Wase e 133

Vakacavara ko Jisu na Ka Kece e Vinakata na Kalou Vua me Cakava

NI SA yaco o koya na Tui Dauvala ko Jisu Karisito me kauti Setani tani kei na nona vuravura tawadodonu, sa wacava na rekitaki ni veika ena qai sotavi! Sa na tekivu na dua na Udolu na Yabaki ni Veiliutaki vaka-Tui i Jisu ka na kauta mai na sautu!

Ena veidusimaki i Jisu vata kei ira na nona i lawalawa vakatui, o ira era bula sivia yani na Amaketoni era na qai vakasavasavataka na i rusarusa ni veika e biuta tu mai na i valu ni yalododonu. Era na rairai vakaluveni ena loma ni dua na gauna o ira na bula yani e vuravura, era na vakaitavi talega o ira oqo ena cakacaka marautaki me teivaki na vuravura me dua na were totoka e vaka na basenikau.

Ni toso na gauna sa na qai kauti ira mai na lewe milioni e tawawiliki rawa ko Jisu mai na i bulubulu me ra mai rekitaka na Parataisi rairai totoka oqo. Ena vakayacora oqo o koya me i vakayaco ni nona yalayala: “Ni sa lako mai na gauna era na rogoca kina na domona ko ira kecega e nai bulubulu, . . . a ra na lako maikina.”

Na tamata i valavala ca a vakarubeci e yasana ena kau ni veivakararawataki ena maliwai ira ena vakaturi ira cake ko Jisu. Mo nanuma lesu ni a yalataka vua ko Jisu: “Au sa tukuna dina vei iko edaidai, e daru na tiko vata mai Parataisi.” E a sega ni kau cake na tamata oqori ki lomalagi me laki veiliutaki vakatui kei Jisu, se mai tamata tale ko Jisu ka bula vata kei koya ena vuravura Parataisi. Ia, na i balebale ni nona tiko ko Jisu kei na tamata i valavala ca eliu o ya ni na vakaturi koya me bula ena loma ni Parataisi ka raica me soli vua na ka kece e gadreva, na veika vakayago kei na veika vakayalo, me vaka e vakaraitaki koto ena taqana ka tarava.

Mo vakasamataka mada! Ena kauwai loloma i Jisu, na vuvale kece ni kawatamata​—⁠o ira era bula sivia yani na Amaketoni, na nodra kawa, kei ira na lewe udolu na milioni era na vakaturi ka ra vakarorogo vei koya⁠—​era na tubu cake me yacova ni ra sa bula savasava ka taucoko. Ena vukuna na Luvena vakatui, ko Jisu Karisito, ena tiko vakayalo ko Jiova kei ira na kawatamata. Me vaka na domo a qai rogoca mai lomalagi ko Joni sa kaya, “Na Kalou ena tavoya tani kecega na wai-ni-mata mai na matadra; ia ena sega tale na ciba, se na rarawa, se na tagi, ka na sega tale na vutugu.” Ena sega ni dua na tamata e dela i vuravura me sotava na rarawa se tauvimate.

Ni sa cava na Dua na Udolu na Yabaki ni Veiliutaki vaka-Tui i Jisu, sa na vakalesui na i tuvaki ni bula me vaka a nakita taumada na Kalou ena nona tukuna vei rau na i matai ni veiwatini, ko Atama kei Ivi, me rau vakaluveni ka vakasinaiti vuravura. Io, ena vakasinaiti na vuravura ena kawa i valavala dodonu ka savasava. E yaco oqo ena vuku ni kena taurivaki vei ira kece me veisobuti na yaga ni i soro ni i voli ni sereki i Jisu. Na mate ena vuku ni i valavala ca i Atama ena takali tani vakadua!

E keri sa na vakacavara ko Jisu na ka kece e vinakata vua ko Jiova me cakava. O koya gona ni sa cava na dua na udolu na yabaki, ena qai solia lesu na Matanitu kei na matavuvale savasava ni kawatamata vei Tamana. Ena qai sereki Setani kei ira nona timoni na Kalou mai na qara e sega ni vakabotona, o ya ena i tuvaki e vaka ga na mate ka sega ni dua bulu na cakacaka lailai e caka rawa kina. A cava na kena i naki?

Ni sa oti na dua na udolu na yabaki, e voleka ni o ira kece era bula voli ena loma ni Parataisi, era a vakaturi mai na mate ka ra se sega mada ni bau sotava me vakatovolei na nodra vakabauta. Ni bera na nodra mate, era a sega ni bau kila na vosa ni yalayala ni Kalou ka ra sega ni cakacakataka kina na nodra vakabauta na veika oqo. Ni oti na nodra vakaturi ka vakatavulici ena dina ni i Vola Tabu, e rawarawa sara vei ira na nodra qarava na Kalou ena loma ni Parataisi, ni ra se sega ni bau sotava na veitusaqati. Ia kevaka me a soli vei Setani me saga me tarova na nodra qarava tikoga na Kalou, era na vakadinadinataka li ni ra na yalodina ena gauna ni veivakatovolei? Me saumi na taro oqo, sa na sereki mai kina ko Setani.

E vakaraitaka na i vakatakila a soli vei Joni ni oti na Dua na Udolu na Yabaki ni Veiliutaki vaka-Tui i Jisu ena cakayaco sara kina ko Setani ena nona vukica e dua na i wiliwili tamata e sega ni kilai na kedra i wiliwili mai na nodra qarava tiko na Kalou. Ia, ni sa cava na i otioti ni veivakatovolei, ena qai vakawabokotaki vakadua ko Setani kei ira nona timoni, kei ira kece e vakacalai ira o koya. Ena yasana ka dua, o ira era yalodina ena gauna ni veivakatovolei, era na bula tiko me ra rekitaka na veivakalougatataki tawamudu i koya na Tamadra vakalomalagi.

E macala vinaka ni sa vakaitavi oti ka na vakaitavi tikoga ko Jisu ena i tavi bibi ena kedra vakacavari na i naki lagilagi kece ni Kalou. Eda na rawa ni rekitaka dina mai muri e dua na gauna totoka ena vuku ni nona vakacavara vinaka na ka kece ena nona i tutu me vaka na Tui levu vakalomalagi ni Kalou. Ia, eda sega ni guilecava rawa na ka kece a vakayacora ena gauna a bula voli kina vakatamata.

A lomasoli ena nona lako mai vuravura ko Jisu, ka mai vakavulica vei keda na veika e baleti Tamana. Qai uasivia oqo, e mai i vakaraitaki o koya ena veitovo talei ni Kalou. E luvuci keda noda vakananuma na uasivi ni nona yaloqaqa, na nona vuku e tawavakatauvatani rawa, na nona dua na qasenivuli maqosa, na nona dauveiliutaki yaloqaqa, kei na nona yalololoma ka dauveinanumi. Ni da nanuma lesu na rarawa vakaitamera a sotava o koya ena nona mai vakarautaka na i voli ni sereki, ka sala duadua ga eda na rawata kina na bula, sa luvuci dina na lomada ena levu ni noda vakavinavinaka vua!

Eda raica oqo ni sa dua dina na tamata ko Jisu ena noda mai vulica na veika e baleta na nona bula! E macala vinaka dina na nona rogo ka veiluvuci sara ga. Eda uqeti kina me da tokaruataka na vosa a tauca na kovana ni Roma ko Ponitio Pailato: “Raica, na tamata!” Io, e vakadina kina, “Na tamata,” o koya na tamata rogo duadua a bau bula!

Ena noda ciqoma na i solisoli ni nona i soro ni i voli ni sereki, ena qai yaco me da vagalalataki mai na i colacola ni i valavala ca kei na mate e dewa mai vei Atama, sa rawa ni yaco vei keda ko Jisu me “Tama ni Gauna Tawamudu.” O ira kece era na rawata na bula tawamudu e sega ni ra taura duadua ga na kila-ka me baleta na Kalou ia ena vukuna talega na Luvena, ko Jisu Karisito. Me vukea mada ga na nomu ciqoma na kila-ka dausolibula o ya na nomu wilika ka vulica na i vola oqo! Joni 2:17; 1:7; Joni 5:28, 29; 3:16; 17:3; 19:5; Luke 23: 43; Vakatekivu 1:28; 1 Koronica 15:24-28; Vakatakila 20:1-3, 6-10; 21:3, 4; Aisea 9:6.

▪ Na i solisoli marautaki cava e nodra o ira era bulata yani na Amaketoni kei na luvedra?

▪ O cei tale era na rekitaka na Parataisi me tomani ira era bulata yani na Amaketoni kei ira na luvedra, ka cava na i balebale ni na tiko vata kei ira ko Jisu?

▪ Ena vakacava na i tuvaki ni sa cava na dua na udolu na yabaki, ia na cava ena qai vakayacora ena gauna oqori ko Jisu?

▪ A cava me sereki kina ko Setani mai na qara e sega ni vakabotona, ia a cava ena qai sotava kei ira kece era muri koya?

▪ E rawa ni yaco vakacava ko Jisu me mai “Tama ni Gauna Tawamudu”?