Vakaturi o Jisu

Ni sa mate o Jisu, e kerei Pailato o Josefa, e dua na turaga vutuniyau me kauta sobu mai na yagona. E ologa ena isulu lineni vakaisaluaki, oti e lai vakadavora sara ena dua na ibulubulu vou. E qai vaqiqica e dua na vatu levu ena kena icurucuru. Era tukuna na iliuliu ni bete vei Pailato: ‘Keimami leqataka de ra kauta na yago i Jisu eso na nona tisaipeli ra qai tukuna ni sa bula tale.’ E mani tukuna vei ira o Pailato: ‘Ni dregata na ibulubulu, me yadravi tale ga.’

Ni kida na mataka ena ikatolu ni siga, eratou gole ina ibulubulu e vica na marama, ratou raica sara ni sa vaqiqici tani na kena vatu. E vosa vei ratou e dua na agilosi ena loma ni ibulubulu, e kaya: ‘Dou kua ni rere. Sa vakaturi o Jisu. Tukuna vei ratou na tisaipeli me ratou lai sotavi koya i Kalili.’

E lako sara o Meri Makitala vei rau o Pita kei Joni. E tukuna vei rau: ‘Dua sa kauta na yago i Jisu!’ Erau cici lesu rau qai raica ni sa lala tu na ibulubulu, rau mani lesu ina nodrau vale.

Ni lesu ina ibulubulu o Meri, e raica e loma e rua na agilosi, e kaya vei rau: ‘Au sega ni kila na vanua era kauta kina na yago i noqu Turaga.’ Oti e raica sara e dua na tagane, e nanuma ni dausasamaki, e kaya vua: ‘Kemuni, yalovinaka ni tukuna mai na vanua oni kauti koya kina.’ E tukuna na tagane, “Meri!” E kila sara ni o Jisu. E kailavaka: “Qasenivuli!” oti e tarai koya yani. E kaya vua o Jisu: ‘Lai tukuna vei ratou na taciqu ni o sa raici au.’ E cici sara o Meri me lai tukutuku vei ratou na tisaipeli.

Ena siga vata qori, erau biubiu mai Jerusalemi e rua na tisaipeli, erau lako tiko i Emeo. E tomani rau e dua na tagane e gaunisala, e taroga se cava rau veitalanoataka tiko. Erau kaya: ‘O se sega ni rogoca? Era vakamatei Jisu na iliuliu ni bete ena tolu na siga sa oti. Era tukuna eso na marama ni sa bula tale!’ E taroga na tagane: ‘Drau vakabauti ira na parofita? Era kaya ni dodonu me mate na Karisito qai vakaturi.’ E vakamacalataka tiko ga vei rau na iVolatabu. Ni ratou yaco i Emeo, rau sureti koya sara i vale. Ni masulaka na madrai ena ivakayakavi, erau qai kila ni o Jisu. Oti e yali tale.

Erau vakatotolo sara i Jerusalemi na tisaipeli ina vale ratou tiko kina na yapositolo, rau tukuna sara na ka e yaco. E qai rairai kece vei ratou o Jisu ni ratou tiko e lomanivale. Ratou sega ni vakabauta ni o koya, mani kaya vei ratou o Jisu: ‘Raica na ligaqu, dou tarai au mada. E volai ni na vakaturi mai na mate o Karisito.’