Wase e 127

Bulu ena Siga Vakaraubuka​—Lala na iBulubulu ena Siga Tabu

OQO e sa yakavisiga ni Siga Vakaraubuka, ena tekivu na Siga ni Vakacecegu ena 15 Naisani ni dromu na matanisiga. Sa lili tu na yago mate i Jisu ena kau, ia oi rau na daubutako e rau lili tu kei koya e rau se bula. Na yakavisiga ni Siga Vakaraubuka e dauvakatokai me Siga ni Vakavakarau, ni ra dauvakarau kakana kina na tamata ka vakaotia na veicakacaka e dodonu me caka vakaoti me kua ni waraki me oti sara na Siga ni Vakacecegu.

Na Siga ni Vakacecegu sa vakarau tekivu e sega ni o koya walega na dua na siga ni vakacecegu dina ni veimacawa (i kavitu ni siga ni macawa) ia e vakaruataki se Siga ni Vakacecegu “levu.” E vakatokai kina na siga oqo baleta ni rau siga vata ga kei na Siga ni Vakacecegu dina na 15 Naisani, o koya e dau i matai ni siga ena Solevu siga vitu ni Madrai sega ni Vakaleveni (ka dau Siga ni Vakacecegu veitalia ke mani siga cava e lutu kina ena loma ni macawa.)

E kaya na Lawa ni Kalou, me kakua ni daurube tu ena bogi taucoko na yago mate ena kau. Era qai kerei Pailato na Jiu me vakatotolotaki na nodratou mate me musu na yavadratou. Era qai lako na sotia ka musuka na yavadrau na daubutako. Ni raici ni sa vaka me mate tu ko Jisu, a mani sega ni musu na yavana. E vakayacori kina na tiki ni i Vola Tabu: “Sa maroroya kecega na suina; Sa sega e dua sa musulaki.”

Ia, me kua ni vakatitiqataki tale ni sa mate dina ko Jisu, sa qai suaka yani na sarisarina e dua vei ira na sotia. E suaka volekata na utona, ka drodro mai kina na dra kei na wai. E tukuna na i apositolo ko Joni, e bau dua o koya a raica e matana na ka e yaco ka volatukutukutaka ni vakayacori tale kina e dua na tiki ni i Vola Tabu: “Ka ra na vakaraici au era sa coka.”

E tiko talega ena vanua ni veivakamatei ko Josefa mai na koro ko Arimacea, e dua na tamata rokovi ka lewe ni Sanadrini. A cata ni totaka na nodra cakacaka tawadodonu ni vorati Jisu na mataveilewai levu. Ko Josefa oqo e dua na tisaipeli i Jisu, ia e rere ni vakatakilai koya. Ia sa qai vakaraitaka na nona yaloqaqa ena nona lako vei Pailato me laki kerea na yago i Jisu. Sa qai talaki ko Pailato me lako mada mai na turaganivalu liu, ia ni sa vakadinadinataka oti na turaganivalu ni sa mate ko Jisu, sa qai solia na yagona ko Pailato.

Sa kauta na yago i Jisu ko Josefa ka solega vata kei na i sulu lineni matailalai savasava ena nona vakarautaka me bulu. Sa qai vukei koya ko Nikotimo, e dua talega na lewe ni Sanadrini. A guce talega ko Nikotimo me vakatusa nona vakabauti Jisu ni rerevaka de qai kau tani na nona i tutu. Ia oqo, e kauta mai o koya na mura ka veiwaki vata kei na yasiyasi ka rauta ni dua na drau na paodi bibi ni Roma. Sa qai viviraki na yago i Jisu ena i vadreti e tu kina na veika boi vinaka oqo, ena i valavala vaka-Jiu me vakarautaki na yago me bulu.

Sa laki vakotori sara na yago ena dua na i bulubulu qara vatu vou i Josefa e tiko voleka ga e kea. Sa qai vaqiqici yani ena mata ni i bulubulu e dua na vatu levu. Me caka na veibulu ni bera na Siga ni Vakacecegu e vakarautaki vakatotolo na yago. Rau sa qai lesu totolo yani ki na nodrau vale ko Meri na yalewa ni Makitala kei Meri na tina i Jemesa Lailai, ka rau a veivukei beka ena vakavakarau, me rau vakarautaka tale e so na i saluaki kei na waiwai boi vinaka. Na nodrau i naki oya me oti na Siga ni Vakacecegu, me rau qai laki lumuta vakavinaka tale na yago i Jisu me rawa ni maroroi dede kina.

Ena siga ka tarava, na Siga Vakarauwai (na Siga ni Vakacecegu), era qai lako vei Pailato o ira na bete i liuliu kei na Farisi ka kaya: “Turaga, keimami sa nanuma tiko ni a kaya na dauveivakacalai ko ya ni a sa bula voli, Ni oti ga e tolu na siga, au na tu cake tale! O koya gona mo ni vakarota mada me yadravi matua sara na i bulubulu me yacova na i katolu ni siga, de ra lako mai na nona tisaipeli ka butakoci koya ka kaya vei ira na tamata, Sa tu cake tale mai na mate ko koya. Ka na qai ca vakalevu cake na veivakacalai e muri mai na kena e liu.”

E sauma yani ko Pailato, “Dou kauta e dua na matayadra, ka la’ki vakatawa matua sara me vaka dou rawata.” Sa ra qai lako ka sogota vakaukauwa na i bulubulu ka ra dregata na vatu ka lesia e so na sotia ni Roma me ra vakatawana tiko.

Ena mataka caca ni Siga Tabu eratou mani lako ko Meri na yalewa ni Makitala, ko Meri na tina i Jemesa, Salome, Joana kei na so tale na yalewa ka kauta na ka boi vinaka ki na i bulubulu me laki caka ena yago i Jisu. Ena nodratou i lakolako eratou sa veitukunitaka voli: “Ko cei mada e na vaqiqica tani na vatu mai na gusu ni bulubulu?” Ia ni ratou tadu yani, eratou qai kila ni a yaco na uneune ka vaqiqica tani na vatu e dua na agilosi i Jiova. Era sa yali na matayadra, ka lala na i bulubulu! Maciu 27:57–28:2; Marika 15:42–16:4; Luke 23:50–24:3, 10; Joni 19:14, Joni 19:31–20:1; Joni 12:42; Vunau Ni Soro 23:5-7; Vakarua 21:22, 23; Same 34:20; Sakaraia 12:10.

▪ Ena vuku ni cava e vakatokai kina na Vakaraubuka me Siga ni Vakavakarau, ia na cava li na Siga ni Vakacecegu “levu”?

▪ Na veitiki ni i Vola Tabu cava sa mai vakayacori ena vuku ni yago i Jisu?

▪ Na cava e rau vakayacora ko Josefa kei Nikotimo me baleta na buluti ni yago i Jisu, ia e vakacava nodrau veiwekani vata kei Jisu?

▪ Na cava era qai kerea na bete vei Pailato, ia na cava na nona i sau lesu vei ira?

▪ Na cava e yaco ena mataka caca ni Siga Tabu?