Wase Ruasagavulukadua

Vakavatukana na iNaki Lagilagi i Jiova

1, 2. (a) Na cava sa inaki tu i Jiova me baleti ira e bulia? (b) O cei era wili tiko ena vuvale levu ni Kalou era duavata ena sokalou vua?

SA NAKITA tu o Jiova ena vuku ni nona loloma, ni na yaco na gauna eda na duavata o keda kece e vuravura vaka kina o ira mai lomalagi ena sokalou vua, me noda kina na galala lagilagi e nodra ga na luve ni Kalou. Oqori tale ga na ka era gadreva vakalevu o ira era lomana na ivalavala dodonu.

² Se tekivu vakayacora na inaki lagilagi oqo o Jiova mai na gauna sara e se qai bulibuli kina. Na imatai ni nona ibulibuli na Luvena, ia mai na gauna a vakaturi kina mai na mate, sa yaco o koya na Luvena me “i yaloyalo ni Kalou kei na rarama ni nona i serau.” (Iperiu 1:1-3, VV) E duatani taudua na Luvena ni o koya duadua ga a bulia na Kalou. Oti, sa qai vakayagataki Luvena na Kalou mera buli kina e so tale; taumada o ira na agilosi mai lomalagi, qai o keda na tamata e vuravura. (Jope 38:7; Luke 3:38) O ira kece oqo era vaka ga e dua na matavuvale levu. Era rai vei Jiova me nodra Kalou, me nodra iLiuliu Cecere, me Tamadra dau loloma tale ga.

3. (a) Na cava erau vakadewa mai vei keda kece na vuda? (b) Ena nona loloma, na cava a vakarautaka o Jiova vei ira na kawa i Atama?

³ Ni sa tau oti vei rau na vuda na itotogi mate ni rau a nakita na nodrau valavala ca, rau sa qai vakatalai mai Iteni qai sega tale ni wiliki rau na Kalou me rau luvena. Rau sa biu tani kina mai na nona matavuvale. (Vakatekivu 3:22-24; Vakarua 32:4, 5) Eda sucukaya mai na gagadre ca ni o keda kece eda kawa mai vei rau. Ia a kila tiko o Jiova ni so na kawa i Atama kei Ivi era na lomana na ivalavala dodonu. Mani vakarautaka vei ira, ena nona loloma, na sala mera na “vakaivotavota [kina] e na nodra galala lagilagi na luve ni Kalou.”​—Roma 8:20, 21, VV.

Sega Tale ni Vakadonui o Isireli

4. Na veisureti lagilagi cava a vagolea o Jiova vei Isireli makawa?

⁴ Sivi toka e 2,500 na yabaki mai na gauna a buli kina o Atama, era lagilagi dina e dua na matatamata ni sa sureti ira o Jiova mera veiwekani kei koya. A digitaki ira na Isireli makawa mera nona tamata qai solia vei ira na nona Lawa. (Vakatekivu 12:1, 2) A umani ira vata mera dua na matanitu qai vakayagataki ira me salavata kei na nona inaki. (Vakarua 14:1, 2; Aisea 43:1) Ia era a sega ni vakila na galala lagilagi erau a vakila taumada o Atama kei Ivi ni se vauci ira tu ga na ivalavala ca kei na mate.

5. A mai mudu vakacava na nodra veiwekani bibi na Isireli kei na Kalou?

⁵ Dina nira sega ni vakila na bula galala uasivi na Isireli, ia a vinaka ga na nodra veiwekani kei na Kalou. A nodra tale ga na itavi dokai mera rokovi Jiova me Tamadra, mera cakava na ka me salavata kei na lomana. A qai mai vakabibitaka vei ira o Jisu ni dodonu mera dina ina nodra itavi. (Maciu 5:43-48) Ia na ka oqo a guce kina na matanitu o Isireli. Dina nira kaya na Jiu, e “dua bau na tama i keimami, na Kalou,” a tukuna ga vei ira o Jisu ni nodra itovo kei na mataqali yalo e tu vei ira e veicalati kei na ka era kaya tiko. (Joni 8:41, 44, 47) A tinia na Kalou na veidinadinati e yavutaki ena Lawa ena 33 S.K., mai cava tale ga kina nona veiwekani bibi kei Isireli. Ia, e kena ibalebale beka oqo ni sa na sega tale ni rawa vei keda na tamata meda na veiwekani vinaka kei na Kalou?

Soqoni Vata “na Veika Mai Lomalagi”

6. Na cava na inaki ni “ka sa lewa” na Kalou, me vaka e vosa kina o Paula ena Efeso 1:9, 10?

⁶ A vakaraitaka na yapositolo o Paula ni so mai vei keda na kawatamata, era na vakabau mera veiwekani kei na Kalou ena sala e lavotaki dina. Me kena ivakaraitaki, a vola oqo o Paula me baleta na ituvatuva i Jiova mera na ciqomi kina o ira era vakabauta, mera lewe ni nona vuvale: “Sa vakatakila [na Kalou] vei keda na nona lewa ka vuni tu, me vaka na ka e vinaka vua, ka sa nakita vakai koya ga: me yaco kina na ka sa lewa ko koya ni sa oti kecega na gauna sa lokuci me soqona vata na ka kecega vei Karisito, na veika mai lomalagi, kei na veika e vuravura.” (Efeso 1:9, 10) O Jisu Karisito e uto tiko ni “ka sa lewa” oqo na Kalou. Ena vuku i Karisito, eda vakarautaki kina na tamata ena veika me na vakadonui keda kina na Kalou. E dua na iwiliwili lailai e yalani na kedra levu e nodra inuinui mera na lai bula i lomalagi. Ia na iwiliwili levu ga e nodra inuinui na bula tawamudu e vuravura.

7. O cei o ira “na veika mai lomalagi”?

⁷ Tekivu sara ga ena Penitiko 33 S.K., era soqoni taumada “na veika mai lomalagi,” oqo o ira era na lai veiliutaki vata kei Karisito ena Matanitu vakalomalagi. E vakadonui ira na Kalou nira vakabauta na isoro i Jisu. (Roma 5:1, 2) Ni toso na gauna, sa ra vakadonui tale ga kei ira na Jiu o ira na kai matanitu tani, qai kedra iwiliwili taucoko “na veika mai lomalagi” e 144,000. (Kalatia 3:26-29; Vakatakila 14:1) Dua ga na kena vo vei ira oqori era se bula tiko e vuravura.

Soqoni “na Veika e Vuravura”

8. O cei o ira “na veika e vuravura,” ia e vakaevei tu na nodra veiwekani kei Jiova?

⁸ Ena lewa vata ga oya ni Kalou, era soqoni tale tiko ga kina “na veika e vuravura.” Era le vica vata na milioni era sa soqoni tiko nikua me rawa nira bula tawamudu ena vuravura. Era duavata kei ira na kena vo, era na lai veiliutaki ena Matanitu ni Kalou, ena nodra vakalagilagia na yaca i Jiova kei na nodra laveta cake na sokalou vua. (Aisea 2:2, 3; Sefanaia 3:9) Era kaya tale ga vei Jiova, “Tamaqu,” nira vakadinata ni o koya ga e vu ni nodra bula. Era vakadonui mera tu e matana nira vakabauta na dra i Jisu sa vakadavei. (Vakatakila 7:9, 14) Ia e se sega ga nira vakabau mera luve ni Kalou nira se tamata ivalavala ca tiko ga.

9. Na cava e yalataki tu vua na kawatamata ena Roma 8:21?

⁹ O ira era nuitaka na bula e vuravura era nanamaki vakalevu ina gauna me sa na ‘sereki me kua kina ni vakabobulataki tale ina rusa’ na kawatamata. (Roma 8:21) Ena qai tekivu na veisereki oya ni sa na tinia na veivakararawataki levu na Karisito kei na nona mataivalu vakalomalagi ena ivalu levu na Amaketoni. Sa na rusa kina na vuravura ca kece i Setani. Oti oya, sa na tekivu sara na veiliutaki totoka vakatui i Karisito ena Matanitu ni Kalou me duanaudolu na yabaki.​—Vakatakila 19:17-21; 20:6.

10. Na sere ni veivakacaucautaki cava era na lagata na dauveiqaravi i Jiova?

¹⁰ Sa dua dina na ka vakatubumarau nira sa na duavata na dauveiqaravi kece i Jiova e vuravura mera tokaruataka na veika vata ga era kacivaka ena reki na nona dauveiqaravi mai lomalagi, e vaka: “A ka levu ka veivakurabuitaki na nomuni cakacaka, na Turaga na Kalou Kaukauwa; sa dodonu ka dina na nomuni valavala, oi kemuni na Tui ni veigauna kecega. O cei me sega ni rerevaki kemuni, na Turaga, ka vakarokorokotaka na yacamuni? ni sai kemuni ga sa yalosavasava: ko ira kecega na veivanua era na lako mai ka cuva e matamuni; ni sa vakatakilai mai na nomuni cakacaka dodonu.” (Vakatakila 15:3, 4) Io, o ira kece na dauveiqaravi i Jiova era na duavata mera sokaloutaka na Kalou dina. O ira mada ga na mate era na vakaturi me rawa kina nira tauca tale ga vei Jiova na veivakacaucautaki.​—Cakacaka 24:15.

Tu Mai Liu na Bula Galala Vakatubuqoroqoro

11. Na bula galala vakatubuqoroqoro cava era na vakila o ira na bula yani ena veivakararawataki levu?

¹¹ Sa na sega tale ni qai “kalou ni vuravura oqo” o Setani na Tevoro ni sa na kau laivi na ca mai vuravura ena veivakararawataki levu kei na Amaketoni, na ivalu ena cava kina na veivakararawataki levu. Era na sega ni vakila tale tiko na sasaga torosobu i Setani o ira na sokaloutaki Jiova. (2 Korinica 4:4; Vakatakila 20:1, 2) Sa na sega tale ni vakarogorogocataki Jiova na lotu lasu se me vu ni veisei tale tiko vua na kawatamata. Sa na oti vakadua na nodra dau vakaisini na tamata ni Kalou vei ira na iliuliu vakatamata. Sa tu tu na bula galala vakatubuqoroqoro!

12. Era na sereki vakacava na tamata kece mai na ivalavala ca kei na vua ni ivalavala ca?

¹² Ena vakayagataka o Jisu na nona isoro me bokoca na noda ivalavala ca, ni o koya “na Lami ni Kalou, ko koya sa kauta tani na nodrai valavala ca na kai vuravura.” (Joni 1:29) Ni se bula e vuravura o Jisu, a dau nona ivalavala me vakabulai ira na tamata era tauvimate me ivakadei ni nona kaya vei ira ni sa vosoti na nodra ivalavala ca. (Maciu 9:1-7; 15:30, 31) Ena veivakabulai ena ivalavala vata ga oqori o Karisito Jisu ena nona itutu vakatui ena Matanitu ni Kalou mai lomalagi. Ena vakabulai ira na mataboko, na galu, didivara, lokiloki, o ira e tauvi ira tu na mate ni vakasama, se mate cava tale. (Vakatakila 21:3, 4) O ira kece era talairawarawa ena bokoci vei ira na ‘lawa ni ivalavala ca.’ O koya gona, e sa na oti na nodra dau vakasamataka na ca se na nodra dau caka ca, na ka a dau vakavurarawa vei ira eliu se vua na Kalou. (Roma 7:21-23, VV) Ena icavacava ni duanaudolu na yabaki, era sa na yacova na bula uasivi vakatamata mera itovo vata kina ra qai ucui koya tale ga na Kalou dina.​—Vakatekivu 1:26.

13. Ni sa na oti na duanaudolu na yabaki, na cava ena qai cakava o Karisito, ia na cava na kena itinitini?

¹³ Ni sa na oti na cakacaka i Karisito mera vukei na kawatamata mera yacova na bula uasivi, sa na qai vakasuka tale vua na Tamana na lewa a soli vua me baleta na itavi oqo: “Sa solia na matanitu ki vua na Kalou na Tamana ka sa vakawabokotaki ira oti na daulewa kece ga, na veiliutaki kece ga kei na kaukauwa. Ni sa na lewa tiko ga ko Karisito me yacova ni sa vakamalumalumutaki ira kece ga na nona meca na Kalou e na ruku ni yavana.” (1 Korinica 15:24, 25, VV) Sa na rawa vinaka na inaki e veiliutaki kina na Matanitu ni Kalou ena duanaudolu na yabaki; o koya gona, sa na sega ni gadrevi me dua tale tiko na veiliutaki me na toka ena kedrau maliwa o Jiova kei na kawatamata. Sa na sega tale ga ni gadrevi o Jisu me keda iVoli na kawatamata, nida sa na voli oti qai kau tani vakadua na ivalavala ca kei na mate. E kaya kina oqo na iVolatabu: “Sa na qai vakamalumalumutaki koya tale ga na Karisito vua na Kalou o koya sa vakamalumalumutaka na ka kece ga vei koya ga me lewa tiko kina na Kalou na veika kece ga.”​—1 Korinica 15:28, VV.

14. Na cava era na sotava na tamata kece era sa yacova na bula uasivi? Ena vuku ni cava?

¹⁴ Oti oya, sa na qai soli na gauna me vakadinadinataka kina na kawatamata uasivi se ra na via qarava na Kalou dina me tawamudu se sega. O koya gona, ni se bera ni wiliki ira vakadua na kawatamata uasivi o Jiova mera luvena, ena vakatara mada mera sotava na iotioti ni veivakatovolei. Ena sereki o Setani kei ira nona timoni mai na qara e sega ni vakabotona. Ke dua e lomani Jiova dina, ena sega ni vakaleqai koya oqo. O ira era tawayalodina ra qai talaidredre vei Jiova, era na vakarusai vakadua vata kei koya na dauveivorati taumada kei ira na nona timoni.​—Vakatakila 20:7-10.

15. Na itutu cava era sa na yacova tale o ira kece e bulia o Jiova mai lomalagi vaka kina e vuravura?

¹⁵ Ena iotioti ni veivakatovolei oya, o ira kece na tamata uasivi era tutaka ena yalodina na veiliutaki i Jiova e sa na qai wiliki ira o koya mera luvena. Mai na gauna oya me lako yani, sa ra na vakila na galala lagilagi dina era vakila ga na luve ni Kalou era lewe tiko ni nona matavuvale levu. Sa ra na duavata tale ena sokalou dina o ira kece e bulia na Kalou, mai lomalagi vaka kina e vuravura. Sa na vakayacori taucoko na inaki lagilagi i Jiova! Vakaevei o iko, o na via lewena na matavuvale mamarau oya ena tu ga me tawamudu? Ke vaka kina, mo vakasamataka sara vakabibi na ka e kaya na iVolatabu ena 1 Joni 2:17 (VV): “Sa takali tiko yani na vuravura kei na kena gagadre ca; ia ko koya ga sa vakayacora na loma ni Kalou sa tu dei ka tawa mudu.”

Railesuvi

• Ni se bera na veivorati mai Iteni, a vakacava tu na nodra veiwekani kei Jiova o ira kece era sokaloutaki koya?

• Na cava e nodra itavi na dauveiqaravi ni Kalou?

• O cei e se vo tiko mera na qai wili mera luve ni Kalou, ia e salavata vakacava oqo kei na inaki i Jiova me baleta na nodra vakaduavatataki na ka bula kece mera na sokalou vua?

[iYaloyalo ena tabana e 190]

O ira na tamata talairawarawa era na bula ena parataisi e roboti vuravura