Na Lewenivola

Ni dua e se qai curuma vakadua na valeniwilivola se laibri, ena rairai veilecayaki tale ena levu ni ivola. Ia ni vakamacalataki na sala era tuvani kina, ena rawa ni kunea na ivola e vinakata. E vaka tale ga kina na vaqara tikinivolatabu, ena rawarawa ke kilai na sala era wasewasei kina.

NA VOSA “Bible” (iVolatabu) e vakadewataki mai na vosa vakirisi na bi·bliʹa, e kena ibalebale na “ivolakuta vivigi” se “levu na ivola.”¹ Era lewe ni iVolatabu e vicavata na ivola—na laibri—e tiko kina e 66 na ivola e taura e 1,600 taucoko na yabaki na kedra volai, mai na 1513 B.S.K. ina rauta na 98 S.K.

Na imatai ni 39 na ivola, rauta ni tolu na ikava ni lewe ni iVolatabu, e vakatokai me iVolatabu Vakaiperiu ni a volai ga vakalevu ena vosa oqori. Eda rawa ni wasea vakatolu na veivola era tiko kina: (1) iTukutuku ni Veigauna, Vakatekivu ina Esiteri, 17 na ivola; (2) Serekali, Jope ina Sere i Solomoni, 5 na ivola; kei na (3) Parofisai, Aisea ina Malakai, 17 na ivola. Na iVolatabu Vakaiperiu e baleta na itekitekivu kei vuravura kei na kawatamata, vaka kina na itukutuku ni matanitu makawa o Isireli mai na kena tauyavu me yacova sara na ikalima ni senitiuri B.S.K.

Na vo ni 27 na ivola e vakatokai me iVolatabu Vakirisi Vakarisito, nira se volai ena gauna se kilai raraba kina na vosa vakirisi. E rawa nira wasei ga ena ulutaga era dui volai kina: (1) na 5 na ivola ni itukutuku ni veigauna—na Kosipeli kei na Cakacaka, (2) e 21 na ivola (letter), kei (3) na Vakatakila. Na iVolatabu Vakirisi Vakarisito e vakamacalataka na ivakavuvuli kei na cakacaka nei Jisu Karisito kei ira nona tisaipeli ena imatai ni senitiuri S.K.