Sala o Rawa ni Kilai Koya Kina na Kalou

E rawa mo kilai Jiova ena nomu wilika na iVolatabu. Ena dua na gauna balavu sa oti, a digitaka kina na Kalou e so na tamata mera vola na lomana. Na veika era vola e sa lewe ni iVolatabu. Nikua, eda na kilai koya na Kalou ena noda wilika na iVolatabu. Ni volai ena iVolatabu na vosa i Jiova se nona itukutuku, e dau vakatokai tale ga kina me Vosa ni Kalou. Dodonu meda vakabauta na ka kece e volai ena iVolatabu, baleta o Jiova e sega ni lasu rawa. ‘E sega ni rawa ni vosa lasu na Kalou.’ (Iperiu 6:18) Na ka dina e tiko ena Vosa ni Kalou.—Joni 17:17.

Na iVolatabu e dua vei ira na iloloma talei ni Kalou vei keda. E vaka e dua na ivola e vola e dua na tama dau loloma vei ira na luvena. E tukuna vei keda na nona yalataka na Kalou me veisautaka na vuravura me vanua vinaka ni bula—me parataisi. E tukuna vei keda na ka e sa cakava oti, na ka e cakava tiko, kei na ka e se vo me cakava vei ira na luvena yalodina. E vukei keda meda walia na noda leqa, meda kunea tale ga na sala meda marau kina.—2 Timoci 3:16, 17.

Era itokani ni Kalou na iVakadinadina i Jiova; era na vukei iko mo kila na ka e kaya na iVolatabu. Tukuna ga vei ira ni o via vulica na iVolatabu. Era na sega ni lavaka vei iko mo sauma. (Maciu 10:8) Kena ikuri, e rawa mo tiko ena soqoni vakarisito. Dau vakayacori oqo ena nodra valenilotu e vakatokai na Kingdom Hall. Ke o dau lakova na soqoni vakarisito, ena totolo sara nomu kilai koya na Kalou.

O na rawa ni kilai koya na Kalou mai na veika e bulia. Me kena ivakaraitaki, e kaya na iVolatabu: “Sa bulia na lomalagi kei vuravura na Kalou.” (Vakatekivu 1:1) Ena gauna e bulia kina “na lomalagi” o Jiova, a bulia na matanisiga. Na cava eda kila rawa e kea me baleti koya na Kalou? Eda kila rawa e kea na kaukaua levu i Jiova. O koya duadua ga e rawa ni bulia na ka kaukaua me vaka na matanisiga. Eda kila tale ga kina ni o Jiova e Kalou vuku, baleta ni vuku ga e buli rawa kina na matanisiga me solia mai na katakata kei na rarama, ia e sega ga ni yavu rawa.

Veika e bulia o Jiova e vakaraitaka ni lomani keda. Vakasamataka mada na veimataqali vuanikau era tu e vuravura. E rawa sara ni a vakarautaka vei keda o Jiova e dua ga na mataqali vuanikau—se kua sara ga ni dua. Ia, e vakarautaka ga vei keda o Jiova na veimataqali vuanikau ena kedra dui ibulibuli, kedra levu, rokadra, kei na kedra ikanakana. E vakaraitaka oqo ni o Jiova e sega ni Kalou dau loloma wale ga, e Kalou lomasavu, dauveinanumi, qai yalovinaka.—Same 104:24.