E Dodonu me Tiko na iSoqosoqo i Jiova

O SA bau rogoca ni kaya e dua, “Au vakabauta na Kalou, ia au na sega ga ni lewena e dua na isoqosoqo lotu”? E dau vaka oqori na nodra vosa o ira na dau guta na lotu e liu, ia e qai vakayalolailaitaki ira na kena sega ni vakacegui ira rawa na nodra lotu ena ka era gadreva vakayalo. E dina ni levu era sa sega ni qai vakabauta e dua na isoqosoqo lotu, ia era se vinakata tiko ga mera qarava na Kalou. Era vakabauta ni vinaka cake mera qarava na Kalou ena kena iqaraqaravi ga era vinakata, mera kua ga ni lewena e dua na lotu se isoqosoqo.

Na cava e kaya na iVolatabu? E vinakata beka na Kalou mera lewe ni dua na isoqosoqo na lotu Vakarisito?

E Yaga Vei Ira na Lotu Vakarisito Taumada na iSoqosoqo

Ena Penitiko ni 33 S.K., e sovaraka kina o Jiova na yalona tabu, e sega ni sovaraka vei ira na tamata era dui qaravi kalou tu ga vakataki ira, e sovaraka ga ina dua na ilawalawa tagane kei na yalewa era soqoni vata mai “e na dua na tikina,” oya ena dua na tabavale e cake ena koro o Jerusalemi. (Cakacaka 2:1) E tauyavu ena gauna oya na ivavakoso vakarisito, e qai yaco e muri na isoqosoqo oqo me roboti vuravura. Oqo e vu ni veivakalougatataki dina vei ira na tisaipeli taumada. Ena vuku ni cava? Dua mada ga ena kena vakacolati vei ira e dua na ilesilesi bibi​—oya mera vunautaka na itukutuku vinaka ni Matanitu ni Kalou me tetevi “vuravura taucoko.” (Maciu 24:14) Ena ivavakoso, e rawa nira vulica na tavuki vou mai na iwalewale ni cakacaka vakavunau vei ira na tacidra lotu Vakarisito.

Sega ni dede sa tete yani na itukutuku ni Matanitu ni Kalou ina taudaku ni bai kei Jerusalemi. Mai na 62 S.K. ina 64 S.K., a vola kina na yapositolo o Pita na imatai ni nona ivola vei ira na lotu Vakarisito era “sa dui se ki Ponito, ki Kalatia, ki Kapatosia, ki Esia, kei Picinia,” na vanua era tiko e Taki ena gauna oqo. (1 Pita 1:1) Ra tiko tale ga na vakabauta na ivakavuvuli vakarisito mai Palesitaina, Lepanoni, Siria, Saipurusi, Kirisi, Kiriti, kei Itali. Me vaka e vola o Paula vei ira mai Kolosa ena 60-61 S.K., sa “vunautaki vei ira na tamata kecega sa tiko e ruku i lomalagi” na itukutuku vinaka.​—Kolosa 1:23.

E dua tale na yaga ni nodra lewena e dua na isoqosoqo oya na nodra rawa ni vakayaloqaqataki ira e so tale na lotu Vakarisito. Ni lewe ni ivavakoso e dua na lotu Vakarisito, ena rogoca na vunau veivakauqeti, ena vulica na iVolatabu vata kei ira na vo ni lewe ni ivavakoso, ena vulica vei ira na tani e so na itukutuku ni ka era sotava e veivakayaloqaqataki, ena dau masu vata tale ga kei ira na nona itokani vakabauta. (1 Korinica, wase e14) O ira tale ga na tagane matua era na ‘vakatawa na qelenisipi ni Kalou.’​—1 Pita 5:2.

Nira lewe ni ivavakoso, era lai veikilai kina vakataki ira na lotu Vakarisito, era veilomani tale ga. E sega ni icolacola vei ira na lotu Vakarisito taumada na nodra a lewe ni ivavakoso, era vakayaloqaqataki ga, era vakaukauataki kina.​—Cakacaka 2:42; 14:27; 1 Korinica 14:26; Kolosa 4:​15, 16.

E dua tale na vuna e dodonu me tiko kina na isoqosoqo i Jiova oya me vakatetea na duavata. Era vulica na lotu Vakarisito ‘me duavata ga na ka era kaya’ (1 Korinica 1:10) E bibi oqo. Baleta ni duidui na ivakatagedegede ni vuli kei na ivakarau ni bula era cavutu mai kina na lewe ni ivavakoso. E duidui na nodra vosa, qai macala ni duidui tale ga na nodra itovo. (Cakacaka 2:​1-11) Ena so na gauna, e duidui ga na rai ni lotu Vakarisito yadua. Ia, era vukei na lotu Vakarisito mera walia na duidui vaka oqori ena loma ga ni ivavakoso.​—Cakacaka 15:​1, 2; Filipai 4:​2, 3.

Na veika bibi era sega ni walia rawa na qase ni ivavakoso yadua e sa qai dau vakaraitaki vei ira na ivakatawa dauveilakoyaki, me vakataki Paula. Na veika bibi sara e vauca na ivakavuvuli e dau vakaraitaki sara ina dua ga na ilawalawa dauvakatulewa e tiko mai Jerusalemi. Ni tauyavu na ilawalawa dauvakatulewa oqo, eratou a lewena na yapositolo i Jisu Karisito, oti sa ra qai okati tale ga kina na qase ni ivavakoso mai Jerusalemi. Na ivavakoso yadua e doka na lewa vakalou e vakacolati ina ilawalawa dauvakatulewa kei ira na kena mata ena vakarautaki ni cakacaka vakaitalatala, ena nodra lesi na qase mera veiqaravi, kei na vakatulewataki ni ka e baleta na ivakavuvuli vakaivolatabu. Ni walia na ilawalawa dauvakatulewa e dua na ka a veiletitaki, era sa qai ciqoma na vakatulewa na veivavakoso, ra qai “reki e na vuku ni veivakacegui.”​—Cakacaka 15:​1, 2, 28, 30, 31.

Io, a vakayagataka o Jiova e dua na isoqosoqo ena imatai ni senitiuri. Vakacava ena gauna oqo?

E Dodonu me Tiko na iSoqosoqo Ena Gauna Oqo

Me vakataki ira ga na lotu Vakarisito ena imatai ni senitiuri, o ira na iVakadinadina i Jiova ena gauna oqo era taura vakabibi na nodra ilesilesi mera vunautaka na itukutuku vinaka ni Matanitu ni Kalou. E dua na sala era vakayacora kina oqo na nodra veisoliyaka na iVolatabu kei na ivoladusidusi vakaivolatabu e so​—na ka ena sega ni vakayacori rawa ke sega na isoqosoqo.

E dodonu mera vakarautaki vinaka na ivola vakaivolatabu, mera dikeva na kenadau me kua ni laurai kina na cala, me taba, me qai vakau ina veivavakoso. Oti oya mera na bole tale ga na lotu Vakarisito yadua mera kauta na ivola vei ira na via wilika. Ena sala oqo, sa yacovi ira kina e vica vata na milioni na itukutuku ni Matanitu ni Kalou. O ira na dau kacivaka na itukutuku vinaka era saga mera vakayacora na nodra cakacaka ena dua na kena ituvatuva vinaka, me kakua kina ni cakacakataki vakasivia e so na nodra yalava qai tarai vakavudua e so tale. Na ka oqo ena rawati ga ke tiko na isoqosoqo me tuvanaka vakamatau.

Ni “sega ni dau vakaduiduitaka na tamata na Kalou,” sa dodonu kina me vakadewataki na iVolatabu kei na ivola vakaivolatabu. (Cakacaka 10:​34, VV) Ena gauna mada ga oqo, na ivola oqo e sa rawa ni wiliki ena 132 na vosa, na kena ikarua na Yadra! e sa taba tiko ena 83 na vosa. Oqo ena vinakati kina na vakarautaki ni dau vakadewa ena veiyasa i vuravura.

Era vakayaloqaqataki tale ga na lewe ni ivavakoso nira tiko ena soqoni vakarisito kei na soqo lelevu. Era lai rogoca e kea na vunau vakaivolatabu e veivakauqeti, era vulica vata na iVolatabu, ra veivakauqeti ena itukutuku ni veika e yacovi ira, ra duavata tale ga kei ira nodra itokani vakarisito ena masu. Me vakataki ira tale ga na tacidra ena imatai ni senitiuri, era dau sikovi mera vakayaloqaqataki vei ira na ivakatawa dau veilakoyaki. O koya gona, o ira na lotu Vakarisito nikua era lewena e “dua bau na qele ni sipi, ka dua bau nai vakatawa.”​—Joni 10:16.

Sa macala tu ga nira sega ni tamata tabucala na iVakadinadina i Jiova, me vakataki ira ga na lotu Vakarisito ena imatai ni senitiuri. Ia, era cakacaka vata tiko ga ena lomavata. Ena vuku ni ka oqo e sa vunautaki tiko kina na itukutuku vinaka ni Matanitu ni Kalou ena vuravura taucoko.​—Cakacaka 15:​36-​40; Efeso 4:​13.

[iYaloyalo ena tabana e 31]

O ira na lotu Vakarisito nikua era lewena e “dua bau na qele ni sipi, ka dua bau nai vakatawa”