O Cei e Liutaka Dina na Vuravura Oqo?

E vuqa era na sauma na taro oqo ena rua ga na vosa—na Kalou. Ia e sega ni bau tukuni ena dua na vanua ena iVolatabu ni rau iliuliu ni vuravura oqo o Jisu Karisito se o Tamana. A kaya ga o Jisu: “Sa qai biu ki tautuba na turaga ni vuravura oqo.” A kaya tale: “Sa lako mai na turaga ni vuravura oqo, a sa sega ni kunea e dua na ka vei au.”​—Joni 12:31; 14:30; 16:11.

Erau veimecaki gona kei Jisu na iliuliu ni vuravura oqo. O cei beka o koya?

Kilai Rawa Mai na iTuvaki kei Vuravura

E maumau wale na nodra sasaga e vuqa na tamata inaki vinaka, ni sota kaya mai na vuravura na ituvaki ca sara ena veisenitiuri sa sivi yani. E dau vakavulomatarotaro gona oqo vei ira na tamata vakasama me vakataki David Lawrence, e dua na edita sa mai leqa: “‘Na bula veisaututaki e vuravura’​—voleka ni tamata kece ga e vinakata. ‘Na veivinakati’​—voleka ni tamata kece e vuravura era dau veivinakati. Na cava ga e leqa? Na cava e dau yaco kina na ivalu dina ga ni sega sara ga ni dua e vinakata oya?”

E veicalati dina, se vakaevei? Baleta ni vaka oqo, ni dina era gadreva na tamata na bula veisaututaki, ia e yaco ga na veicati kei na veivakamatematei​—qai vakadomobula dina na ka e daucaka. Vakasamataka na torosobu ni ka e daucaka. Sa ra dau vakamatei na tamata ena rumu e sogobutu qai dolavi kina na paipo ni kasi gaga, e vakaduri na keba ni veivakararawataki, e buli na dakai dau vanataka na bukawaqa, kei na gasaukuro bukawaqa, kei na vuqa tale na iwalewale torosobu ni veivakararawataki kei na veivakamatei vakaloloma.

O vakabauta li ni o ira na tamata era gadreva tu na bula vakacegu kei na bula marau e rawa nira cakava vakataki ira na ca torosobu vaka oya? Na igu vakacava e biligi ira na tamata mera cakava kina na veika ca lolovira vaka oya, se vakamuai ira ina vanua mera sa na cakava ga na veika torosobu vaka oya? Sa bau votu beka mai ena nomu vakasama de lakolako e dua na igu ca tawarairai e vakamuai ira tiko na tamata mera vakayacora na itovo kaukaua vaka oya?

Vakatakilai o Ira na iLiuliu kei Vuravura

E sega ni gadrevi meda vakilakila tale tiko, ni sa vakaraitaki tu vakamatata ena iVolatabu ni dua na ka tawarairai e vakasama sa dau lewai ira voli mai na tamata kei na veimatanitu. E kaya: “Sa koto ga vua na vu-ni-ca ko ira kecega na kai vuravura.” E vakaraitaka na iVolatabu ni o koya oqo na “Tevoro, kei Setani . . . sa temaki ira kece ga na kai vuravura.”​—1 Joni 5:19; Vakatakila 12:9.

Ena dua na gauna ni sa lako mai me ‘dauveretaki [Jisu] na Tevoro,’ a sega vakadua ni taroga o Jisu ni o Setani na iliuliu ni vuravura oqo. E vakamacalataka na iVolatabu na ka e yaco: “Sa kauti koya tale na tevoro ki na dua na ulu-ni-vanua cecere sara, a sa vakaraitaka vei koya na matanitu kecega e vuravura, kei na kedrai ukuuku, a sa kaya vua, A ka kecega oqori kau na solia vei iko, kevaka ko na cuva sobu ka vakarokoroko vei au. Sa qai kaya vua ko Jisu, Mo lako tani, Setani.”​—Maciu 4:1, 8-10.

Vakasamataka mada oqo. A via temaki Jisu o Setani ena nona yalataka vua na “matanitu kecega e vuravura.” E vakacava, ena rawa ni veitemaki dina oya ke a sega ni iliuliu dina ni veimatanitu oqo o Setani? Ena sega. Eda raica tale ga e ke ni a sega ni cakitaka o Jisu ni nei Setani na veimatanitu kece oqo kei vuravura, ni a rawa ni cakitaka ke a sega ni tiko dina vei Setani na lewa. O koya gona, o Setani na Tevoro dina ga e iliuliu tawarairai kei vuravura! E vakatokai koya sara ga na iVolatabu me “kalou ni vuravura oqo.” (2 Korinica 4:4) Ia a rawa vakacava vua e dua e ca sara me mai tu sara ena itutu ni veiliutaki cecere vaka oqo?

O koya oqo a qai yaco me o Setani, a dua vei ira na agilosi a bulia na Kalou, ia a qai vuvutaka na itutu ni Kalou. A bolea na dodonu ni Kalou me veiliutaki. Ena vuku ni bolebole oqo, a qai vakayagataka e dua na gata me nona waqawaqa me vakacala kina na imatai ni yalewa o Ivi. A rawati rau ruarua gona, o yalewa kei na watina o Atama me rau muria na lomana sega ni loma ni Kalou. (Vakatekivu 3:1-6; 2 Korinica 11:3) A nona bolebole tale ga ni rawa ni vagolei ira tani na kawa kece i Atama kei Ivi era se bera ni sucu mera kua ni qarava na Kalou. E vakatara gona kina na Kalou na gauna vei Setani me vakadinadinataka na nona vosa, ia e laurai ni lasu o koya.​—Jope 1:6-12; 2:1-10.

E sega ni o Setani duadua ga e liutaki vuravura tiko. A vagolei ira rawa e so tale na agilosi mera duavata kei koya ena nodra vorata na Kalou. Era yaco mera timoni o ira oqo, mera nona itokani vakayalo. E tukuni ira na iVolatabu ena gauna e uqeti ira kina na lotu Vakarisito: “Mo dou tudei . . . ka vorata nai lawaki ni tevoro. Ni da sa sega ni veivala walega kei ira na tamata, eda veivala talega kei ira era sa liu, kei ira era sa kaukauwa, kei ira na veivavakoso yalo ca e na veiyasana vakalomalagi.” (Neitou na vosa kala.)​—Efeso 6:11, 12.

Vorati Ira na Yalo Velavela

O ira na iliuliu ca tawarairai kei vuravura oqo e sa lomadra tu mera vakacala na tamata kece, mera vagolei ira tani mai na nodra qarava na Kalou. E dua na sala era cakava kina oqo na yalo velavela, oya ena nodra vakabulabulataka na vakasama nira dau bula tale tiko na mate, dina ga ni vakaraitaka tu vakamatata na Vosa ni Kalou ni o ira na mate era sega ni vakila e dua na ka. (Vakatekivu 2:17; 3:19; Isikeli 18:4; Same 146:3, 4; Dauvunau 9:5, 10) O koya gona, ena vosa beka vei ira na weka ni mate era se bula tiko na yalo velavela, ni vosa mai ena vukuna e dua na dau vakacuru se ni vosa sara ga mai vakadodonu. E lasutaka na domo oya, ni o koya ga o koya sa mate, ia e domona dina e dua na timoni!

O koya gona kevaka o rogoca e dua na domo vaka oya, kua sara ni vakabauta. Kua sara ni via rogoca na ka e kaya, cavuta ga kina na vosa i Jisu: “Lako tani Setani!” (Maciu 4:10; Jemesa 4:7) Mo kua ni rawai ena nomu dau via kila na veika e baleta na vuravura ni yalo mo lai veitaratara kina kei ira na yalo velavela. Na veitaratara vaka oya e vakatokai na vakatevoro. E vakaroti ira na nona tamata na Kalou mera qaqarauni mai kina ena kena veibasogana kece. Na iVolatabu e sega ni vakadonuya e dua e dau “rairai . . . se dua sa taroga na daucurumi, se dua na dauveinita, se dua sa taroga na tamata sa mate.”​—Vakarua 18:10-12; Kalatia 5:19-21; Vakatakila 21:8.

Na vakatevoro e rawa ni vakavuna me bobula e dua vei ira na timoni. O koya gona, ke mani veidreti sara vakacava na veika vakatevoro, vorata ga. E okati e ke na dau vakadigova na polo karisitala, vakayagataki ni Ouija board, na ESP, dikevi ni we ni qeteqete ni liga, kei na dau rai kalokalo. Era sa dau veivakasosataki tale ga na timoni ena so na vale era okata me nodra yalava.

Era qaseqase tale ga na timoni ena nodra cakacaka ena malumalumu sa tu rawa vei ira na tamata, oya ena nodra vakabulabulataka na ivola, iyaloyalo kei na retioyaloyalo e vakaraitaki kina na ivalavala vakasisila ni veiyacovi. Era kila na timoni ni vakanananu cala, kevaka e sega ni kau tani mai na vakasama ena rawa ni kasa kina qai vakavuna mera guta kina vakalevu na tamata na ivalavala vakasisila​—me vakataki ira ga na timoni.​—Vakatekivu 6:1, 2; 1 Cesalonaika 4:3-8; Juta 6.

E dina ni vuqa era na kaya ni ka vakalialia na vakasama ni vuravura oqo era liutaka tiko na yalo velavela. Ia e sega ni kurabuitaki na nodra sega ni vakabauta, ni iVolatabu e kaya: “Sa vakamataliataki koya ko Setani me agilose ni rarama.” (2 Korinica 11:14) Na nona lawaki levu duadua oya na nona vakamatabokotaki ira na lewe vuqa mera sega ni vakabauta kina ni bula dina o koya kei ira na nona timoni. Ia kua sara ni vakacalai! E bula dina o Setani kei ira na nona timoni, e gadrevi kina mo dau vorati ira tiko ga.​—1 Pita 5:8, 9.

E marautaki dina ni sa voleka oqo na gauna me na vakawabokotaki kina vakadua o Setani kei ira na nona ilala! “Ko vuravura [oka kina o ira na kena i liuliu timoni] sa lako tani yani,” e kaya vei keda na iVolatabu, “ia ko koya sa cakava na ka sa vinakata na Kalou, sa tu dei ga ka sega ni mudu.” (1 Joni 2:17) Sa na dua dina na vakacegu levu nira sa kau laivi na dau veivakamuai cala oya! Meda wili mada ga kei ira era vakayacora na loma ni Kalou, meda na marautaka kina na bula tawamudu ena vuravura vou ni Kalou era bula kina na yalododonu.​—Same 37:9-11, 29; 2 Pita 3:13; Vakatakila 21:3, 4.

Na tikinivolatabu kece e lavetaki mai na Vakadewa ni Vuravura Vou ni iVolatabu.

[iYaloyalo ena tabana e 4]

Ena rawa beka ni solia ko Setani vei Jisu na matanitu ni vuravura kece oqo ke sega ni nona?