Cavuti Vakamatata na Vosa

E DODONU mo cavuta vakamatata nomu vosa ke o vinakata me kilai na ka o tukuna. O vakasavuya beka e dua na itukutuku matanidavui, se itukutuku bibi, ia ke vaka na kana uvi katakata na nomu vosa, ena maumau wale na ka o tukuna.

E sega ni dua ena vakauqeti ena itukutuku e sega ni matata na kena ibalebale. Ke vosa mada ga e dua e domo kaukaua, qai rogoci na domona, ena sega ga ni veivakauqeti ke sega ni matata na ka e tukuna. Ena vaka ga e vosa tiko ena dua na vosa tani e sega ni kila o koya e rogoca. (Jere. 5:15) E kaya na iVolatabu: “Kevaka ena rorogo na davui-ni-valu ka sega ni kilai na kena rorogo, o cei ena vakarautaki koya me laki valu? Sa vakakina koi kemudou, kevaka dou sa sega ni cavuta na vosa sa kilai rawa, ena kilai vakaevei na ka sa vosataki? dou na vosa walega ki na cagi.”—1 Kor. 14:8, 9.

Cava e Dau Vakavuna me Sega ni Matata Noda Vosa? De vu ena kena sega ni dolavi vinaka na gusu. Dau rogo lailai qai sega ni matata na ka e tukuni ke kaukaua na ua ni galegale qai sega ni yavala sara na tebenigusu.

Ena dredre tale ga me kilai na ka e tukuni ke rui cadruti na gusu. Oqo ena via vaka na vakatagitaki ni dua na tepi ni vosa e vakatotolotaki na kena cawiri. E rogoci tiko na vosa ia e lailai na ka e tauri rawa.

E so e sega ni matata nodra vosa ke leqa na yamedra, gusudra, kei na so tale. Ia, o ira mada ga e yacovi ira na leqa oqo e rawa nira vakavinakataka nodra vosa ke ra muria na ka e vakaturi ena lesoni oqo.

Ia, vakalevu me dau sega ni matata na vosa ke rui totolo na gusu—semai kece ga na vosa me sega ni kilai kina na ka e tukuni. Rawa ni wili kina na vakalekalekataki ni vosa e sega ni dodonu me vakalekalekataki, se sega ni cavuti e so na tamo ni vosa e dodonu me cavuti. Ni dua e mama nona vosa, ena tauri beka ga vakatikina na ka e tukuna, na kena vo e sa na vakilakilai ga. E macala gona e ke ni na sega soti ni mana nona veivakavulici e dua ke sega ni cavuta vinaka na vosa.

Cavuta Vakamatata na Vosa. Ke o vinakata mo cavuta vakamatata e dua na vosa, wasewasea vakalalai, qai cavuta vakamalua na kena iwasewase yadua. Ena via rogo mawi ni o se qai tekivu vakatovolea, ia ena qai rogo vinaka mai ke o vakatovotovotaka tiko ga. O na cavuta vata e vica na vosa ni o vinakata me taladrodro nomu vosa, e vinaka oqo, ia qarauna me kua ni veisautaka na ibalebale ni ka o via tukuna.

iTatau: E rawa ni o vakatovotovotaka mo dau cavuta vakamatata na vosa ena nomu vosa se wiliwili sara vakamalua. Ia, me kua ni rui malua tale na itautau ni nomu vosa ni o veivosaki. Ni na rogo ca, ena mawi tale ga.

Ke sega ni rogo vinaka mai na domomu, me duri cake vakadodonu na ulumu qai vakayawaka na kumimu me kua ni tara na mabumu. Ke o wili iVolatabu, taura toka e cake na ivola me rawarawa nomu raica na ivola kei na nomu raici ira na vakarorogo. Oqo ena rogo vinaka tiko ga kina na domomu, sega ni dua na ka e vakaleqa.

Ke tata na gusumu ena nomu taqaya ni o vosa e matanalevu, cegu vinaka, tauri iko vakamalua. E kilai levu ni rawa ni vakaleqa na domoda ke tadre na ua ni matada se uanidomo ena noda itagitagi. E rawa ni vakavuna mera sega ni cakacaka vata vinaka na noda vakasama, gacagaca ni domo, kei na noda icegu—na veika e dodonu sara ga me ratou cakacaka vata.

E dodonu me malumu vinaka tu na ua ni galegale me rawa ni muria vinaka na ka e vakarota na vakasama. Me malumu tale ga na ua ni tebenigusu. Me rau tu vakarau me rau tadola se me rau qoqovi me rau vakamatatataka kina na rorogo e sa buli rawa mai na loma ni gusu kei na itagitagi. Ke tadre na ua ni galegale kei na tebenigusu, ena sega ni tadola vinaka na gusu, era sa na qai suguraki ira mai na rorogo ena maliwa ni bati. Oqo ena rogo lailai kina noda vosa, sega ni matata, qai rogo ca. Ia, nida vakamalumutaka na galegaleda se gusuda e sega ni kena ibalebale meda vosa vakavucesa. Eda cakava meda bulia vinaka kina noda vosa, matata tale ga na ka eda tukuna.

Ni o vakalewa tiko na kemu ituvaki, ena yaga ke o wilivola e cake. Dikeva se o sa vakayagataka tiko vakacava na isolisoli uasivi ni vosa e dui tu vei keda. O dau dolava vinaka na gusumu me lako vinaka mai kina e tuba na rorogo? Nida vosa, eda vakayagataka ga vakalevu na yameda, ia kua ni nanuma ni oqo e gacagaca duadua ga e vakavuna na rogo ni domo. Na domo, kubunigusu, tebenigusu, ua ni mata, kei na ua ni itilotilo, era bibi tale ga ena rogoci ni noda vosa. Ni o vosa, era dau yavala tale beka ga na ua ni matamu? Ke sega, e rawa ni dua o iko e dau sega ni matata na ka o tukuna.

Ke tiko e vale e dua na retio ni katokatoni, katona mada na domomu ni o vosa tiko me vaka ga nomu dau vosa e veisiga, vaka beka mo cakacaka vakavunau. Katona me bau vica na miniti. O na kila ke o sega ni dau cavuta vakamatata e so na vosa ke o rogoca lesu na ka o katona. Rogoca ke sega ni matata e so na vosa o cavuta, rogo lailai, se o cavuta vakavo, qai dikeva na vuna e vaka kina oya. Vakabauti ni rawa ni wali na leqa kece oqo ena kena muri na veika e vakaturi mai cake.

Vakacava ke sega ni dau rogo vinaka na ka o tukuna ena vuku ni kemu ituvaki? Tovolea mo dolava cake vakalevu na gusumu, qai saga mo cavuta sara ga vakavinaka na vosa yadua. Tawana vinaka nomu yatevuso ena cagi ni o cegu, qai vosa vakamalua. Levu e sega ni dau matata na nodra vosa e sa matata sara ena nodra vakayacora oqo. Ke o samila, vakayawaka na yamemu mai na batimu e liu ni o cavuta na vosa era tiko kina na matanivola na k, r, kei na s. Ke sega ni wali taucoko nomu leqa, kua ni yalolailai. Nanuma tiko ni o Jiova a digitaki Mosese, e dua e sega ni gusu macala, me vakasavuya na itukutuku bibi vei ira na Isireli, vaka kina vua na Fero ni Ijipita. (Lako 4:10-12) Ke o soli iko tale ga, ena vakayagataki iko o Jiova, ena vakalougatataka tale ga na nomu cakacaka vakaitalatala.