Na Vuna me Dua Kina na Noda Dauveivuke

‘AU DAU veivakasewasewani e liu niu kitaka ena lialia,’ e vakadinadinataka e dua a dau dokadoka e liu qai itovo voravora. A dau vosavakacaca, veivakasosataki, itovo kaukaua tale ga vei ira na imuri i Jisu Karisito dau rerevaka na Kalou. “Ia ka’u sa lomani,” e qai kaya ena lomavakacegu. Ena dredre beka ni vakabauti, ia e qai yaco na dau veivakacacani cacamatua oqo me o Paula na yapositolo yalodina lotu Vakarisito.​—1 Timoci 1:​12-16; Cakacaka 9:​1-19.

Tu yadudua o ira era cakava rawa na veika a dau vakayacora o Paula. Ia, eda lekata kece ga na ivakatagedegede ni Kalou. Na vuna? Baleta “ni sai valavala ca ko ira kecega na tamata, ka ra sega ni yacova na ka e vakarokorokotaki kina na Kalou.” (Roma 3:23) Kena ikuri, ni rawarawa meda luvuci ena noda yalolailai, eda nanuma ni sa sega ni ganiti keda na yalololoma ni Kalou. Ni vakasamataka lesu na levu ni nona ivalavala ca, e qolouvaka o Paula me baleti koya ga: “A tamata vakaloloma koi au! o cei ena sereki au mai na yago ni mate oqo?” E sauma vakataki koya ga na nona taro: “Au sa vakavinavinaka vua na Kalou e na vuku ni noda Turaga ko Jisu Karisito.”​—Roma 7:​24, 25.

E rawa vakacava me veitaratara kei ira na tamata ivalavala ca na Dauveibuli yalododonu? (Same 5:4) Dikeva ni tukuna o Paula: “Au sa vakavinavinaka vua na Kalou e na vuku ni noda Turaga ko Jisu Karisito.” (Neitou na matanivola kala.) E kaya e dua tale a lomani koya tale ga na Kalou: “Ia kevaka sai valavala ca e dua, sa dua na noda Dautataro [se, “dauveivuke,” NW] vei Tamada, ko Jisu Karisito, na yalododonu: ia sai bulubulu ni nodai valavala ca ko koya; a sa sega e na vuku ni noda walega, e na vuku talega ni nodra na kai vuravura kecega.”​—1 Joni 2:​1, 2.

Na cava e vakatokai kina me “noda dauveivuke vei Tamada”? E yaco tale ga vakacava o Jisu me “sai bulubulu” ni ivalavala ca?

Na Vuna me Dua Kina na Noda Dauveivuke

A lako mai vuravura o Jisu “me solia na nona bula me kedrai voli e lewe vuqa.” (Maciu 20:28) Na inaki ni ivoli me vakalesui mai kina e dua na ka a tauri, se sereki kina e dua e vesu tu. Na vu (verb) ni vosa vakaiperiu e vakadewataki me “[i]voli” e vakaibalebaletaka na iubi, se ibulu, ni ivalavala ca. (Same 78:38) Na vosa vakirisi, me vaka e vakayagataki ena Maciu 20:​28, a taurivaki ina ivoli mera sereki kina na sotia vesu ena ivalu se na nodra sereki na bobula. Me dodonu vakalawa, e gadrevi me veiraurau vinaka sara ga na ivoli kei na ka e sereki.

Eda vakabobulataki tu ena vuku ni nona tusaqata na Kalou na imatai ni tamata. Me vaka e volai ena Vakatekivu wase e 3, na tamata uasivi oya​—o Atama​—a digitaka me talaidredre vua na Kalou o Jiova. E sa volitaki koya kina kei ira nona kawa era se bera ni sucu mera bobula ina ivalavala ca kei na mate. Sa vakayalia kina o Atama na isolisoli ni bula uasivi a vakarautaki me baleti koya kei ira nona kawa.​—Roma 5:​12, 18, 19; 7:14.

Vei Isireli makawa, a tuvanaka na Kalou na vakacabori ni manumanu me isoro, se me buluti kina na nodra ivalavala ca. (Vunau ni Soro 1:4; 4:​20, 35) Sa kena ibalebale ni sosomitaka na bula ni tamata ivalavala ca na manumanu e vakacabori. (Vunau ni Soro 17:11) E rawa ni tukuni kina na “siga ni veibuluti” me “siga ni veivoli.”​—Vunau ni Soro 23:​26-28.

Ia me vaka ni lolovira na manumanu mai na tamata, e “sa dredre sara me kauta tani [vakadua] nai valavala ca na dra ni pulumokau kei na me.” (Iperiu 10:​1-4) Me rawa ni buluti se kau tani vakadua na ivalavala ca, ena vinakati kina e dua na isoro e tautauvata vinaka sara ga kei na ka a vakayalia o Atama. E gadrevi vakalawa e dua na tamata uasivi (o Jisu Karisito) me veisotari vinaka sara ga kei na ka a vakayalia e dua tale na tamata uasivi (o Atama). Sa na rawa ga vua e dua na tamata uasivi me isoro me voli ira na kawa i Atama mai na veivakabobulataki a volitaki ira kina na tamadra taumada. ‘Me isau ni mate na mate,’ na sala ga oqo e sa na qai tau kina na lewa dodonu.​—Lako Yani 21:​23-25.

Ni sa tau vei Atama na itotogi mate ni sa ivalavala ca, era se bera ni sucu kina na nona kawa era na qai mate tale ga me vakataki koya. A sega ni via vakatubu kawa na tamata uasivi o Jisu, o “Atama sa muri.” (1 Korinica 15:45) A tu vua na kaukaua ni vakatubu kawa ena gauna a mate kina me isoro, ni a se tamata uasivi tu. Ena rawa ni tukuni kina nira sa mate vata kei koya na kawatamata e rawa nira na qai tubu mai vua. A ciqomi ira na kawa ivalavala ca i Atama o Jisu mera wili me nona. A sega ni via vakayagataka na nona dodonu me vakatubu kawa vakataki koya. Ena nona cabora na nona bula uasivi, e sa voli ira kina o Jisu na kawa i Atama mera sa mai Nona lewenivuvale, me yaco kina o Koya me “Tama ni gauna tawa mudu.”​—Aisea 9:​6, 7.

E dolava na isoro ni veivoli i Jisu na sala vei ira na tamata talairawarawa, mera rawata kina na yalololoma ni Kalou, mera rawata tale ga na bula tawamudu. Sa qai vola kina na yapositolo o Paula: “Ni sa kenai sau ni valavala ca na mate: ia sai solisoli walega ni Kalou na bula tawa mudu, e na vuku i Jisu Karisito na noda Turaga.” (Roma 6:23) E uqeti keda na loloma kei na yalovinaka i Jiova meda vakacaucautaki koya ena vuku ni ivoli erau vakarautaka vata kei na Luvena e duabau. (Joni 3:16) E rawata dina o Jisu me “noda dauveivuke vei Tamada” ni sa vakaturi ina bula vakalomalagi me lai cabora kina na isoro ni veivoli vua na Kalou, i lomalagi.a (Iperiu 9:​11, 12, 24; 1 Pita 3:18) Ia e sa vakayacora tiko vakacava mai lomalagi o Jisu Karisito na nona itavi vakadauveivukei ena vukuda?

[iVakamacala e ra]

[iYaloyalo ena tabana e 4]

Na bula uasivi vakatamata i Jisu e qai kedra ivoli na kawa i Atama