Lesson 12

Noda Raica Vakabibi na Bula kei na Dra

Meda raica vakacava na bula? (1) na vakalutu? (1)

Era na vakaraitaka vakacava na lotu Vakarisito nira dau qaqarauni? (2)

E cala na vakamate manumanu? (3)

Na cava e so na ka e dau caka e vakaraitaka ni sega ni raici vakabibi na bula? (4)

Na cava na lawa ni Kalou me baleta na dra? (5)

E vauci tale ga kina na tauri dra? (6)

1. O Jiova na iVurevure ni bula. Na Kalou ga e vu ni nodra bula tiko na ka bula kece. (Same 36:9) E ka tabu vua na Kalou na bula. Na nona bula mada ga na gone e se bera ni sucu, e se tiko ena kete i tinana e ka talei vei Jiova. E cala ena mata ni Kalou ke nakiti nona vakamatei e dua na gone e se qai kunekunetaki tiko vaka oya.​—Lako Yani 21:22, 23; Same 127:3.

2. O ira na lotu Vakarisito dina era dau qaqarauni. Era na qarauna me vinaka tu na ituvaki ni nodra vale kei na nodra motoka me kua kina ni yaco na leqa. (Vakarua 22:8) O ira na tamata ni Kalou era na sega ni qara na lasa ena rawa ni biuti ira ena ituvaki rerevaki. O koya gona, era na sega ni vakaitavi ena qito e dau yaco kina na veitaratara kaukaua, e nakiti kina nodra vakamavoataki na tani. Era na sega ni lakova se sarava na ka ni veivakalasai e uqeta na itovo kaukaua.​—Same 11:5; Joni 13:35.

3. E ka tabu tale ga vua na Daubulibuli na bula ni manumanu. De na vakamatea na manumanu na lotu Vakarisito me rawata mai kina na ka me kania kei na ka me sulumaka, se me taqomaki koya mai na so na mate ca kei na leqa. (Vakatekivu 3:21; 9:3; Lako Yani 21:28) Ia e cala na vakalolomataki ira na manumanu se mera vakasasataki ra qai vakamatei me ka ga ni lasa.​—Vosa Vakaibalebale 12:10.

4. Na vakatavako, mama betel nut, kei na tauri wainimate gaga me ka ga ni lasa e sega ni dodonu mera cakava na lotu Vakarisito. Era cala na veika oqo baleta (1) nida na lai bobula kina, (2) era vakacacana na yagoda, ra qai (3)  ka dukadukali. (Roma 6:19; 12:1; 2 Korinica 7:1) Ena sega ni rawarawa mera biu laivi na veika oqo. Ia e dodonu ga meda biuta laivi ke da via vakamarautaki Jiova.

5. E ka tabu tale ga ena mata ni Kalou na dra. E kaya na Kalou ni tiko ena dra na soulu, se bula. Ena cala gona kevaka eda kania na dra. E cala tale ga ke da kania na lewe ni manumanu e sega ni vakadavei vinaka na kena dra. Ke kuna na manumanu, se coko ena dai qai mate, me kua ni laukana. Kevaka e cokai se vanai, me vakadavei totolo sara na kena dra me qai laukana.​—Vakatekivu 9:3, 4; Vunau ni Soro 17:13, 14; Cakacaka 15:28, 29.

6. Kevaka eda vakadonuya me soli vei keda na dra, e sega ni cala oya? Nanuma tiko ni o Jiova e vakarota meda vakatabui keda mai na dra. Kena ibalebale oqo ni sega ni dodonu meda taura me curu ina yagoda ena sala cava ga na dra ni tamata tani se noda dra sara mada ga e sa lai maroroi tu. (Cakacaka 21:25, VV) Era na sega gona ni vakadonuya na lotu Vakarisito dina me soli vei ira na dra. Era na ciqoma na veiqaravi vakavuniwai cava tale era tu, me vaka na soli ni wainimate e sega ni veiwaki kei na dra. Era via bula, ia era na sega ga ni beca na lawa ni Kalou ena nodra saga mera maroroya nodra bula.​—Maciu 16:25.

[iYaloyalo ena tabana e 25]

Ke da via vakamarautaka na Kalou, meda kua ni tauri dra, biuta tani na veika dukadukali, qai kua ni dau biuti keda ena so na ituvaki rerevaki