Lesoni 8

Na Bula Vakavuvale e Vakamarautaka na Kalou

Na cava na itutu nei tagane vakawati ena vuvale? (1)

Me raici watina vakacava na tagane? (2)

Na cava soti na itavi nei tama? (3)

Na cava na itavi nei yalewa vakawati ena vuvale? (4)

Na cava e namaka na Kalou vei ira na itubutubu kei na luvedra? (5)

Na cava e kaya na iVolatabu me baleta na veibiu kei na veisere? (6, 7)

1. E kaya na iVolatabu ni tagane e ulu ni nona vuvale. (1 Korinica 11:3) Na tagane vakawati me dua ga na watina. E dodonu me vakalawataki na nodrau vakawati.​—1 Timoci 3:2; Taito 3:1.

2. Na tagane vakawati me lomani watina me vaka ga nona lomani koya. Me lomana na watina me vaka nona dau lomani ira nona imuri o Jisu. (Efeso 5:25, 28, 29) E sega ni dodonu vua me mokuti watina se me vakalolomataki koya. Me dokai koya ga.​—Kolosa 3:19; 1 Pita 3:7.

3. O tama e dodonu me dau cakacaka vakaukaua me qaravi iratou nona vuvale. Me na vakarautaka vei watina kei iratou na luvena na kakana, isulu, kei na vanua me ratou vakaitikotiko kina. E dodonu tale ga vei tama me vakarautaka vei iratou nona vuvale na isolisoli vakayalo me ratou vakacegui kina. (1 Timoci 5:8) E liutaka sara ga o koya na nodratou vukei na nona vuvale me ratou vulica na veika e baleta na Kalou kei na nona inaki.​—Vakarua 6:4-9; Efeso 6:4.

4. Na yalewa vakawati e dodonu me dau vukei watina vinaka. (Vakatekivu 2:18) E dodonu me tokoni watina ena nodra vakavulici kei na nodra tuberi na gone. (Vosa Vakaibalebale 1:8) E namaka o Jiova ni na karoni ira vinaka nona lewe ni vale na yalewa vakawati. (Vosa Vakaibalebale 31:10, 15, 26, 27; Taito 2:4, 5) E dodonu vua na yalewa me rokovi watina.​—Efeso 5:22, 23, 33.

5. E namaka na Kalou mera talairawarawa na gone vei ira na nodra itubutubu. (Efeso 6:1-3) E namaka o koya vei ira na itubutubu mera vakavulici luvedra, mera dau vakadodonutaki ira tale ga. E dodonu mera solia nodra gauna vei luvedra na itubutubu, mera vakavulici ira tale ga ena iVolatabu, mera vakarautaka kina na idusidusi vakayalo kei na idusidusi mera na yalomatua kina na luvedra. (Vakarua 11:18, 19; Vosa Vakaibalebale 22:6, 15) Mera kua vakadua ni dau vakadodonutaki luvedra vakaukaua, se ena sala voravora na itubutubu.​—Kolosa 3:21.

6. Ke sa dau dredre me rau veiyaloni na veiwatini, me rau saga sara ni muria na ivakasala ni iVolatabu. E uqeti keda na iVolatabu meda dau veilomani, meda veivosovosoti tale ga. (Kolosa 3:12-14) E sega ni uqeta na Vosa ni Kalou me caka na veibiu me wali kina na leqa lalai e dau tubu mai. Ia, de sa na vakatulewataka o yalewa me biuti watina ke (1) sa cata matua o watina me qarava nona vuvale, (2) sa rui voravora nona itovo ni dau tautauvimate sara ga kina o yalewa se rivarivabitaki nona bula, se (3) sa rui voravora nona veisaqati ni sega ni rawa sara ga kina vei yalewa me sokaloutaki Jiova.​—1 Korinica 7:12, 13.

7. Me rau dau yalodina na veiwatini. Ke dua e veibutakoci, e sa valavala ca tiko vua na Kalou, vua tale ga na kena isa. (Iperiu 13:4) Na yavu duadua ga vakaivolatabu me rawa kina na veisere kei na vakawati tale na veiyacovi ena taudaku ni vakawati. (Maciu 19:6-9; Roma 7:2, 3) E cata o Jiova na veisere kei na vakawati tale e sega tu na kena yavu vakaivolatabu.​—Malakai 2:14-16.

[iYaloyalo ena tabana e 16, 17]

E namaka na Kalou nira na tuberi luvedra na itubutubu, nira na dau vakadodonutaki ira

[iYaloyalo ena tabana e 17]

Na tama dau loloma e vakarautaka na ka me ratou bula kina vakayago vaka kina vakayalo na nona vuvale