Ka e Vakatakilai Vei Joni

Ni vesu tiko na yapositolo o Joni ena yanuyanu o Patimo, e vakaraitaka vua o Jisu e 16 na raivotu se iyaloyalo ni ka ena vakarau yaco ena dua na gauna mai liu. E laurai ena raivotu qo na kena vakarokorokotaki na yaca i Jiova, na yaco mai ni nona Matanitu, kei na caka ni lomana e vuravura me vaka e caka tiko mai lomalagi.

Ena dua na raivotu, e raica o Joni ni dabe tiko o Jiova ena nona idabedabe vakaturaga mai lomalagi, era wavokiti koya tu na 24 na qase nira vakaisulu vulavula, era vakaisalanitui koula. E lako mai na idabedabe vakaturaga na liva, e rogo na domo kei na kurukuru. Era cuva e mata i Jiova na 24 na qase mera sokalou vua. Ena dua tale na raivotu, e raica o Joni e dua na isoqosoqo levu era sokaloutaki Jiova, era lako mai na veimatanitu kece, veimatatamata, kei na duivosavosa. E vakatawai ira na Lami, ya o Jisu, e kauti ira tale ga ina wai ni bula. Oti, ena dua tale na raivotu, sa veiliutaki mai lomalagi o Jisu, era tomani koya na 24 na qase. Ena raivotu tarava, e raica o Joni ni vala o Jisu kei na gata o Setani, kei ira nona timoni. Era qai kolotaki sobu mai vuravura.

Oti e raica o Joni na totoka ni kena irairai na Lami, kei ira na le 144,000 nira tu e Ulu i Saioni. E raica tale ga e dua na agilosi ni veivukayaki tiko e vuravura, e tukuna vei ira na lewena mera rerevaka na Kalou, mera vakalagilagi koya.

Na raivotu tarava e baleta na ivalu na Amaketoni. E vakadrukai Setani kina kei na nona vuravura o Jisu kei na nona mataivalu. Na iotioti ni raivotu, e raica o Joni nira sa duavata mai lomalagi kei vuravura. Sa vakarusai vakadua o Setani kei ira nona kawa. Era sokalou duadua ga vei Jiova o ira mai lomalagi kei vuravura, era doka tale ga na yacana.