Na Cava na iTukutuku Vinaka?

1. Na cava na itukutuku mai vua na Kalou?

E vinakata na Kalou me marautaka na kawatamata na bula e vuravura. A bulia na vuravura kei na ka kece e tu kina ni lomani keda. Sa vakarau yavala na Kalou meda rawa ni marautaka na kawatamata na veika totoka ena veigauna se bera mai. Ena vakaotia na veika e vakavuna tiko na rarawa ni kawatamata.​—Wilika Jeremaia 29:11.

E se sega ni dua na matanitu e vakaotia na ivalavala voravora, tauvimate kei na mate. Ia e tiko na itukutuku vinaka. Na Kalou sa vakarau sosomitaki ira kece na matanitu vakatamata ena nona matanitu. O ira na talairawarawa ena matanitu ni Kalou era na vakacegu ra qai bulabula vinaka.​—Wilika Aisea 25:8; 33:24; Taniela 2:44.

2. Na cava e bibi kina nikua na itukutuku vinaka?

Ena qai oti ga na rarawa ni sa kauti ira laivi mai vuravura na tamata ca na Kalou. (Sefanaia 2:3) Ena yaco ninaica qori? E sa parofisaitaki tu ena Vosa ni Kalou na ituvaki e vakaleqa tiko na kawatamata nikua. Na leqa era yaco tu nikua e vuravura e dusia ni sa vakarau yavala na Kalou.​—Wilika 2 Timoci 3:1-5.

3. Na cava meda cakava?

E bibi meda vulica na ka me baleta na Kalou ena nona Vosa na iVolatabu. Na ivola qori e vaka na nona ivola e dua na tama dauloloma vei keda. E tukuna na sala meda marautaka kina na bula ena gauna qo kei na bula tawamudu e vuravura ena gauna se bera mai. E macala ga nira na sega ni taleitaka eso na nomu vukei mo kila na iVolatabu. Ia me kua ni vakataotaka qori na noda vulica na yalayala ni Kalou me baleta na veika totoka eda rawa ni marautaka ena gauna se bera mai.​—Wilika Vosa Vakaibalebale 29:25; Vakatakila 14:6, 7.