i liuliu vakalotu oqo! Joni 11:55–12:11; Maciu 26:6-13; Marika 14:3-9; Cakacaka 1:12.

▪ Na cava e veivosakitaki voli ena loma ni valenisoro, ia ena vuku ni cava?

▪ Na cava me tadu yani kina ki Pecani ko Jisu ena Siga Vakaraubuka ka sega ni Siga Vakarauwai?

▪ Ni tadu yani ki Pecani ko Jisu, e rairai laki tiko e vei ena Siga ni Vakacecegu?

▪ Na cava e vakayacora ko Meri ka tubu kina na veileti, ia e qai totaki koya vakacava ko Jisu?

▪ Na cava e vakaraitaka na nodra i vakarau ca na bete i liuliu?