O Cei O Maikeli na Agilosi Turaga?

E VICA ga na tikinivolatabu e tukuni koya na kabula vakayalo qo, na yacana o Maikeli. Ia na tikinivolatabu kece qo e tukuni koya ni dua e daucakacaka. Ena ivola i Taniela, eda wilika kina ni vala o Maikeli kei na so na agilosi ca. Ena ivola i Juta, e tukuna ni rau veileti kei Setani. E tukuni tale ga ena ivola na Vakatakila ni rau vala kei Setani kei na nona timoni. Ena nona totaka na veiliutaki i Jiova kei na nona vala kei ira na meca ni Kalou qo, e vakaraitaka kina o Maikeli ni ganiti koya vinaka na yacana, ni kena ibalebale, “O Cei e Tautauvata kei na Kalou?” Ia o cei o Maikeli?

Eso era cavuti ena iVolatabu e sega ni dua ga na yaca era vakatokai kina. Me kena ivakaraitaki, na peteriaki o Jekope e vakatokai tale ga me o Isireli; na yapositolo o Pita e kilai tale ga ena yaca Saimoni. (Vakatekivu 49:1, 2; Maciu 10:2) Na iVolatabu tale ga e vakaraitaka ni yaca, Maikeli, e dua na yaca e vakatokai kina o Jisu Karisito ni bera nona bula e vuravura, vaka kina ni sa lesu i lomalagi. Meda raica mada se tokona vakacava na vakasama qo na iVolatabu.

Agilosi Turaga. E vakamacalataki Maikeli na Vosa ni Kalou me “agilosi turaga.” (Juta 9) E sega ni tukuni ni o koya e dua vei ira na agilosi turaga, ia e kaya na iVolatabu ni o koya sara ga “na agilosi turaga.” E vakaraitaka qo ni dua ga na agilosi turaga. Na tikinivolatabu tale ga e tukuni koya na agilosi qo e cavuti kina o Jisu. Me kena ivakaraitaki, e kaya na 1 Cesalonaika 4:16 me baleta na Turaga o Jisu Karisito: “Ni na lako sobu mai lomalagi na Turaga qai veivakaroti ena domo ni agilosi turaga.” E tukuni tiko eke ni domo i Jisu ga na domo ni agilosi turaga. O koya gona, e vakaraitaka na tikinivolatabu qo ni o Jisu ga na agilosi turaga o Maikeli.

Turaganivalu. E kaya na iVolatabu ni “o Maikeli kei ira na nona agilosi era vala kei na gata levu . . . kei ira na nona agilosi.” (Vakatakila 12:7) E vakaraitaka qo ni liutaka tiko o Maikeli e dua na mataivalu era lewena tiko na agilosi yalodina. O Jisu tale ga e vakamacalataki ena Vakatakila ni liutaka tiko e dua na mataivalu era lewena na agilosi yalodina. (Vakatakila 19:14-16) Na yapositolo o Paula e cavuta tale ga “na Turaga o Jisu” kei ira “nona agilosi kaukaua.” (2 Cesalonaika 1:7) Kena ibalebale qo ni rau tukuni ruarua ena iVolatabu o Maikeli kei na “nona agilosi” vaka kina o Jisu kei na “nona agilosi.” (Maciu 13:41; 16:27; 24:31; 1 Pita 3:22) Ia e sega ni vakaraitaka na Vosa ni Kalou ni rua tiko na mataivalu mai lomalagi era lewena ruarua na agilosi yalodina—e dua e liutaka o Maikeli kei na dua e liutaka o Jisu. E macala gona ni o Maikeli e dua tale na yaca i Jisu Karisito ena nona itutu vakalomalagi.a