E Cakacaka Vakacava Nikua na Yalo Tabu ni Kalou?

A SUCU lokiloki mai o koya. Veisiga, e dabe toka ena matamata ni valenisoro e vakatokai o Lagilagi me kere ka ni loloma kina vei ira na lako yani ina valenisoro. Ia ena dua na gauna, e ciqoma na daukerekere oqo na iloloma e uasivia na ilavo lailai e dau soli vua. A vakabulai!​—Cakacaka 3:​2-8.

Dina ni rau a “tubera cake” na lokiloki oya na yapositolo o Pita kei Joni, me “vakaukauwataki sara [kina] na yavana,” rau a sega ga ni tukuna ni rau a vakavuna nona bula. Baleta na cava? E vakamacalataka o Pita: “Oi kemudou na tamata na Isireli, dou sa kurabui e na ka oqo e na vuku ni cava? se cava dou sa vakaraici keirau matua kina, me vaka sa neirau kaukauwa se yalododonu, keirau sa kitaki koya kina oqo me lako rawa?” Io, erau vakadinata ruarua o Pita kei Joni ni sega ni yaco na ka oqo ena nodrau kaukaua ga, ena yalo tabu ga ni Kalou.​—Cakacaka 3:​7-​16; 4:​29-​31.

Ena gauna oya, e dau yaco na “cakacaka-mana” vaka oqo me vakadinadinataki kina ni cuqena tiko na ivavakoso vakarisito tauyavu vou na Kalou. (Iperiu 2:4) Ia ni sa yaco na inaki ni cakamana, sa na qai “takali” me vaka e kaya na yapositolo o Paula.a (1 Korinica 13:8) Eda sega kina ni raica nikua ena ivavakoso vakarisito dina na veivakabulai e cuqeni vakalou, na parofisai, se na nodra vakasavi na timoni.

Kena ibalebale beka oqo ni sa mudu na cakacaka ni yalo tabu ni Kalou? Sega! Meda raica mada e so tale na sala e yavala kina na yalo ni Kalou ena imatai ni senitiuri, vaka kina ena noda gauna oqo.

“Na Yalo Tabu na Vu ni Ka Dina”

Dua na sala e cakacaka kina na yalo tabu ni Kalou oya me vakarogoya, me vakamatatataka, me vakatakila tale ga na ka dina. Ni vakarau mate o Jisu, e kaya vei ira na nona tisaipeli: “Sa vuqa na ka sa vo me’u tukuna vei kemudou, ia dou sa sega ni rawata edaidai. Ia ni sa lako mai ko koya, na Yalo Tabu na vu ni ka dina, ena tuberi kemudou ki na ka kecega e dina.”​—Joni 16:​12, 13.

“Na Yalo Tabu na vu ni ka dina” a sovaraki ena Penitiko ni 33 S.K. mera papitaisotaki kina e rauta ni 120 na tisaipeli era soqo tiko ena dua na tabavale e cake mai Jerusalemi. (Cakacaka 2:​1-4) E maliwai ira tiko na lakova yani na solevu e dau caka vakayabaki oya na yapositolo o Pita. Ni sa vakasinaiti ena yalo tabu, sa qai “tu cake” qai vakamatatataka e so na ka dina me baleti Jisu. Me kena ivakaraitaki, e tukuna ni sa “kau cake e na liga i matau ni Kalou” o “Jisu na kai Nasareci.” (Cakacaka 2:​14, 22, 33) E uqeti Pita tale ga na yalo tabu ni Kalou me tukuna ena doudou vei ira na Jiu era vakarogoci koya tiko: “O koya oqo, me kila sara kina na mataqali taucoko nei Isireli, ko Jisu oqo, ko koya dou a vakota ki na kauveilatai, sa lesia na Kalou me Turaga ka Karisito talega.” (Cakacaka 2:​36) Ena vuku ni ivakamacala i Pita e uqeti koya kina na yalo tabu, rauta ni le 3,000 era “vakabauta na nona vosa” ra qai papitaiso. Ena sala oqo, e vukei ira kina na yalo tabu ni Kalou mera dusimaki ina ka dina.​—Cakacaka 2:​37-​41.

Na yalo tabu ni Kalou e dau veivakavulici, e dau kauta lesu tale ga mai ina vakasama ni tamata na ka sa guilecava. E kaya o Jisu: “E na qai vakatavulici kemudou e na ka kece ga na Dauveivuke, na Yalo Tabu, o koya e na tala mai ko Tamaqu e na yacaqu, ka na vakananuma lesu tale ga vei kemudou ko koya na veika kece ga au sa dau tukuna vei kemudou.”​—Joni 14:​26, VV.

E veivakavulici vakacava na yalo tabu? E dolava na yalo tabu ni Kalou na nodra vakasama na tisaipeli mera kila vakamatata cake kina na veika era sa rogoca oti vei Jisu e dau buawa tu. Me kena ivakaraitaki, ena gauna sa lewai tiko kina o Jisu vei Ponitio Pailato, na kovana kei Jutia, eratou kila na yapositolo ni a kaya vei Pailato o Jisu: “Sa sega ni vakavuravura na noqu matanitu.” Ia, ni sa cabe i lomalagi ni oti e 40 na siga, e laurai ni se cala tiko ga nodratou vakasama na yapositolo ni ratou nanuma ni na tauyavu e vuravura na Matanitu ni Kalou. (Joni 18:36; Cakacaka 1:6) Kena irairai ni ratou sega ni taura vinaka na yapositolo na ibalebale ni vosa i Jisu me yacova ni sa oti na siga ni Penitiko 33 S.K., ena gauna e sovaraki kina na yalo tabu ni Kalou.

Ena veivakananumi tale ga na yalo tabu ni Kalou ni na kauta lesu mai ina nodra vakasama na veika e veivakavulici kina o Jisu. Me kena ivakaraitaki, sa vaka me qai vakaibalebale cake ga vakalevu na parofisai me baleta na mate i Karisito kei na nona vakaturi ena veivuke ni yalo tabu. (Maciu 16:21; Joni 12:16) Ni ratou nanuma lesu na ivakavuvuli i Jisu na yapositolo, eratou doudou kina ni valataka na nodratou dodonu ena matadra na tui, turaganilewa kei ira na iliuliu ni lotu.​—Marika 13:​9-​11; Cakacaka 4:​5-​20.

Kena ikuri, e vukei ira na lotu Vakarisito taumada na yalo tabu ni Kalou ena nodra dusimaki mera vunau ena yalava vuavuaivinaka. (Cakacaka 16:​6-​10) Na yalo tabu tale ga ni Kalou e tosoi ira na lotu Vakarisito taumada mera vakaitavi ena kena volai na Vosa ni Kalou, na iVolatabu, me yaga ina kawatamata kece. (2 Timoci 3:​16) Macala vinaka e ke ni levu sara na sala e cakacaka voli kina na yalo tabu ena imatai ni senitiuri. A sega ni soli me baleta wale ga na cakacaka mana.

Na Yalo Tabu Ena Noda Gauna

E cakacaka tale tiko ga na yalo tabu ena noda gauna oqo ena vukudra na lotu Vakarisito dina. E laurai oqo vei ira e dua na ilawalawa lailai dau vuli iVolatabu mai Allegheny, Pennsylvania, Mereke, ena ikarua ni veimama ni ika19 ni senitiuri. O ira na dau vulica vagumatua na iVolatabu oya era gadreva dina mera kila “na ka dina.”​—Joni 8:​32; 16:13.

Dua na lewe ni ilawalawa oqo, o Charles Taze Russell, e kaya me baleta nona sasaga me kila na ka dina mai na iVolatabu: “Au masu . . . me rawa ni cavuraki laivi kina mai lomaqu kei na noqu vakasama na rai tani sa tu rawa, ia me dusimaki au mada ga na yalona meu raica na ivakavuvuli dodonu.” E vakalougatataka na Kalou na nona masu ena yalomalumalumu.

Ni vakasaqaqara vagumatua o Russell kei ira nona ilawalawa ena iVolatabu, sa qai matata kina e vica na ka. E vakamacalataka o Russell: “Keimami kunea nira vidavida na ivakavuvuli ni iVolatabu ena kedra maliwa e vica vata na ilawalawa lotu lailai ena veitabadrau na yabaki, ra qai wakia vata vakalevu se vakalailai kei na vatavatairalago kei na rai cala ga vakatamata.” Na ka oqo e lai yaco kina na ka e vakatoka o koya na “biu cala ni ka dina.” Io, e mai yali sara tu ga na ka dina mai na iVolatabu ena ibinibini ivakavuvuli butobuto e curuma vakamalua na lotu ni Veivanua Vakarisito ena veisenitiuri. Ia e loma i Russell me kila na ka dina me qai kacivaka yani.

Ena veitaqa ni ivoladraudrau na Zion’s Watch Tower and Herald of Christ’s Presence, e vakacala kina ena doudou o Russell kei ira na nona ilawalawa na ivakavuvuli lasu vakalotu e beci kina na Kalou. Era taura rawa ni yalo ni tamata e dau mate, nida mate eda lako ga ina ibulubulu, ni o Jiova ga na Kalou dina, e sega ni tiki ni dua na Letoluvakalou, ia na vakasama kece oqo e veibasai kei na rai vakalotu e ciqomi raraba tu.

Vakasamataka ga na levu ni nodra cudru na italatala ni lotu ni Veivanua Vakarisito ena kena vakavotui vaka oqo na ivakavuvuli lasu. Nira vinakata mera taura matua tiko ga na nodra itutu lelevu vakalotu, era cuqena kina na sasaga e levu na italatala ni lotu Katolika kei na lotu Tawase (Protestant) mera vakalasui Russell. Ia e sega ni soro o koya kei ira nona ilawalawa. Era rai ga ena nuidei ina veidusimaki ni yalo tabu ni Kalou. E kaya o Russell: “E vakadeitaka vei keimami na Turaga ni . . . yalo tabu i Tamada ena vakavulici keimami, me vaka ga ni a talai mai ena vuku i Jisu kei na nona kerekere tale ga o Jisu na noda iVakabula, Dauniveiyalayalati, e Uluda tale ga.” Ia e qai vakavulici ira dina! O ira na gonevuli ni iVolatabu gugumatua oqo era sega ni cegu ena nodra gunuva tiko ga na wai savasava ni ka dina mai na iVolatabu, ra qai kacivaka raraba yani i vuravura.​—Vakatakila 22:17.

Na isoqosoqo ni iVakadinadina i Jiova ena gauna oqo e totolo sara ni muria na veivakamuai ni yalo tabu ni Kalou ena rauta na duanadrau vakacaca na yabaki sa sivi. Ni vakararamataka tiko ga vakamalua na yalo tabu i Jiova na matadra vakayalo na iVakadinadina, era lomarawarawa kina mera veisau me salavata nodra kila kei na veika sa vakavoutaki mai.​—Vosa Vakaibalebale 4:​18.

“Dou na Qai Dautukuni Au”

E vakavotuya o Jisu e dua tale na sala e dau cakacaka kina na yalo tabu ni Kalou ni a kaya vei ira nona tisaipeli: “Dou na rawata na kaukauwa, ni sa lako mai vei kemudou na Yalo Tabu; dou na qai dautukuni au . . . ka yacova nai yalayala kei vuravura.” (Cakacaka 1:8) Nona yalayala o Jisu me solia na “kaukauwa” kei na “Yalo Tabu” vei ira nona tisaipeli mera colata rawa kina nodra itavi lesi vakalou e se dina tiko ga me yacova mai nikua.

Vakailawalawa, era kilai na iVakadinadina i Jiova ena nodra cakacaka vakavunau. (Raica na kato.) Era kaburaka tiko na itukutuku ni ka dina na iVakadinadina i Jiova ena sivia na 230 na veivanua kei na veiyatuyanuyanu. Era vosa tiko ga ena doudou ena nodra tokona na Matanitu ni Kalou ena veituvaki sara mada ga e rawa ni vakaleqai kina nodra bula, okati kina na veivanua e yaco tiko kina na ivalu. Na nodra yalogu ni cakava na cakacaka vakaitalatala vakarisito e ivakadinadina dei ni cakacaka tiko edaidai na yalo tabu. Qai laurai votu tale ga ni vakalougatataka tiko na Kalou o Jiova na nodra sasaga.

Me kena ivakaraitaki, ena yabaki sa oti, sivia na duanabilioni na aua e vakayagataki ena kena vunautaki na itukutuku vinaka me baleta na Matanitu ni Kalou. Na cava e laurai kina? Rauta ni 323,439 era vakaraitaka e matanalevu nodra yalayala vua na Kalou ena nodra soli ira mera papitaiso ena wai. Kena ikuri, era le 4,433,884 era tekivu vulica na iVolatabu e veimacawa ena nodra dui vale. E soli rawa tale ga e 24,607,741 na ivola, 631,162,309 na ivoladraudrau, kei na 63,495,728 na brochure kei na ivola lalai. Sa ivakadinadina levu dina ni yavala tiko na yalo tabu ni Kalou!

O Iko Kei na Yalo Tabu ni Kalou

Ni dua e rogoca na itukutuku vinaka, moica nona bula me salavata kei na ivakatagedegede ni Kalou, qai vakaraitaka ni vakabauta na isolisoli me baleta na ivoli, sa rawa ni tu sara tu ga o koya ena itutu me vakadonui koya kina na Kalou. Vei ira vaka oqo, e kaya kina na yapositolo o Paula: “Na Kalou . . . [e] solia vei kemuni na Yalona Tabu.”​—1 Cesalonaika 4:​7, 8, VV; 1 Korinica 6:​9-​11.

Ni tiko vei keda na yalo tabu ni Kalou, eda na vakalougatataki vakalevu. Na veivakalougatataki beka vakacava? Dua mada oqo, e kaya na Vosa ni Kalou e uqeti ena yalo tabu na kena volai: “Na vua ni Yalo Tabu na loloma, na reki, na vakacegu, na vosota vakadede, na yalomalua, na yalololoma, na vakabauta, na yalomalumalumu, [kei] nai valavala malua.” (Kalatia 5:​22, 23) O koya gona, na yalo tabu ni Kalou e igu kaukaua e veiuqeti ina ka vinaka, baleta ni na rawa kina vua e dua me vakaitovotaka na itovo vakalou.

Kena ikuri, kevaka o wilika na iVolatabu o qai bulataka na ka o vulica, ena qai vukei iko na yalo tabu ni Kalou mo tamata vuku cake vakalevu, kilaka, raiyawa, qai tamata yalomatua. E soli vei Tui Solomoni na “vuku kei na loma sa daukila rawa na ka levu sara, kei na daulomasoli,” baleta ni a saga me vakamarautaka na Kalou, sega ni tamata. (1 Tui 4:​29) Ni a solia o Jiova na yalo tabu vei Solomoni ena gauna oya, me na qai sega vakacava ni solia tale ga na yalona tabu vei ira na saga tiko mera vakamarautaki koya nikua?

Na yalo tabu ni Kalou e vukei ira tale ga na lotu Vakarisito mera valuti Setani rawa kina kei ira na timoni, na ivakarau ni veika ca oqo, kei na kena dau malele ina ca na yagodra ivalavala ca. Rawa vakacava oya? E sauma na yapositolo o Paula: “Au sa rawata na ka kecega e na vuku i Karisito o koya sa vakaukauwataki au.” (Filipai 4:​13) De na sega ni kauta tani na yalo tabu na veika dredre eda sotava kei na veivakatovolei; ia e rawa ga ni vukei keda meda vosota na veika oqori. Nida vakararavi ina yalo tabu ni Kalou, e rawa ni noda na “kaukauwa mana levu” meda walia kina na leqa se ka dredre cava ga eda sotava.​—2 Korinica 4:7; 1 Korinica 10:13.

Ni dikevi na ivakadinadina kece sa tu, e sega tale ni vakatitiqataki ni cakacaka dina tiko nikua na yalo tabu ni Kalou. Na yalo tabu i Jiova e vakaukauataki ira nona tamata mera vunautaka tiko ga nona inaki lagilagi. E sega ni cegu ni vakatakila tiko ga mai na rarama vakayalo, e vakataudeitaka noda vakabauta, qai vukei keda meda yalodina tiko ga vei koya e buli keda. Eda vakavinavinaka vakalevu ni se dina tiko ga na Kalou ina nona vosa ni yalayala me solia na yalo tabu vei ira na nona tamata yalodina nikua!

[iVakamacala e ra]

[iYaloyalo ena tabana e 10]

Na Ka Era Kaya e So Tale me Baleti Ira na iVakadinadina i Jiova

“Era saumi ira na kenadau na veilotu mera vakasalataki ira ena iwalewale mera marici ira kina na tamata mera gole i lotu, ra veibataka tale tiko na ile e so e veibataki vakalevu nikua me baleta na veiyacovi vakatagane se vakayalewa, kei na vakalutu, ia o ira na iVakadinadina i Jiova era sega ni via muria na vuravura yamekemeke. E sega ni cegu na nodra tara na veiyasa i vuravura kece ena nodra cakacaka vakavunau e tuvai vakamaqosa.”​—The Orange County Register of Orange County, Kalifonia, Mereke.

“Ena ka e baleta na vakatetei ni nodra vakabauta, vica wale na matalotu era gugumatua kina . . . me vakataki ira na iVakadinadina i Jiova.”​—The Republic of Columbus, Indiana, Mereke.

“O ira duadua ga era sikova na veimatanikatuba ena nodra muria na ivakavuvuli ni iVolatabu me baleta na vunautaki ni ‘itukutuku vinaka.’”​—Życie Literackie, Poladi.

“Ena ilakolako ni cakacaka vakavunau levu duadua e bau kilai, era sa kauta kina na itukutuku i Jiova ina veiyasa i vuravura kece na iVakadinadina i Jiova.”​—News-Observer, Tamaqua, Pennsylvania, Mereke.

[iYaloyalo ena tabana e 9]

Na yalo tabu ni Kalou e vakararamataki keda vakayalo,

. . . uqeti keda meda vakaitovotaka na itovo talei vakarisito,

. . . qai tokoni keda ena cakacaka vakavunau e vuravura raraba