iKuri

Vei Kemuni na iTubutubu Lotu vaKarisito:

Ni o dua na itubutubu, o na via vukei luvemu me lomani Jiova, me yalataki koya tale ga vua. O na vukei koya vakacava me papitaiso? O na kila vakacava ni sa rawa ni papitaiso?

E vakaroti ira na nona imuri o Jisu: “Moni vakavulici ira na lewe ni veivanua kece ga mera tisaipeli, ni papitaisotaki ira.” (Maciu 28:19) E tukuni ena tikinivolatabu qo na ka e vinakati me papitaiso kina, oya me tisaipeli. Me kua wale ga ni kila na ivakavuvuli i Karisito, me muria sara ga. Qo na ka e rawa mada ga nira cakava na gone lalai.

Mo ivakaraitaki vinaka vei luvemu, mo tugana e lomana na ivakavuvuli i Jiova. (Vkru. 6:6-9) Mo vakayagataka na ivola Marau me Tawamudu! me kila kina na yavu ni ivakavuvuli vakaivolatabu, me vakasamataka, me muria tale ga. Vukei koya me vakamacalataka nona vakabauta ena nona vosa ga. (1 Pita 3:15) Na ka o vakavulici koya kina, nomu veiuqeti, nona vuli vakataki koya, na sokalou vakavuvale, na soqoni vakaivavakoso, kei na itokani vinaka ena uqeti koya me papitaiso, me toso tiko ga vakayalo. Uqeti koya me sauva eso na isausau vakayalo.

E kaya na Vosa Vakaibalebale 20:11: “E kilai na gone ena ka e cakava, e savasava se dodonu na nona ivalavala.” O na kila vakacava ni sa dua na tisaipeli i Jisu Karisito, e tu vakarau tale ga me papitaiso?

Na gone e via papitaiso e dodonu me talairawarawa vei rau nona itubutubu. (Caka. 5:29; Kolo. 3:20) E kaya na iVolatabu me baleti Jisu ni sa yabaki 12: ‘E talairawarawa tiko ga vei rau na nona itubutubu.’ (Luke 2:51) O na sega ni namaka me uasivi o luvemu. Ia o koya e via papitaiso ena saga me muria na ivakaraitaki i Jisu, ena kilai tale ga ni dau talairawarawa vei rau nona itubutubu.

Ena taleitaka tale ga na ka dina ena iVolatabu. (Luke 2:46) Vakacava e dau taleitaka me tiko ena soqoni me vakaitavi tale ga? (Same 122:1) E taleitaka me wilika wasoma na iVolatabu qai vuli vakataki koya?—Maciu 4:4.

Na gone e via papitaiso ena vakaliuca na Matanitu ni Kalou. (Maciu 6:33) Ena raica vakabibi na nona itavi me vakamacalataka nona vakabauta. Ena vakaitavi ena dui taba ni cakacaka vakaitalatala, ena sega ni madua ni vakaraitaka vua na nona qasenivuli se o ira na vuli vata ni iVakadinadina i Jiova. Ena kauaitaka vakabibi na nona itavi ena Soqoni ni Bula vaKarisito kei na Cakacaka Vakaitalatala.

Ena saga tale ga me savasava tiko ga na nona itovo ni qarauna na ilala ca. (Vkai. 13:20; 1 Kor. 15:33) Ena laurai qo ena ivakatagi e digia, iyaloyalo, porokaramu ena tivi, qito ena vidio, kei na Internet.

Levu na itabagone era muria na nodra veivakavulici na itubutubu, era saga me nodra na dina ra qai papitaiso. Me vakalougatataka mada ga o Jiova nomu sasaga me rawata o luvemu na ikalawa bibi qo ena nodrau veiwekani kei Jiova.

Vei Kemuni na Dautukutuku Bera ni Papitaiso:

E ka dokai dina me dua e dautukutuku bera ni papitaiso. O vakacaucautaki ena nomu toso vakayalo. O sa mai kila na Kalou ni o vulica na nona Vosa, o vakabauta tale ga na nona vosa ni yalayala.—Joni 17:3; Iper. 11:6.

Ni bera ni o vuli iVolatabu kei ira na iVakadinadina i Jiova, o rairai lewena e duatani na lotu se o sega sara ga ni lotu. Se o vakaitavi ena so na ka e veisaqasaqa kei na ivakavuvuli vakaivolatabu. Ia qo o sa vakaraitaka ni o vakabauta na ka o vulica ni o veivutunitaka na veika ca o dau vakayacora. O sa vakaraitaka tale ga na nomu vakabauta ni o sa veisau, ena nomu cata na sala ca o muria o qai guta mo vakayacora na ka e dodonu ena mata ni Kalou.—Caka. 3:19.

De dua o kila na iVolatabu ni o se “gone dramidrami,” o cata kina na itovo sega ni vaKarisito se na cala bibi. (2 Tim. 3:15) O sa vulica mo valuta na veimurimuri kei na veitemaki. O vakaraitaka na nomu vakabauta ni o tutaka na sokalou dina qai vakamacalataka na ka o vakabauta. O vakavulici ena cakacaka vakaitalatala. O sa vakatulewataka qo mo qaravi Jiova mo dautukutuku bera ni papitaiso.

Ke o mani kilai Jiova ni o se gone dramidrami se o qai kilai koya ga qo, kena irairai ni rua na ikalawa o vakanamata kina ena nomu toso vakayalo, nomu yalayala kei na papitaiso. O yalataki iko vei Jiova ena nomu torovi koya ena masu, o vakaraitaka vua nomu vakatulewa mo qaravi koya vakatabakidua me tawamudu. (Maciu 16:24) O na qai vakaraitaka e matanalevu na nomu yalayala ni o tabadromuci ena wai. (Maciu 28:19, 20) Ena nomu yalayala kei na papitaiso, o sa italatala ni Kalou o Jiova. Qo e dua dina na ka dokai!

Ia me vaka o vulica ena iVolatabu, o na sotava e levu na ka dredre. Nanuma tiko ni papitaiso oti ga o Jisu, e “dusimaki Jisu na yalo tabu me lako cake ina vanua talasiga, e qai temaki koya e keri na Tevoro.” (Maciu 4:1) Mo namaka tale ga mo vakatovolei ni o papitaiso mo tisaipeli i Karisito. (Joni 15:20) Levu na sala o rawa ni vakatovolei kina. Rawa ni ratou tusaqati iko mai vale. (Maciu 10:36) Era na rairai vakasewasewani iko o ira oni vuli vata, cakacaka vata, se o ira na nomu ilala e liu. Ia kua sara ni guilecava na vosa i Jisu ena Marika 10:29, 30: “Au tukuna vakadodonu vei kemudou, e sega ni dua e biuta na vale se tacina se ganena se tamana se tinana se luvena se tikiniqele ena yacaqu kei na itukutuku vinaka me na sega ni soli vua e 100 vakacaca ena gauna qo—na vale, na tacina, na ganena, na tinana, na luvena, na tikiniqele, na veivakararawataki—ena bula tawamudu ena gauna se bera mai.” O koya gona, saga tiko ga mo toro voleka vei Jiova, mo muria tale ga na ivakarau ni bula savasava e vinakata.

Ke o via papitaiso, tukuna vua na kodineita ni ilawalawa qase. Eratou na veivosakitaka vata kei iko na taro ni via papitaiso me macala kina o sa rawa ni papitaiso se sega. O rawa ni vulica na taro qo ena nomu vuli vakataki iko.

Ni o vakavakarau, saga mo wilika qai vakasamataka na tikinivolatabu kece e lavetaki. O rawa ni vola eso na tikina bibi ena ivola qo se so tale na drauniveva. Ni o veivosaki kei ratou na qase, o rawa ni vakayagataka na ka o vola, o rawa ni dolava tale ga na nomu ivola. Ke dredre mo kila e dua na taro, taroga vei koya drau vuli iVolatabu tiko se dua vei ratou na qase.

Ni o veivosaki kei ratou na qase, me kua ni balavu se vereverea na nomu isaunitaro. Ena vinaka sara ke o sauma ga vakadodonu, vakalekaleka ena nomu vosa ga. Levu na taro ena vinaka mo yavutaka na kena isau ena dua se rua na tikinivolatabu.

Ke o sega ni kila vinaka na yavu ni ivakavuvuli ena iVolatabu, eratou na tuvanaka na qase me dua e tuberi iko me rawa ni o vakamacalataka ena nomu vosa ga na ivakavuvuli dina vakaivolatabu. De dua o na qai rawa ni papitaiso ena dua tale na gauna.

[Vei ira na qase ni ivavakoso: Na idusidusi ni nodra tarogi na via papitaiso e tiko ena tabana e 208-212.]