Matanataki ni Vosa, iRairai ni Mata

E SO na vanua e vuravura e matanataki vakalevu kina na vosa, so e sega soti. Ia, voleka ni tamata kece era dau matanataka nodra vosa, se ra veivosaki ga vakataki ira, se ra vosa e matadra na lewevuqa.

E dau matanataka o Jisu na nona vosa, vaka kina o iratou nona tisaipeli. Dua na gauna, a tukuni vua ni via vosa vei koya o tinana kei iratou na tacina. E qai kaya o Jisu: “O cei na tinaqu? se ko cei ko iratou na taciqu?” Qai tomana na iVolatabu: “A sa dodoka na ligana kivei ira na nona tisaipeli, ka kaya, Raica na tinaqu kei ira na taciqu!” (Maciu 12:48, 49) E levu tale e volatukutukutaki ena iVolatabu na nodra dau matanataka nodra vosa, me vakataki Pita kei Paula erau cavuti ena Cakacaka 12:17 kei na 13:16.

Na noda vakasama kei na ka eda nanuma ena sega ni kilai taucoko ena ka eda tukuna, ena qai taucoko ga ke lako vata kei na noda imoimoi kei na irairai ni matada. Ke sega, ena nanumi nida sega ni taura vakabibi na ka eda tukuna. Ia, nida maqosataka noda vosa me lako vata kei na noda imoimoi, ena matata vei ira na vakarorogo na ka bibi eda via vakaraitaka. Ke o vosa tiko mada ga ena talevoni, ena vakila na irairai ni matamu kei na nomu ivukivuki o koya drau veivosaki tiko mai na irogorogo ni domomu, ena rawarawa tale ga me kila na lomamu kei na bibi ni nomu itukutuku. O koya gona, e bibi mo matanataka na ka o tukuna—ni o vosa se o wilivola, era raici iko na vakarorogo se ra raica tiko na nodra iVolatabu.

Na matanataki ni vosa e sega ni vulici. Vaka ga na dredre, se na cudru. Na matanataki tale ga ni vosa e kilai kina na ka e tu e lomamu. Ke vu gona mai lomamu na nomu vosa, sa na sega tale ni o qai leqataka nomu matanataka, ni sa na lako ga mai vakataki koya.

Na matanataki ni vosa e rua tiko na kena mataqali: Na matanataki ni veika matailalai kei na matanataki ni veika bibi. Na matanataki ni veika matailalai e okati kina na matanataki ni vosa e tukuna na cakacaka, levu ni dua na ka, kei na vanua e tiko kina e dua na ka. Ni o vulica tiko na matanataki ni vosa ena koronivuli, kua ni nanuma mo matanataka ga vakadua se vakarua nomu vosa ena gauna taucoko o vosa tiko kina. Tovolea mo cakava oqo ena gauna taucoko o vosa tiko kina, ia me lako ga mai vakataki koya. Ke via dredre vei iko, vaqara e so na vosa era dusia na vanua, balavu ni dua na ka, kena levu, vanua e tiko kina, kei na so tale. Ia, na kena dina ga me tarai iko sara ga na ka o tukuna, kua ni leqataka na nomu ivukivuki se imoimoi, vosa ga me vaka na nomu dau veivosaki e veisiga. Ke o cakava oqo, na nomu matanataka nomu vosa e sa na lako ga mai vakataki koya.

Na matanataki ni veika bibi o na vakaraitaka kina ena nomu imoimoi ni ka o tukuna e bibi, e tarai iko dina. E vakavotuya mai na ka o via vakabibitaka, e vakavuna me kauaitaki, e vakadeitaka na ka o tukuna. Ni o tukuna e dua na ka bibi, ena qai matata sara ke o vakaraitaka ena nomu imoimoi. Ia, qarauna baleta ni rawa ni o lai cakava tale vakasivia! Ke duadua tiko ga nomu imoimoi, lakolako sa ra na sega ni kauaitaka nomu vosa na vakarorogo, sa ra na vakaraica tiko ga na nomu ivukivuki. Ke vakaraitaka na ivakatawa ni koronivuli ni oqo e nomu leqa, matanataka toka mada ga na veika matailalai. Ni sa via matau vei iko, qai tovolea tale mo matanataka na veika bibi.

Me vakacava na levu ni nomu matanataka na veika bibi? Na ivukivuki cava mo vakayagataka? Oqo e vakatau vei ira na rogoci iko. E rawa nira tikotiko ca ke o dusi ira. Ena so na vanua, e sega ni itovo vakatagane ke vakaraitaka e dua na tagane nona kurabui ena nona tabonaka na gusuna. Ena so tale na vanua, era sega ni dau matanataka soti na yalewa na nodra vosa, e yavala ga vakalevu na matadra. Ia, voleka ni vanua kece e vuravura era raica ni vaka tale na kisitoni e dua e rui sivia nona matanataka nona vosa.

Toso na gauna o sa na qai matau mai ena vosa, o sa na sega soti ni taqaya ni o vakaitavi. Gauna oqo o sa na sega tale ni leqataka nomu imoimoi—e sa na vu ga mai lomamu, e sa na vakilai nomu veikauaitaki dina. Ena tara sara ga na lomadra na vakarorogo na nomu vosa.

iRairai ni Matamu. Se imoimoi cava ga o vakaraitaka, na matamu duadua e dau vakavotuya sara ga na lomamu. Era okati kece e ke na yaloka ni matamu, ibulibuli ni gusumu, kei na tagole ni ulumu. Ke o sega mada ga ni vosa, na irairai ni matamu sa rawa ni tukuna kevaka o vakawelewele, o sevaka e dua na ka, o veilecayaki, o kurabui, se o malaude. Ni o qai dalaga li mo vosa, sa rawa sara ga ni raivakatayaloyalotaki na ka o tukuna, tara tale ga na lomadra na vakarogoci iko. Dua na ka na levu ni ua e bulia o Jiova e matada—e 30 vakacaca. Dua na iwiliwili levu ni ua oqo era yavala nida vakaraitaka e matada nida marau.

Se o vosa mai na buturara, se o vakaitavi ena cakacaka vakavunau, na itukutuku o vota voli e itukutuku vinaka, na itukutuku ena vakamarautaki ira na rogoca. Na nomu matadredredre ena kuria na totoka ni nomu itukutuku. Ena yasana adua, ke sega ni laurai e matamu ni o marautaka nomu itukutuku, ena nanumi ni o sega ni kauai dina.

Kena ikuri, na nomu matamamarau ena tukuna vei ira na tani ni o kauaitaki ira dina. Oqo e rui bibi, ni sa rui levu na vulagi rerevaki ena gauna oqo. Na nomu matamamarau ena kauta laivi na taqaya vei ira na itaukeinivale, ra mai lomadei yani mera rogoci iko.