Vakabibitaki Donu na Wiliki ni Tikinivolatabu

NI O vakamacalataka tiko na inaki ni Kalou—se o veivosaki kei na dua se o vosa mai na buturara—na ka o tukuna e dodonu me yavutaki ena nona Vosa. Oqo ena okati kina nomu wilika e so na tikina mai na iVolatabu, e dua na ka e dodonu mo cakava sara vakavinaka.

Me Lako Vata na Rorogo ni Domomu kei na Ka O Wilika. E dodonu me vakilai ena rorogo ni domomu na ka o wilika. Raica mada e so na kena ivakaraitaki. Ni o wilika i cake na Same 37:11, e dodonu me vakilai ena rorogo ni domomu na nomu vakanuinui ina bula vakacegu e yalataki kina. Ni o wilika na Vakatakila 21:4 me baleta na gauna sa na oti kina na vutugu kei na mate, e dodonu me vakilai ena rorogo ni domomu na nomu vakavinavinakataka na gauna marautaki e yalataki oqo. Ia, ni o wilika na ivakaro ena Vakatakila 18:2, 4, 5, meda dro tani mai vei “Papiloni na koro levu,” e dodonu me veivakauqeti na rorogo ni domomu. Qarauna ga mo kua ni cakava tale vakasivia, ia mo saga me vu mai lomamu. Na rorogo ni domomu ni o wiliwili ena vakatau ena ka e volai kei na inaki e volai kina.

Vakabibitaka Donu na Vosa. Ke yavutaki na nomu ivakamacala ena dua ga na iwase ni tikinivolatabu, e dodonu mo vakabibitaka na iwasewase oqori ena gauna o wilika kina. Kena ivakaraitaki, ke o wilika na Maciu 6:33, o na sega ni vakabibitaka na “nona yalododonu” se “na ka kecega oqo,” ke o via vakadeuca na ibalebale ni kena ‘vakasaqarai taumada na Matanitu ni Kalou.’

Ke o nanuma mo wilika ena nomu itavi ena Soqoni ni Cakacaka na Maciu 28:19, na vosa cava o na vakabibitaka? Ke o via vakauqeti ira na vakarorogo mera gumatua ena nodra tekivutaka e so na vuli iVolatabu, vakabibitaka na matavosa, “vakalotutaki ira.” Ena yasana adua, o na vakabibitaka na “lewe ni veivanua kecega” ke o via vakamacalataka na itavi ni lotu Vakarisito me vota yani na ka dina mai na iVolatabu vei ira na duikaikai ena nomu vanua, se o via uqeti ira na dautukutuku ke rawa mera lai veiqaravi ina vanua e gadrevi kina vakalevu na cakacaka.

Vakalevu meda dau wilika e dua na tikinivolatabu me isau ni dua na taro, se me tokona e dua na ile e dau veibataki. Ke vakabibitaki na vakasama kece e tiko ena dua na tikinivolatabu, ena rawa nira sega ni kila na vakarorogo se veisemati vakacava kei na nomu ile na tikinivolatabu o wilika, e dina ni o na kila tiko beka ga o iko.

Kena ivakaraitaki, ke o wilika na Same 83:18 mai na dua na iVolatabu e tiko kina na yaca ni Kalou, ia o vakabibitaka na matavosa, “Sa Cecere sara duaduaga,” e rawa ni sega ni siqema o koya drau veivosaki ni tiko na yaca ni Kalou. Dodonu mo vakabibitaka na yaca, “Jiova.” Ia, ke o vakayagataka na tikinivolatabu vata ga oqo mo vakadeitaka kina na cecere i Jiova, e dodonu mo vakabibitaka na matavosa, “Sa Cecere sara duaduaga.” Vaka kina ke o vakayagataka na Jemesa 2:24 mo vakaraitaka ni bibi me lako vata na vakabauta kei na cakacaka, ena rawa ni sega ni matata vei ira na rogoci iko na ka o kaya ke o vakabibitaka na “vakadonui,” o sega ni vakabibitaka na “cakacaka.”

E dua tale na ivakaraitaki e tiko ena Roma 15:7-13. Oqo e tiki ni dua na ivola a vola na yapositolo o Paula ina dua na ivavakoso era lewena na kai matanitu tani kei ira na kai Jutia. E kaya tiko na yapositolo ni sega ni lako mai o Karisito vei ira wale ga na Jiu cilivi, e lako tale ga mai ena vukudra na veimatanitu “me ra vakarokorokotaka na Kalou ko ira talega na veimatanitu tani e na vuku ni nona loloma.” Oti oya, sa qai cavuqaqataka o Paula e va na tikinivolatabu me vakamatatataka kina ni loloma ni Kalou e baleti ira tale ga na kai matanitu tani. O na wilika vakacava na veivosa oqo i Paula mo vakabibitaka kina na nona ile? Ke o vakatakilakilataka na matavosa o na vakabibitaka, o na makataka beka na vosa “veimatanitu tani” ena tikina e 9 kei na tikina e 10, “veimatanitu kecega” kei na “veivanua kecega” ena tikina e 11, kei na “veimatanitu tani” ena tikina e 12. Tovolea mo wilika na Roma 15:7-13 o qai vakabibitaka na veivosa oqo. Ena matata, ena rawarawa tale ga ni tauri na ile i Paula ni o cakava oqo.

Ka Mo Cakava. Levu na sala o rawa ni vakavotuya mai kina na vosa o na via vakabibitaka. Ia, na kena iwalewale o vakayagataka ena vakatau ena tikinivolatabu o wilika kei na ka o vakamacala kina. Rawa ni o muria e so na kena iwalewale oqo.

Me veisau na rorogo ni domomu. Dodonu me na veisau na rorogo ni domomu ni o cavuta na vosa o na via vakabibitaka me duidui kina mai na vo tale ni vosa ena dua na tikinivolatabu. Dua na kena iwalewale me na rogolevu cake na domomu, se me rogo malumu sobu. Levu na vanua e vuravura era dau vakabibitaka na ka era tukuna ena nodra vakaukauataka na rorogo ni domodra. So tale na vanua e veibasai sara. Era dau vakabibitaka na ka era tukuna ena nodra vakamalumutaka sobu na rorogo ni domodra. Cakava ga na kena e matau ena nomu vanua, na ka ga e vinakati mo vakabibitaka donu na vosa.

Cegu. Rawa ni o cegu ni bera ni o wilika e dua na matavosa bibi ena dua na tikinivolatabu, se ni o wilika oti, se na gauna ruarua oqo. Nomu cegu vakasauri ni bera ni o wilika e dua na vakasama bibi ena vakavurea na nanamaki; nomu cegu ni o wilika oti ena vakadeitaka na ka o wilika. Ia, ena sega ni vakaibalebale na ka o wilika ke rui sivia tale na nomu cegu.

Taleva. Rawa ni o vakabibitaka e dua na vakasama ke o cegu koso o qai wilika tale na vosa se matavosa o sa wilika oti. E levu era dau wilika vakaoti sara na tikinivolatabu, ra qai taleva ga na vosa se matavosa era via vakabibitaka.

Matanataka. Nomu imoimoi se irairai ni matamu e rawa ni kuria tale na bibi ni dua na vosa se matavosa.

iTautau ni vosa. E rawa ni veisautaka na ibalebale ni dua na vosa se vakavotuya mai me duidui vei ira na kena vo, na itautau ni vosa i koya e wilivola. Ena vinakati tale ga e ke na qaqarauni, vakauasivi ke wiliki e so na vosa e rawa ni tauri vakatani na kena ibalebale.

Ni Dua Tale e Wilika na Tikinivolatabu. Ke wilika na tikinivolatabu o itaukeinivale, e rawa ni vakabibitaka na vosa e sega ni dodonu me vakabibitaki, se sega sara ga ni vakabibitaka e dua na vosa. Cava mo cakava ke yaco oqo? Ena vinaka mo qai vakamatatataka na tikina bibi mai na tikinivolatabu ni o sa vakamacala. Ni o vakamacala oti, rawa ni o qai cavuta sara ga na vosa o vakabibitaka mai na tikinivolatabu.