E Rawa Vakacava mo Toro Voleka Vua na Kalou?

1. E rogoca na Kalou na masu kece?

E sureti ira na tamata kece o Jiova mera toro voleka vua ena masu. (Same 65:2) Ia e sega ni rogoca se vakadonuya na masu kece. Kena ivakaraitaki, ena tarovi na nona masu na tagane e dau vakalolomataki watina. (1 Pita 3:7) A sega tale ga ni rogoca na Kalou na nodra masu na Isireli baleta nira sega ni muduka na nodra ivakarau ca. Qori e vakaraitaka me kua ni raici vakamamada na masu. Ia ke dua e cala bibi qai veivutuni dina, ena rogoca na Kalou na nona masu.​—Wilika Aisea 1:15; 55:7.

Sarava na vidio E Rogoca na Masu Kece na Kalou?

2. Meda masu vakacava?

Na masu e tiki ni noda sokalou, e dodonu gona meda masu ga vua na noda Dauveibuli o Jiova. (Maciu 4:10; 6:9) Nida ivalavala ca tale ga, e bibi meda masu ena yaca i Jisu ni a mate ena vuku ni noda ivalavala ca. (Joni 14:6) E sega ni vinakata o Jiova meda cavuta tiko ga na qaqanimasu e wiligusutaki se volai, ia e vinakata meda masu mai vu ni lomada.​—Wilika Maciu 6:7; Filipai 4:6, 7.

E rawa mada ga ni rogoca na noda Dauveibuli na masu lo. (1 Samuela 1:12, 13) E sureti keda meda masu e veigauna, kena ivakaraitaki ena mataka se nida vakarau moce, ena gauna ni kana, se gauna eda sotava kina na leqa.​—Wilika Same 55:22; Maciu 15:36.

3. Na cava era dau soqoni vata kina na lotu vaKarisito?

E sega ni rawarawa na noda toro voleka vua na Kalou nida maliwai ira era sega ni vakabauti koya ra qai vakasewasewana na nona yalayala me baleta na bula sautu e vuravura. (2 Timoci 3:1, 4; 2 Pita 3:3, 13) E bibi kina meda dau veivakayaloqaqataki nida veimaliwai kei ira eda vakabauta vata.​—Wilika Iperiu 10:24, 25.

Na noda veimaliwai kei ira era lomana na Kalou ena vukei keda meda toro voleka vua. Na nodra soqoni na iVakadinadina i Jiova e vanua vinaka me vakayaloqaqataki kina e dua ena nodra vakabauta eso tale.​—Wilika Roma 1:11, 12.

4. E rawa vakacava mo toro voleka vua na Kalou?

O rawa ni toro voleka vei Jiova ke o vakasamataka vakatitobu na ka o vulica ena nona Vosa. Vakananuma na ka o rawa ni vulica ena ka e cakava, nona ivakasala, kei na veika e yalataka. Nida masu qai vakasama vakatitobu, eda na rawa ni kila na levu ni nona loloma na Kalou kei na nona vuku.​—Wilika Josua 1:8; Same 1:1-3.

O na rawa ga ni toro voleka vua na Kalou ke o nuitaki koya, o vakabauti koya tale ga. Ia na vakabauta e vaka e dua na kabula e vinakati me vakani tiko ga. E dodonu mo vakania wasoma se mo vakaukauataka tiko ga na nomu vakabauta ni o railesuva na veika e yavutaki kina.​—Wilika Maciu 4:4; Iperiu 11:1, 6.

5. Ena yaga vakacava na nomu toro voleka vua na Kalou?

O Jiova e kauaitaki ira era lomani koya. E rawa ni taqomaki ira mai na veika ena vakaleqa na nodra vakabauta kei na nodra inuinui ni bula tawamudu. (Same 91:1, 2, 7-10) E vakasalataki keda ena veika e rawa ni vakaleqa na noda bula kei na noda marau. E vakavulici keda o Jiova ena ivakarau ni bula vinaka duadua.​—Wilika Same 73:27, 28; Jemesa 4:4, 8.