LESONI 30
Era na Bula Tale na Mate!
Na mate e vakavuna na rarawa kei na lolosi. Oya na vuna e tukuna kina na iVolatabu ni keda meca. (1 Korinica 15:26) Ena Lesoni 27, eda vulica ni o Jiova ena vakamalumalumutaka na meca qori. Ia vakacava o ira sa mate? Ena lesoni qo, o na vulica kina e levu tale na yalayala totoka i Jiova. Ena vakabulai ira tale na vica na bilioni mera marautaka na bula tawamudu. Ena vakaturi ira kece. Ena yaco dina qori? Era na vakaturi mera bula i lomalagi se vuravura?
1. Na cava e via cakava o Jiova vei ira na wekada lomani era sa takali?
E vinakata sara ga o Jiova me vakabulai ira na mate. Na turaga yalodina o Jope e nuidei ni na sega ni guilecavi koya na Kalou ena gauna e mate kina. E kaya o Jope vua na Kalou: “Oni na kaci mai, au na rogo yani [mai na iBulubulu].”—Wilika Jope 14:13-15.
2. Eda kila vakacava nira na vakaturi na mate?
Ni se bula e vuravura o Jisu, e solia vua na Kalou na kaukaua me vakaturi ira na mate. E vakabula tale e dua na goneyalewa yabaki 12 kei na luvena tagane e dua na yada. (Marika 5:41, 42; Luke 7:12-15) Ni oti ya, e mate na itokani i Jisu o Lasarusa. Sa va na siga nona tu ena ibulubulu o Lasarusa, ia e vakabulai koya tale o Jisu. Ni masu oti vua na Kalou o Jisu, e qai kailavaka ena ibulubulu: “Lasarusa lako mai tuba!” E mani “lako mai tuba na tagane a mate” tu—sa bula tale! (Joni 11:43, 44) Dua na ka nodra marau na vuvale i Lasarusa kei ira na itokani!
3. Na cava ena yaco vei ira na wekamu lomani era sa mate?
E yalataka na iVolatabu: “Nira na vakaturi.” (Cakacaka 24:15) Era sega ni gole i lomalagi o ira e vakabula o Jisu ena gauna sa oti. (Joni 3:13) Era marautaka nira bula tale e vuravura. Sa voleka tale ga qo me vakaturi ira na vica na bilioni o Jisu mera marautaka na bula tawamudu ena vuravura parataisi. E kaya ni o ira kece na “tu ena ibulubulu nanumi” era na vakaturi, wili kina o ira eda sa rairai guilecava, ia e nanumi ira vinaka tu na Kalou.—Joni 5:28, 29.
VAKEKELI
Raica na ivakadinadina mai na iVolatabu ni o ira na mate e rawa nira vakaturi. Raica na sala e veivakacegui kina na veivakaturi, ena dei tale ga kina na nomu inuinui.
4. E vakadeitaka o Jisu ni rawa ni vakaturi ira na mate
Vulica e levu tale na ka e cakava o Jisu vua nona itokani o Lasarusa. Wilika Joni 11:14, 38-44, qai veivosakitaka na taro qo:
Eda kila vakacava ni a mate dina o Lasarusa? —Raica na tikina e 39.
Ke bula e lomalagi o Lasarusa, o nanuma ni na kauti koya tale mai o Jisu e vuravura?
5. Levu era na vakaturi!
Wilika Same 37:29, qai veivosakitaka na taro qo:
Era na bula e vei na vica na bilioni era na vakaturi?
E levu ena vakaturi ira o Jisu, wili kina o ira na sega ni qaravi Jiova. Wilika Cakacaka 24:15, qai veivosakitaka na taro qo:
O cei o na via sotava ena gauna ni veivakaturi?
Vakasamataka mada qo: Me vaka ga nona vakayadrati luvena e dua na tama, e va tale ga qori nona vakaturi ira mai na mate o Jisu
6. Ena vakacegui iko na veivakaturi, ena solia tale ga na inuinui
Na italanoa vakaivolatabu ni luvei Jairo yalewa e vakayaloqaqataki ira e levu era lolosi tu, e vakacegui ira tale ga. Wilika na italanoa dina qori ena Luke 8:40-42, 49-56.
Ni bera ni vakabula na luvei Jairo yalewa o Jisu, e kaya o Jisu vei Jairo: “Kua ni lomaleqa, mo vakabauta ga.” (Raica na tikina e 50.) Ena vukei iko vakacava na inuinui ni veivakaturi ni . . .
takali e dua o dau lomana?
leqataki nomu bula?
Sarava na VIDIO, qai veivosakitaka na taro qo.
E vakacegui rau vakacava na itubutubu nei Phelicity na inuinui ni veivakaturi?
KA ERA KAYA ESO: “Sega ni macala ena yaco dina na veivakaturi se sega.”
Cava o nanuma?
Na tikinivolatabu cava o rawa ni vakayagataka mo vakadeitaka ni na yaco dina na veivakaturi?
KA O VULICA
E yalataka na iVolatabu nira na vakaturi na vica na bilioni era sa mate. E vinakata o Jiova mera bula tale. E solia vei Jisu na kaukaua me veivakaturi.
Railesuvi
Na cava na nodrau rai o Jiova kei Jisu me baleta nodra vakaturi na mate?
Era na bula e vei na vica na bilioni era na vakaturi, e lomalagi se e vuravura? Cava o kaya kina qori?
O vakadeitaka vakacava nira na bula tale na wekamu lomani era sa mate?
IKURI
Vulica na ka mo cakava mo vosota kina nomu lolosi.
E rawa ni veivuke na ivakavuvuli vakaivolatabu vei ira na lolosi?
Era na vosota vakacava na gone ni mate e dua na wekadra voleka?
Vakacava ena vakaturi e dua me lai bula e lomalagi? O cei ena sega ni vakaturi?