Nuitaka na Kalou me Marautaki Kina na Bula Vakawati

A tauyavutaka na imatai ni vakawati na Kalou o Jiova.a E tukuna na iVolatabu ni a bulia na imatai ni yalewa na Kalou qai “kauti koya vei tagane.” Na levu ni nona marau o Atama a cavuta kina: “Qo sara ga na sui mai na suiqu kei na lewe mai na lewequ.” (Vakatekivu 2:22, 23) E se vinakata tiko ga o Jiova mera marau o ira na vakawati.

Gauna o vakawati kina, o na rairai nanuma ni na vinaka na ka kece. Ia se mani vakacava na levu ni nodrau veilomani o tagane kei yalewa, ena vakilai ena so na gauna na leqa. (1 Korinica 7:28) Ke o muria na ivakavuvuli vakaivolatabu ena ivola qo, ena rawa ni marautaki nomu vakawati kei na nomu vuvale.—Same 19:8-11.

1 DOKA NA ITAVI E LESIA VEI IKO O JIOVA

NA KA E TUKUNA NA IVOLATABU: E ulu ni vuvale na tagane vakawati.—Efeso 5:23.

Ke o tagane vakawati, nanuma tiko o Jiova e vinakata mo qaravi watimu vinaka. (1 Pita 3:7) O Jiova e bulia na yalewa me kemu isa vinaka, e vinakata gona mo dokai watimu, mo lomani koya tale ga. (Vakatekivu 2:18) Na levu ni nomu lomani watimu e dodonu mo tu vakarau kina mo vakaliuca na ka e vinakata, sega ni ka e baleti iko.—Efeso 5:25-29.

Ke o yalewa vakawati, nanuma tiko o Jiova e vinakata mo dokai watimu vakalevu, mo vukei koya tale ga me qarava vinaka nona itavi. (1 Korinica 11:3; Efeso 5:33) Mo duavata kei na vakatulewa e cakava, mo tokoni koya tale ga mai vu ni lomamu. (Kolosa 3:18) Ni o cakava qori, o na ka talei vei watimu kei na Kalou o Jiova.—1 Pita 3:1-6.

NA KA O RAWA NI CAKAVA:

• Tarogi watimu ena ka o rawa ni cakava mo dua kina na tagane se yalewa vakawati vinaka. Vakarogoci koya vinaka, qai cakava na veiveisau e vinakati

• Mo vosovoso. Ena taura toka na gauna mo drau vulica vakaveiwatini na ka mo drau cakava mo drau marau kina

2 KAUAITAKA DINA NA LOMA I WATIMU

NA KA E TUKUNA NA IVOLATABU: E dodonu mo kauaitaka na ka e baleti watimu. (Filipai 2:3, 4) Mo vakamareqeti watimu, ena nomu nanuma tiko ni vinakata o Jiova mera “yalomalua . . . vei ira kece” na tamata na nona dauveiqaravi. (2 Timoci 2:24) “Na vosa vakalialia e vaka na isua ni iseleiwau, ia na yamedra na vuku e veivakabulai.” Digia gona vakavinaka na vosa o cavuta. (Vosa Vakaibalebale 12:18) Na yalo tabu i Jiova ena vukei iko mo vosa ena yalovinaka kei na loloma.—Kalatia 5:22, 23; Kolosa 4:6.

NA KA O RAWA NI CAKAVA:

• Ni bera ni drau veivosakitaka vakaveiwatini eso na ka bibi, masuta na veivuke i Jiova mo rawa ni tauri iko vakamalua, me tiko tale ga vei iko na rai donu

• Vakasamataka vinaka na ka mo tukuna kei na kena itukutukuni

3 ME DUAVATA NOMUDRAU RAI

NA KA E TUKUNA NA IVOLATABU: Gauna o sa vakawati kina, o sa “lewe dua” kei watimu. (Maciu 19:5) Ia nanuma, drau se lewe rua tiko, ena rawa ni duidui tale ga nomudrau rai. E vinakati gona mo vulica me duavata nomudrau vakasama kei na ivakarau ni lomamudrau. (Filipai 2:2) E bibi na duavata ni drau vakarau vakatulewa. E tukuna na iVolatabu: “Ena rawa na sasaga ni veivosakitaki.” (Vosa Vakaibalebale 20:18) Me dusimaki iko na ivakavuvuli vakaivolatabu ni drau vakatulewataka tiko na veika bibi.—Vosa Vakaibalebale 8:32, 33.

NA KA O RAWA NI CAKAVA:

• Kua ni vakasavuya ga na itukutuku, talaucaka vei watimu na lomamu

• Ni bera ni o vakatulewa, tukuna rawa vei watimu