LESONI 4
Vakamarautaki Tamana kei Jiova
Cava e yalataka tiko vei Jiova o Jefica?
A dredre toka, ia e cakava o luvei Jefica na yalayala i tamana
O raica na goneyalewa ena iyaloyalo?— Qori na luvena e dua na turaga, na yacana o Jefica. E sega ni tukuni ena iVolatabu na yacana na goneyalewa qori, eda kila ga ni vakamarautaki tamana kei Jiova. Meda raica mada eso na ka me baleti rau na veitamani qo.
E turaga vinaka o Jefica, e dau vakavulici luvena me baleti Jiova. Ni turaga kaukaua qai iliuliu vinaka, era kerea kina na Isireli me liutaki ira nira vala kei ira na meca.
A masuta na veivuke ni Kalou o Jefica me qaqa. A yalataka o Jefica ke qaqa, na tagane se yalewa e mai veitavaki duadua e liu ni lesu i vale ena solia me nei Jiova. Ena lai vakaitikotiko volekata na valeniveitavaki ni Kalou qai veiqaravi kina ena nona bula taucoko. Na valeniveitavaki e dua na vanua e qaravi kina na Kalou ena gauna ya. A qaqa ena ivalu o Jefica! O kila o cei a mai tavaki koya duadua e liu ni lesu i vale?—
Io, na luvei Jefica! E dua ga na luvena, ia qo erau sa na veitalatala. Dua na ka nona rarawa o Jefica, ia sa yalayala oti o koya. Sega ni bera ni tukuna o luvena: ‘Ta, o sa yalayala oti vei Jiova, mo cakava sara.’
Era dau sikovi luvei Jefica e veiyabaki nona itokani
A rarawa tale ga na luvei Jefica ni na sega ni rawa ni vakawati se vakaluveni ena valeniveitavaki. Ia e vinakata me cakava na yalayala i tamana, me vakamarautaki Jiova tale ga. Qori e bibi cake mai na nona vakawati se vakaluveni. A mani biubiu e vale me lai tiko ena valeniveitavaki ena nona bula taucoko.
Vakacava e vakamarautaki tamana kei Jiova na ka e cakava?— Io! O na vakataki luvei Jefica ke o talairawarawa qai lomani Jiova. O na vakamarautaki rau tale ga nomu itubutubu kei Jiova.