Lesoni 16

Nomu Vakatulewa Mo Qarava na Kalou

Na cava mo cakava mo itokani kina ni Kalou? (1, 2)

O na yalataki iko vakacava vua na Kalou? (1)

Mo papitaiso ena gauna cava? (2)

O na rawata vakacava na kaukaua mo yalodina tiko ga kina vua na Kalou? (3)

1. Mo itokani ni Kalou, e dodonu mo vuli mo kila vinaka na ka dina mai na iVolatabu. (1 Timoci 2:3, 4), mo vakabauta na veika o sa vulica (Iperiu 11:6), veivutunitaka nomu ivalavala ca (Cakacaka 17:30, 31), mo qai saumaki mai ena ivakarau ni nomu bula. (Cakacaka 3:19) Sa na qai uqeti iko na nomu lomana na Kalou mo yalataki iko vua. Kena ibalebale oqo ni o na tukuna vua ena masu, o iko ga vakataki iko, ni o sa soli iko vua mo vakayacora na lomana.​—Maciu 16:24; 22:37.

2. Ni o sa yalayala oti vua na Kalou, e dodonu mo papitaiso sara. (Maciu 28:19, 20) Ena nomu papitaiso, sa na qai kilai raraba kina ni o sa yalataki iko oti vei Jiova. Na papitaiso gona e baleti ira ga na sa rawa ni vakatulewataka vakayalomatua mera qarava na Kalou. Ni sa papitaiso e dua, me tabadromuci sara ga e wai.a​—Marika 1:9, 10; Cakacaka 8:36.

3. Ni o sa yalayala oti vei Jiova, ena namaka o koya mo dina tiko ga ina ka o sa yalataki iko kina. (Same 50:14; Dauvunau 5:4, 5) Ena saga na Tevoro mo kua ni qaravi Jiova. (1 Pita 5:8) Ia toro voleka vua na Kalou ena nomu dau masu. (Filipai 4:6, 7) Vulica nona Vosa e veisiga. (Same 1:1-3) Dau veimaliwai vakavoleka kei na ivavakoso. (Iperiu 13:17) Ni o vakayacora oqo, o na rawata na kaukaua mo na yalodina tiko ga kina vua na Kalou. Sa na qai rawa vei iko mo vakayacora me tawamudu na veika e vakarota vei iko na Kalou!

[iVakamacala e ra]