Yalorawarawa

EDA marautaka dina na veisau sa mai cakava na Vosa ni Kalou ena noda bula, eda vinakata tale ga mera vakila na marau oqo na tani. Kena ikuri, eda kila ni nodra rogoca na itukutuku vinaka na tamata se sega ena vakatau kina nodra bula mai muri. (Maciu 7:13, 14; Joni 12:48) O koya gona, eda vinakata sara ga mera ciqoma na ka dina. Ia, na noda yalogu kei na noda kauai e dodonu me salavata kei na yalomatua ke da vinakata me vakavatukana na noda sasaga.

Ena sega ni taleitaki na ka eda vakamacalataka ke da vakacala tu ga yani vakadodonu e dua na ivakavuvuli e dau vakamareqeta e dua, veitalia ke da tokona noda ile ena vica vata na tikinivolatabu. Me kena ivakaraitaki, ke da kaya tu ga yani ni cala na vakananumi ni Siganisucu baleta ni yavutaki ena lotu butobuto, ena rairai sega ni veisautaka vakalailai na rai nei itaukeinivale. Ena vinaka cake meda maqosataka noda ivakamacala, da qai yalorawarawa. Ia, na cava na ibalebale ni yalorawarawa?

E kaya na iVolatabu ni “vuku mai cake e . . . veivakacegui, e yalorawarawa.” (Jeme. 3:17, NW) Na vosa Vakirisi e vakadewataki tiko i ke me yalorawarawa e kena ibalebale tale ga na “veisorosorovi.” E so na vakadewa ni iVolatabu era vakayagataka na vosa, “veinanumi,” “yalovinaka,” se “yalovosota.” Dikeva ni vakayagataki vata tiko i ke na yalorawarawa kei na veivakacegui. Ena Taito 3:2 (NW) erau cavuti vata kei na yalolokomi, me veibasai kei na veiba. Na Filipai 4:5 (NW) e uqeti keda meda saga meda vakaitovotaki keda ena “yalorawarawa.” Na tamata e yalorawarawa ena kauaitaka na ituvaki kei koya erau veivosaki. Ena kauaitaka na bula e susugi mai kina, nona itovo, kei na ka e dau vakamareqeta. Ke veiletitaki e dua na ka, e kila na gauna me sorova mada ga kina. Noda vakayacora oqo ena noda veivosaki kei ira na itaukeinivale ena vakarawarawataka nodra dolava na lomadra nida sa vakamacala vei ira mai na iVolatabu.

Mo Tekivu e Vei? E vola o Luke ni gauna e tiko kina mai Cesalonaika na yapositolo o Paula, a vakayagataka na iVolatabu me “vakatakila ka vakadinadina, ni sa kilikili kei na Karisito me vosota na mate, ka tu cake tale mai na mate.” (Caka. 17:2, 3) Meda nanuma tiko ni a cakava oqo o Paula ena nodra valenisoro na Jiu. A vosa tiko o koya vei ira era raica vakabibi na iVolatabu Vakaiperiu. E veiganiti gona na nona tekivutaka nona ivakamacala ena dua na ka era vakabauta na vakarogoci koya.

Ni vosa tiko o Paula vei ira na kai Kirisi ena vanua cecere nei Arisi mai Aceni, a sega ni vakayagataka na iVolatabu ena itekitekivu ni nona ivakamacala. A tekivuna ga ena nona vakamacalataka e so na ka era sa kila rawa tu, sa qai vakayagataka oqo me vakamuai ira kina vei koya na Dauveibuli kei na nona inaki.—Caka. 17:22-31.

E dua na iwiliwili vakaitamera nikua era sa sega ni raica vakabibi na iVolatabu. Ia, voleka ni tamata kece e vakaleqai na nodra bula ena ituvaki dredre era dau sotava. Era diva e levu me vinaka cake na siga ni mataka. Ke o yalorawarawa mo kauaitaka mada eliu na ka era leqataka tu, oti mo qai vakaraitaka na ka e kaya na iVolatabu, ena rairai uqeti ira oya mera via rogoca na inaki ni Kalou me baleta na veigauna mai muri, me vaka e tukuni ena iVolatabu.

A tuberi beka mai e dua drau vuli iVolatabu tiko ena so na ivakavuvuli vakalotu kei na itovo vakavanua. Sa mai vulica oqo ni sega ni taleitaka na Kalou na ivakavuvuli kei na itovo vaka oqori, sa vakanadakui ira tale ga ni sa muria na ka e tukuna na iVolatabu. Ena vakamacalataka vakacava vei rau na nona itubutubu na nona vakatulewa? Erau na nanuma beka nona itubutubu ni nona vakanadakuya na ivakavuvuli vakalotu erau a tuberi koya kina e sa ivakaraitaki tale ga ni nona vakanadakui rau. Ni bera ni vakamacalataka nomu vuli iVolatabu na vu ni nona vakatulewa, e vinaka me na vakadeitaka rawa vei rau nona itubutubu ni lomani rau tiko ga, e dokai rau.

Kila na Gauna Mo Yalorawarawa Kina. O Jiova mada ga e ivakaraitaki vakasakiti ni yalorawarawa, e dina ni lewa tu na ka kece. Ni rau lai vakabulai Loti kei na nona vuvale mai Sotoma na agilosi i Jiova, erau qai vakauqeti iratou me ratou ‘dro ina ulunivanua, de ratou rusa’! Ia e qai vakamamasu o Loti: “Me kakua mada, noqu Turaga”! Sa qai kerea me vakatarai me dro i Soa. Rogoca o Jiova nona kerekere; mani bula o Soa ena gauna era vakarusai kina na veikoro tale e so. E muri, sa qai lako o Loti ina vanua a cavuta taumada o Jiova, ina veiulunivanua. (Vkte. 19:17-30) Kila o Jiova ni donu na ka a vakasalataki Loti kina, ia a yalorawarawa ga me yacova na gauna e qai lialiaci kina o Loti.

E dodonu tale ga meda dau yalorawarawa ke da vinakata meda veimaliwai vinaka. Eda na kila beka ni cala tiko o itaukeinivale, eda kila tale tiko beka ga na ivakamacala dodonu ni ka e tukuna tiko. Ia, so na gauna e vinaka cake meda vakalaiva ga. Noda yalorawarawa vaka oqo e sega ni kena ibalebale nida sa vunia na ka dina se na ka e vinakata o Jiova me kilai. E vinaka cake mo vakavinavinakataki koya na itaukeinivale ena nona talaucaka na lomana, mo kua ni vakacala na nona vosa, me rawa kina ni o veivosakitaka e dua na ka e yaga cake mai na nomu vakavu veiba wale ga. Ke vakacala sara mada ga na ka eda vakabauta, kua ni cudru. De dua e vinaka mo tarogi koya se cava e vaka kina oya nona nanuma. Rogoci koya ni sauma nomu taro. Oqo ena vakarawarawataka nomu kila na lomana. Rawa tale ga ni dolava nomudrau veivosaki ena dua tale na gauna.—Vkai. 16:23; 19:11.

O Jiova e sa solia vua na tamata na galala ni vakatulewa. Sa na qai vakatau vei keda noda vakayagataka vinaka se sega. Dua na gauna, a cavuta lesu tiko o Josua—na italai i Jiova—na veika a cakava na Kalou ena vukudra na Isireli. Oti sa qai kaya: “Ia kevaka sa ca vei kemuni mo ni qaravi Jiova, mo ni digitaki koya edaidai kemuni na qarava; se na veikalou ka ra qarava na nomuni qase mai tai kadua ni Uciwai, se na nodra veikalou na Amoraiti, kemuni sa tiko e na nodra vanua: ia koi au kei ira na noqu lewe-ni-vale, keitou na qaravi Jiova.” (Josua 24:15) O keda e noda itavi meda ‘vunautaka na itukutuku vinaka,’ eda yalogu tale ga ena noda cakava noda itavi, ia eda sega ni vakasaurarataki ira na tani mera mai vakabauta na noda itukutuku. (Maciu 24:14) E nodra galala mera vakatulewa, eda sega ni via kauta tani vei ira na galala oya.

Taro. E ivakaraitaki vinaka o Jisu ena nona dau yalorawarawa ni vakamacala vei ira na rogoci koya. E dau kauaitaka na ka e baleti ira, e vakayagataka tale ga na vosa vakatautauvata e rawarawa mera kila. E dau vakayagataka vinaka na taro. Oqo e solia na galala vei ira na vakarorogo mera vosa, mera talaucaka na lomadra. E uqeti ira tale ga mera vakasamataka vakatitobu na ka e veivosakitaki tiko.

A tarogi Jisu e dua na daunilawa: “Vakavuvuli, a cava me’u kitaka me’u rawata kina na bula tawa mudu?” E rawa ni a sauma ga yani vakadodonu o Jisu nona taro. Ia, a sureti koya na turaga oqo me tukuna na ka e nanuma ena nona taroga: “A cava sa volai e na vunau? a cava ko sa wilika?” E donu vinaka na ka e qai vakamacalataka na daunilawa. Sa mai cava beka na veivosaki ni sa sauma vakadodonu na taro? Sega. E vakalaiva o Jisu me tomana nona ivakamacala, ia na taro e qai tarogi Jisu kina e vakaraitaka ni via vakadonui koya ga. E tarogi Jisu: “Ko cei na kai noqu?” A sega ni sauma ga yani na nona taro o Jisu, de vakavu veiba, vakauasivi nira sega ni dau veiriti na Jiu kei ira na kai matanitu tani, vaka tale ga kina o ira na kai Samaria. Sa qai sureti koya ga o Jisu me vakasamataka nona vosa vakatautauvata. Na vosa vakatautauvata oqo e baleta e dua na kai Samaria dau loloma a vukea e dua era a mokuta, ra butakoca na daubutako ena gaunisala mai Jerusalemi i Jeriko. E qai mai veivuke tiko o koya ni rau sa lako vakatikitiki oti e dua na bete kei na dua na Livai. Me kasa vua na daunilawa na ibalebale ni nona vosa vakatautauvata, sa qai taroga o Jisu e dua na taro rawarawa sara. Na ivakarau ni ivakamacala i Jisu e raica rawa kina na turaga oqo na ibalebale ni ‘kai nona’ a sega ni bau vakasamataka vakadua. (Luke 10:25-37) Sa ivakaraitaki vinaka dina meda vakatotomuria! O koya gona, meda kua ni dau vosa tu ga nida veivakavulici. Meda kua ni vakasama tiko ga o keda, laiva mera vakasama o ira eda vakavulica. Saga mo dau vakayagataka na taro kei na vosa vakatautauvata e rogo matau me vakasama ga kina vakataki koya o itaukeinivale..

Vakadinadinataka na Nomu iLe. E dina ni a wilika na yapositolo o Paula na ka era a vakabauta, ra qai sega ni veibataka na vakarorogo ena gauna a vosa kina ena valenilotu mai Cesalonaika, ia a sega ni yala ga e kea na ka e cakava. E vola o Luke ni qai vakatakila na ibalebale ni ka e wilika, e vakadinadinataka, qai vakamacalataka na kena ivakavakayagataki. Kena itinitini ni yaco mera “vakabauta ko ira eso, ka laki veitokani kei Paula kei Sailasa.”—Caka. 17:1-4.

Se o cei ga eda veivosaki, e rawa ni vuavuai vinaka sara noda veivosaki ke da muria na ivakaraitaki i Paula ena nona dau vakadinadinataka nona ile. E bibi oqo nida veivosaki kei ira na wekada, ira eda cakacaka vata se vuli vata, ira eda sota ena cakacaka vakavunau, noda vuli iVolatabu, se nida lesi meda vunau ena ivavakoso. Ni o wilika e dua na tikinivolatabu, ena matata beka vei iko na kena ibalebale, ia e so ena sega ni matata vei ira. O koya gona, kua ni wilika ga o sa vakamacalataka sara na kena ibalebale, ni na kena irogorogo vei koya e rogoci iko ni oya e noda vakabauta ga o keda. De dua ena yaga mo vakamacalataka na vosa bibi e so era basika mai ena tikinivolatabu o wilika. Rawa beka ni o tokona ena dua na kena ivakadinadina, ena nomu wilika beka na veitikina yavolita, se nomu kauta mai e dua tale na tikinivolatabu e vakamacalataka tale ga na ka oqori? De dua ena vakamatatataka na dina ni ka o kaya e dua na vosa vakatautauvata. Vakacava na taro, ena yaga beka me tarogi me rawa ni vakavure vakasama? Nomu yalorawarawa ena nomu vakayacora na veika oqo ena yaga vei koya e rogoci iko, ena vakavure vakasama.