Kau i Roma o Paula

E vesu o Paula e Jerusalemi, e mai cava tale ga e keri na ikatolu ni nona ilakolako vakavunau. Ni raivotu ena dua na bogi, e tukuna vua o Jisu: ‘O na lako i Roma mo vunau kina.’ A kau o Paula mai Jerusalemi i Sisaria, e rua na yabaki nona tiko e valeniveivesu. Ni lewai koya o Kovana Fesito, e kaya o Paula: ‘Au vinakata me rogoci au o Sisa mai Roma.’ E kaya o Fesito: “O kerea me rogoci iko tale o Sisa, o sa na kau vei Sisa.” E mani vodo o Paula ena dua na waqa e soko i Roma, rau tomani koya e rua na lotu vaKarisito, o Luke kei Arisitako.

Nira soko tiko, e qai labati ira e dua na cagi kaukaua me vica vata na siga. Era nanuma ga nira na mate. Ia e kaya o Paula: ‘Raveiwekani, e tukuna vei au e dua na agilosi ena tadra: “Kua ni rere Paula. O na yaco i Roma, era na bula tale ga na tiko e waqa.” Ni yaloqaqa! Eda na sega ni mate.’

E laba tiko na cagi me 14 na siga. Oti e votu sara e dua na yanuyanu, na yanuyanu o Melita. E kasa na waqa qai kakaseresere, ia era cabebula i vanua na 276 na lewe ni waqa. Eso era qalo, eso tale era vakayagataka na tiki ni kau ni waqa me nodra iqaloqalo. O ira na lewe i Melita era kauaitaki ira na lewe ni waqa, era vakawaqa buka tale ga mera vakatakatai kina.

Oti e tolu na vula, era kauti Paula i Roma na sotia ena dua tale na waqa. Ni yaco yani, era mai tavaki koya na mataveitacini. E vakavinavinakataki Jiova ni raici ira, e vakayaloqaqataki tale ga. E vesu o Paula ia e vakadonui me tiko ena dua na vale saumi ni yadravi koya e dua na sotia. A tiko e kea me rua na yabaki. Nira lai sikovi koya eso, e vunautaka vei ira na Matanitu ni Kalou, e vakavulici ira ena itukutuku me baleti Jisu. E dau volavola tale ga ina ivavakoso e Esia Lailai kei Jutia. A vakayagataki koya o Jiova me vunautaka na itukutuku vinaka ina veimatanitu.