Me Vakavure Vakasama na iKaunivosa

E TIKI bibi ni dua na vunau na ikaunivosa. Ke vakavure vakasama vei ira na vakarorogo, era na via vakatudaliga sara ga ina ka e tukuni. Ena cakacaka vakavunau, e rawa ni mudu koso na veivosaki ke sega ni vakavure vakasama nomu ikaunivosa. Ena Kingdom Hall, sa rawa nira tekivu vakasamataka e so tale na ka na vakarorogo ke sega ni lauti ira na ka o tukuna, veitalia mada ga ke ra wadravi iko tiko mai.

Ni o vakarautaka nomu ikaunivosa, e vica na ka mo na vakasamataka me nomu inaki: (1) mo vakamuai ira mai na vakarorogo mera rogoci iko, (2) mo vakamatatataka na ka o via vakabibitaka, (3) mo vakaraitaka tale ga na vuna mera rogoci iko kina na vakarorogo. So na gauna o na rawata e tolu na inaki oqo ena dua ga na iyatuvosa. Ia, so na gauna o na vakaraitaka yadudua, ena duidui tale beka ga na veitaravi ni nomu vakamacalataka.

Vakamuai Ira Mai na Vakarorogo Mera Rogoci Iko. E rawa nira soqo vata mai na lewevuqa mera mai rogo ivunau, ia e sega ni kena ibalebale oya nira sa na mai vakatudaliga matua. Ena vuku ni cava? E rawa ni curuoso tu nodra vakasama ena levu na ka. Ra lomaleqataka tiko beka e dua na ka e yaco mai vale, se dua tale na ka era lomaocaocataka voli. O koya gona, e nomu itavi ni o vunau mo vakamuai ira mai na vakarorogo mera rogoci iko, mo qai saga mera rogoci iko tiko ga. E vica toka na sala o rawa ni vakayacora kina oqo.

E dua vei ira na vunau vakairogorogo na Vunau mai na Ulunivanua. A tekivu vakacava? E kaya o Jisu me vaka e volatukutukutaka o Luke: “Dou sa kalougata na dravudravua; . . . Dou sa kalougata, koi kemudou sa viakana edaidai: . . .  Dou sa kalougata, koi kemudou sa tagi edaidai: . . .  Dou sa kalougata ni sa cati kemudou ko ira na tamata.” (Luke 6:20-22) Na cava e veilauti kina na itekitekivu ni vica na vosa oqo i Jisu? E kauta cake mai ena vica wale ga na vosa na leqa lelevu era sotava voli na vakarogoci koya tiko. Ia, e sega ni vakamacalataka vakabalavu na leqa, e dewa sara ena nona vakaraitaka ni se rawa ga nira marau o ira era sotava na leqa vaka oya, qai biuta nona ivakamacala ena kena ibiubiu era via rogoci koya tiko ga kina na lewenivanua.

E rawa ni vakayagataki na taro e veiganiti me vakavure vakasama, ia me qarauni ga. Ke macala mai na taro o taroga ni o na vakamacalataka na ka era sa kila rawa tu na vakarorogo, e rawa ni oti koso na nodra via vakarorogo. Kua ni taroga na taro era na madua kina na vakarorogo, se ra tikotiko ca kina. Bulia na nomu taro me vakavure vakasama. Cegu vakalailai ni o taro oti me rawa nira bau vakasamataka kina na vakarorogo na ka o taroga. Nodra vakasamataka na ka o tukuna e vakaraitaka ni o sa vakamuai ira rawa mai mera rogoci iko.

E rawa tale ga ni o vakamuai ira mai na vakarorogo mera rogoci iko ke o vakamacalataka e dua na ka e yaco dina. Ia, ena sega ni yaga ke o talanoa wale ga, qai vakavu madua vua e dua e vakarorogo tiko na ka o talanoataka. E sega na betena ke nanumi nomu italanoa, ia e sega ni dua na ka e vulici kina. Ke tukuni e dua na ka a yaco dina me ikaunivosa, e dodonu me rawa ni vakayagataki yarayara tiko ena loma ni nomu vosa. Me rawa ni vakilai dina na ka a yaco, ena vinakati beka me tukuni e so na kena itukutuku matailalai, ia qarauna mo kua ni talimagimagi tale.

E so era dau tekivuna nodra vosa ena nodra cavuta e dua beka na itukutuku ena niusiveva se walesi, se nona vosa e dua na tamata kilai levu. Oqo tale ga ena dreti ira mai na vakarorogo ke ganiti ira, ganita tale ga na ulutaga o vosa kina.

Ke o vakaitavi ena vosa veitaravi, se Soqoni ni Cakacaka, e dodonu me lekaleka sara qai matata nomu ikaunivosa. Ke o vakaitavi ena vunau soqovi levu, muria ga na gauna e soli me vakamacalataki kina na ikaunivosa. Kua ga ni talimagimagi ni oya e ikaunivosa wale ga, na lewenivosa taudua e dodonu me sereki vinaka ni oya na tikina ena yaga vei ira na vakarorogo.

So na gauna o na vosa beka kina vei ira e so era na vakalewa na nomu ivakamacala se ra sega ni duavata kei iko. Cava mo cakava mo vakamuai ira mai kina mera rogoca nomu ivakamacala? A kau vakaukaua ina Sanadrini o Sitiveni, e dua na lotu Vakarisito ena imatai ni senitiuri, e tukuni ni “sinai e na Yalo Tabu kei na vuku.” Dua na vakamacala warumisa e qai cakava ena nona taqomaka na lotu Vakarisito. Ia, a tekivuna vakacava? E vosa ena yalo veidokai, qai vakamacalataka e dua na ka era duavata kina. “O i kemuni na veiwekani kei kemuni na qase, mo ni rogoci au mada! E a rairai na Kalou lagilagi vei Eparaama, na noda qase.” (Caka. 6:3; 7:2, VV) Ena vanua cecere nei Arisi mai Aceni, a moica nona ikaunivosa o Paula me ganiti ira na rogoci koya ena nona kaya: “O i kemuni na turaga e Aceni, au sa raica rawa ni ko ni sa vanua dau qaravi kalou.” (Caka. 17:22, VV) Era makutu na rogoci Paula kei Sitiveni ena gauna ruarua oqo ni tarai ira nodrau ikaunivosa.

Ni o lako ena cakacaka vakavunau, o na saga tale ga mo vakamuai ira mai na itaukeinivale mera rogoci iko. Vakauasivi ni sega ni namaki nomu veisiko yani, ra qai ogaoga voli ena so tale na ka. Ena so na vanua e vuravura, na vulagi vaka oqo e dau namaki me vakamatatataka vakatotolo na inaki ni nona veisiko. Ena so tale na vanua, e tiko na sala mo muria ni bera ni o qai vakaraitaka na inaki ni nomu veisiko.—Luke 10:5.

Se vanua cava ga o bula kina, ena rawarawa mo tauyavutaka e dua na veivosaki ke o vakaraitaka ni o kauaitaki koya dina na itaukeinivale. Ena yaga ke o vosa ena ulutaga ena tarai koya sara ga. Na cava mo na tukuna? Ni o sotavi koya, na cava a cakava tiko? De dua a teitei tiko, sasamaki tiko beka e yasa ni vale, ripeataka tiko nona motoka, vakasaqa, savasava, se meimei. A vakaraica tiko beka e dua na ka—niusiveva, se dua na ka e yaco tiko e gaunisala? Ni o veiraiyaki, o raica rawa beka ni dau taleitaka na siwa, qito, ivakatagi, veilakoyaki, kompiuta, se dua tale na ka? E dau kauaitaki vakalevu na ka e rogoci ena walesi se saravi ena retioyaloyalo. Na tarogi beka ni dua na taro me baleta e dua vei ira na ka oqo, se cavuti ni dua na kena ivakamacala e rawa ni tekivu kina e dua na veitalanoa vinaka.

Na vosa nei Jisu vua na yalewa ni Samaria ena yasa ni tobu mai Saika e ivakaraitaki vinaka ni sala e rawa ni tekivutaki kina e dua na veivosaki me lai tini ena wasei ni ka vakayalo.—Joni 4:5-26.

E dodonu mo vakarautaka vinaka sara nomu ikaunivosa, vakauasivi ke sa dau cakacakataki vakawasoma na nomu yalava. Ke sega, ena dredre mo wasea yani na itukutuku vinaka.

Me Matata na Ka O Vakabibitaka. Ni bera ni o vunau, e dau kena ivakarau me liu mada mai na jeameni, mai tukuna nomu ulutaga qai sureti iko ina buturara. Ia, ena yaga mo vakamatatataka tale vei ira na vakarorogo na tikina o na vakabibitaka ena itekitekivu ni nomu vosa. Rawa ni o tukuna sara ga vakadodonu na nomu ulutaga, se cavuta e so na vakasama e kovuti kina. Ia, se cava ga o cakava, na ka ga e vinakati me matata mai na ka o via vakabibitaka ni vakacagau tiko nomu vosa. Vakalasikata gona mai ena nomu ikaunivosa na ka o na vakabibitaka.

A vakamatatataka o Jisu na itukutuku eratou na vunautaka nona tisaipeli ni talai iratou yani. “Ni dou sa lako tiko, mo dou vunau, ka kaya, Sa voleka mai na matanitu vakalomalagi.” (Maciu 10:7) A tukuna tale ga o koya me baleta noda gauna oqo: “Ka na vunautaki mada na i Tukutuku Vinaka ni matanitu ki na vuravura taucoko.” (Maciu 24:14, VV) Eda uqeti meda “vunautaka na vosa,” kena ibalebale oqo me yavutaki ga mai na iVolatabu na noda ivakamacala. (2 Tim. 4:2) Ia, ni bera nida wilika na iVolatabu se vakamua na veivosaki ena ka e vauca na Matanitu ni Kalou, e vinaka me veivosakitaki mada e liu e so na ka ena leqataki sara tiko ga ena gauna oqo. O na via kauta cake beka mai na basulawa, sega ni cakacaka, lewa ca, ivalu, sala mera vukei kina na itabagone, tauvimate, se mate. Ia, kua ni vakamacalataka vakabalavu na itukutuku ca; baleta o iko o italai ni itukutuku vinaka. Oti, mo qai vakamua na veivosaki ena Vosa ni Kalou kei na inuinui ni Matanitu ni Kalou.

Vakaraitaka na Vuna Mera Kauaitaka Kina na Vakarorogo na Ka O Tukuna. Ke o vosa tiko ena ivavakoso, sa macala tu ga ni levu era na kauaitaka na nomu ivakamacala. Ia, era na vakatudaliga beka na vakarorogo me vaka na nona vakatudaliga matua e dua e ganiti koya sara ga na ka e rogoca tiko? Era na vakatudaliga beka nira kila ni ganiti ira sara ga na ka e tukuni tiko, o qai uqeti ira mera cakava kina e dua na ka? Ena rawa ga oqo ke o a vakasamataki ira vinaka—na kedra ituvaki, nodra leqa, nodra nanuma—ni o vakarautaka tiko na nomu vunau. Ena vakilai oqo ena nomu ikaunivosa.

Dua na sala vinaka mo vakamuai ira mai kina na vakarorogo na nomu okati ira ena veivosaki, se o cakacaka vakavunau, se o vosa mai na buturara. Mera kila ni ka o tukuna ena tara sara ga na nodra leqa, se ka era vakataroga voli. Era na qai vakanomodi ga ena vakarorogo ke o vakaraitaka ni o na sega ni vosa raraba tu ga, ia o na tara sara ga e so na ka era dau sotava. Ia, ena vinakati na vakavakarau vinaka.

Kena iTukutukuni. E bibi sara ga na ka o tukuna ena nomu ikaunivosa, ia e rawa ni veivakauqeti tale ga na kena itukutukuni. Mo kua gona ni vakarautaka wale tiko ga na ka mo tukuna, mo na vakasamataka tale ga na kena itukutukuni.

Nomu rawata vinaka nomu inaki ena vakatau tale ga ena vosa o digitaka. O koya gona, ena daumaka mo vakarautaka vinaka sara ga na imatai ni rua se tolu na iyatuvosa o na cavuta. E vinaka taudua na iyatuvosa e lekaleka ga qai matata. De dua o na vinakata sara ga mo volai ira na iyatuvosa oqo, se mo cavuqaqataki ira sara ga me rawa ni titobu qai vakavure vakasama. O na yalodei tale ga mo tosoya nomu vunau ke o sa tekivuna vinaka ena nomu vosa ga vakamalua, vakamatata, ena nomu ikaunivosa.

Gauna Mo Vakarautaka Kina. Levu na kena vakasama. E so era sa matau ena vosa era kaya ni dodonu me imatai ni ka o vakarautaka ni o vakarautaka nomu vunau. E so tale era sa vulica na vunau e matanalevu era kaya ni vinaka me qai vakarautaki ni sa vakarautaki oti na lewenivunau.

E dodonu mo kila vinaka na ka o na vakabibitaka ena nomu vosa, kei na kena veiulutaga lalai, mo rawa ni qai bulia kina e dua na ikaunivosa e laulau. Ia, vakacava ke sa vakarautaki rawa mai na nomu suinivosa? Ni o wilika oti nomu suinivosa, o sa vakasamataka rawa tale ga se me vakacava nomu ikaunivosa, e sega ni dua na kena ca ke o sa vola sara. Ia, mo nanumi ira tale ga na rogoci iko, kei na lewe ni nomu ivakamacala, ke o vinakata me vakavure vakasama nomu ikaunivosa.