Wase e 132

Tu ena Liga iMatau ni Kalou

NA SOVARAKI ni yalo tabu ena Penitiko e vakadinadinataka ni sa tadu ki lomalagi ko Jisu. Na raivotu e qai soli e muri vei Sitiveni na tisaipeli e vakadinadinataka talega ni sa tadu yani o Koya ki kea. Ni bera nona vakaviriki ena vatu ena vuku ni nona vakadinadina yalodina, sa qai kaya ko Sitiveni: “Au sa raica ni sa tadola na lomalagi ka raica na Luve ni Tamata ni sa tu cake tu ena liga i matau ni Kalou!”

Na nona sa tu cake tu ena liga i matau ni Kalou, sa waraka tiko kina ko Jisu na i vakaro i Tamana vua: “Mo ni lewa e na kedra maliwa na nomuni meca.” Ia mai na gauna oqo me yacova na gauna me na valuti ira kina na nona meca, na cava sa vakayacora tiko ko Jisu? Sa liutaki ira voli se lewai ira na nona tisaipeli lumuti o koya, e dusimaki ira tiko ena nodra cakacaka vakavunau ka sa vakarautaki ira tiko me ra na laki duavata kei koya, ni oti nodra vakaturi, ena veiliutaki vakatui ena Matanitu nei Tamana.

Me kena i vakaraitaki ko Saula (sa qai kilai e muri ena yacana vaka-Roma, ko Paula), e digitaka e muri ko Jisu me liutaka na cakacaka ni veivakatisaipelitaki ki na veivanua tale e so. E lomakatakatataka sara ko Saula na Lawa ni Kalou, ia e vakamuai cala mai vei ira na i liuliu ni lotu vaka-Jiu. E sega walega ni vakadonuya ko Saula na labati i Sitiveni, ia e lako talega ki Tamasiko ena veivakadonui i Kaiafa na bete levu, me kauti ira vakavesu era sa mai muri Jisu ki Jerusalemi na tagane kei na yalewa. Ia, ena i lakolako nei Saula, sa qai cilavi koya vakasauri e dua na rarama kaukauwa ka bale sobu kina ki na qele.

“I Saula, i Saula, ko sa vakacacani au e na vuku ni cava?” e taroga mai na domo ena vanua tawarairai. “O cei ko iko, na Turaga?” e taroga ko Saula.

“Oi au ko Jisu, ko koya ko sa vakacacana,” e saumi yani.

A mataboko ko Saula ena kaukauwa ni rarama veivakurabuitaki oqori, sa qai tukuna vua ko Jisu me lako ki Tamasiko ka waraka mai kea na i vakaro me soli vua. Sa rairai ko Jisu ena raivotu vei Ananaiasa, e dua na nona tisaipeli. Sa tukuna ko Jisu vei Ananaiasa ena vuku i Saula: “Na tamata digitaki vei au, me kauta na yacaqu ki na matadra na veimatanitu tani, kei ira na tui eso, kei ira na luve i Isireli.”

Ena veitokoni i Jisu, e cakayaco sara vakalevu na cakacaka vakavunau i Saula (kilai ena gauna oqo me ko Paula) kei ira na nona i tokani daukaulotu. Na kena dina oqori, ni oti e 25 na yabaki mai na nona a rairai vua ko Jisu ena sala ki Tamasiko, sa qai vola ko Paula ni i ‘tukutuku vinaka sa vunautaki vei ira na tamata kece ga e na ruku i lomalagi.’

Ni oti tale e vica vata na yabaki, sa qai solia veitarataravi ko Jisu na raivotu vei Joni, na nona i apositolo daulomani. Ena vuku ni raivotu kece oqo e vakamacalataka ko Joni ena i vola ni i Vakatakila, sa vaka sara ga e bula tikoga kina o koya me raica na lesu mai i Jisu ena kaukauwa ni Matanitu. E kaya ko Joni ni ‘vakasinaiti ena Yalo Tabu,’ ka kau yani o koya ena “siga ni Turaga.” A cava na “siga” oqo?

Na kena vulici vinaka na veiparofisai ni i Vola Tabu, ka vauci talega kina na parofisai sara ga i Jisu me baleta na i otioti ni veisiga, e vakaraitaka ni sa tekivu “na siga ni Turaga” ena 1914, na yabaki i vakatakilakila ena i volatukutuku ni veigauna, io, e donuya na i tabatamata oqo! E vakatalega kina ena 1914, a lesu tawarairai mai kina ko Jisu, e sega ni lako kaya mai na uvu ni davui me kilai levu, ia era vakila ga na nona dauveiqaravi yalodina na nona lesu mai. Sa solia ko Jiova vei Jisu ena yabaki oqori na i vakaro me lako ka vakamalumalumutaki ira na nona meca!

Ni muria na i vakaro i Tamana, sa qai vakasavasavataka na lomalagi ko Jisu mai vei Setani kei ira nona timoni, ka ulataki ira sobu mai ki vuravura. Ni raica oti ko Joni na vakayacori ni raivotu oqo, sa qai rogoca e dua na domo vakalomalagi ni kacivaka: “Sa qai yaco na bula, kei na kaukauwa, kei na matanitu ni noda Kalou, kei na kaukauwa ni nona Karisito.” Io, sa tekivu veiliutaki me Tui ko Karisito ena 1914!

Sa i tukutuku vinaka dina oqo vei ira era dausokalou vei Jiova mai lomalagi! Era uqeti: “Mo reki kina na lomalagi, kei kemudou sa tiko kina.” Ia, ena vakacava na i tuvaki era na sotava o ira era tiko e vuravura? “Dou na ca koi kemudou sa tiko e vuravura kei na wasawasa,” e tomana na domo mai lomalagi, “ni sa lako sobu vei kemudou na tevoro, sa cudru vakalevu, ni sa kila ko koya ena sega ni dede na nona gauna.”

Eda bula donuya oqo na gauna lekaleka o ya. Era sa tawasei rua ena gauna oqo na tamata me ra curuma yani na vuravura vou ni Kalou se sotava na rusa. Na ka dina oqo, sa vakatulewataki sara tikoga oqo na nomu bula mai na i vakarau ni nomu ciqoma na i tukutuku vinaka ni Matanitu ni Kalou, ka sa vunautaki tiko oqo e vuravura raraba ena ruku ni veidusimaki i Karisito.

Ena gauna sa vakacavari kina na nodra tawasei na tamata, ena qai yaco ko Jisu Karisito me Mata ni Kalou ka vakarusa vakadua mai vuravura na i vakarau ni veika i Setani kei ira kece era cuqena. Ena vakayacora oqo ko Jisu ena nona cavuivuvutaka na veika ca kecega ena i valu ka vakatokai ena i Vola Tabu na Amaketoni. Ni oti oqori, ko Jisu na Ka Bula rogo duadua ka taravi Jiova ga na Kalou, ena qai tauri Setani kei ira na nona timoni ka vesuki ira me dua na udolu na yabaki ena “i bulubulu sega ni vakabotona,” a ya, na i tuvaki e vaka tu na mate ka sega kina na cakacaka. Cakacaka 7:55-60; 8:1-3; 9:1-19; 16:6-10; Same 110:1, 2; Iperiu 10:12, 13; 1 Pita 3:22; Luke 22:28-30; Kolosa 1:13, 23; Vakatakila 1:1, 10; 12:7-12; Vta 16:14-16; 20:1-3; Maciu 24:14; 25:31-33.

▪ Ni sa cabe cake oti ko Jisu ki lomalagi, e sa tiko oqo e vei o koya, ia na cava e waraka tiko?

▪ E sa liutaki cei tiko ko Jisu ni lesu ki lomalagi, ia e vakaraitaki vakacava na nona veiliutaki?

▪ Ena gauna cava e tekivutaki kina “na siga ni Turaga,” ia na cava e qai yaco ni sa tekivutaki?

▪ Na cakacaka cava ni veitawasei e sa caka tiko edaidai ka vakayacoka yadua vei keda, ia e yavutaki mai na cava na caka ni veitawasei oqo?

▪ Ni sa vakacavari na cakacaka ni veitawasei, na cava ena muria mai?