O Jisu na Mesaia

E dau vunautaka o Joni: ‘E lako tiko mai e dua e uasivi au.’ Ni sa via yabaki 30 o Jisu, e biuti Kalili qai lako ina uciwai na Joritani, e veipapitaisotaki tiko kina o Joni. E vinakata o Jisu me papitaiso, ia e kaya o Joni: ‘E sega ni dodonu meu papitaisotaki kemuni. Dodonu ga moni papitaisotaki au.’ E kaya vua o Jisu: ‘E vinakata o Jiova mo papitaisotaki au.’ Rau mani siro ina uciwai na Joritani qai tabadromuci Jisu e wai.

Ni lamata mai wai o Jisu, e masu sara. E tadola na lomalagi qai lako sobu mai vua na yalo tabu me vaka na ruve. E tukuna mai lomalagi o Jiova: “O iko na luvequ lomani; au vakadonui iko.”

E Mesaia se Karisito o Jisu ena gauna sara ga e sobuti koya kina na yalo tabu. Sa na tekivu cakava na ka e talai koya mai kina o Jiova e vuravura.

Ni papitaiso oti ga o Jisu, e lako sara ina vanua talasiga, e tiko e kea me 40 na siga. Oti e lesu me lai raici Joni. Ni lako tiko yani o Jisu, e kaya o Joni: ‘Qo na Lami ni Kalou ena kauta tani nodra ivalavala ca na kai vuravura.’ E tukuna qori mera kila kina na lewenivanua ni o Jisu na Mesaia. O kila na ka e yacovi Jisu ni tiko ena vanua talasiga? Meda raica mada.