Taro na Dauwiliwili

Ena tolu na Kosipeli, e tukuni kina na kena kudrutaki ni a lumuti o Jisu ena waiwai saulevu. Eratou kudru beka e so tale na yapositolo se a kudru duadua ga o Jutasa?

Na ka e yaco oqo e talanoataki ena Kosipeli i Maciu, Marika, kei Joni. Kena irairai ni a liutaka na vosa kudrukudru o Jutasa, qai vica vei iratou na yapositolo eratou duavata kei koya. E raici rawa e ke na vuna e yaga kina me va na Kosipeli. Na ka e volai ena Kosipeli yadua e donu vinaka, ia na ivalavala ni kena talanoataki na ka e yaco e sega ni tautauvata. Ni veidutaitaki gona na itukutuku e va, e votu mai kina e so tale na matailalai ni ka e yaco, e lai matata kina vakalevu na ka e talanoataki.

Na itukutuku ena Maciu 26:​6-​13 e cavuti kina na vanua​—na vale i Saimoni na vukavuka, mai Pecani​—ia e sega ga ni cavuti kina na yaca i koya na yalewa e sova na waiwai ena ulu i Jisu. E vola o Maciu: “Ni sa raica ko ira na nona tisaipeli, era sa cudru sara,” era kaya se cava e sega ni volitaki kina na waiwai me qai soli na kena ilavo vei ira na dravudravua.​—Neitou na matanivola kala.

E via tautauvata na kena matailalai e kau cake mai ena itukutuku i Marika. Ia e kuria o koya na tikina me baleta na voroki ni isogo ni tavaya me dolavi. Na tavaya oya e tu kina na waiwai boi vinaka, na “narita dina,” de dua e vakau sara mai Idia. Me baleta na vosa kudrukudru, e tukuna o Marika ni “cudru sara eso vakai ira, . . . a ra sa kudruva na yalewa.” (Marika 14:​3-9, neitou na matanivola kala.) Rau vakaraitaka gona na rua na itukutuku oqo ni sega ni dua ga na yapositolo e vosa kudrukudru, eratou le vica. Ia e tekivu vakacava?

O Joni, e raica e matana na ka e yaco, e vola e so tale na tikina bibi. E cavuta na yaca ni yalewa​—o Meri, na tacidrau o Marica kei Lasarusa. E kauta cake tale ga mai o Joni na tikina oqo, e sega ni veicoqacoqa ia e yaga ena matata ni itukutuku: “[E] lumuta na yava i Jisu, ka solota na yavana e na drau ni uluna.” (Neitou na matanivola kala.) Nida vakasotara vata na itukutuku kece oqo, eda raica ni o Meri e lumuta na ulu i Jisu kei na yavana ena waiwai, e vakadeitaka o Joni ni “narita dina.” O Joni erau veivolekati sara kei Jisu qai kena irairai ni na cudruvaka ke dua e beci Jisu. Eda wilika oqo: “Sa qai kaya e dua vei ira na nona tisaipeli, ko Jutasa Isikarioti, ko koya ena soli koya yani, Ena cava sa sega ni volitaki na waiwai oqo e na pene e tolu na drau, ka soli vei ira na dravudravua?”​—Joni 12:​2-8.

O Jutasa “e dua vei ira na nona tisaipeli” o Jisu, ia e vaka eda vakila na katakata i Joni ni dua e tiko ena itutu lavotaki oqo e sa lalawataka tiko me volitaki Jisu. E kaya na dauvakadewa o Doketa C. Howard Matheny me baleta na Joni 12:4: “Na vosa vakirisi e taurivaki ena yatuvosa ‘ko koya ena soli koya yani,’ e dusia na ka e sa caka tiko mai ena loma ni dua na gauna. E vakaraitaka oqo ni nona volitaki Jisu o Jutasa e sega ni ka e qai yaco ga vakasauri, ia e sa vakasamataki oti mai vakavinaka qai lalawataki ena loma ni vica na gauna.” E kauta cake tale ga mai o Joni ni vu ni nona vosa kudrukudru o Jutasa, e “sega ni nona nanumi ira na dravudravua, sa vosa kina vakaoqo ko koya; e na vuku ga ni sa daubutako, ka taura na taga i lavo, a sa kauta na ka sa biu kina.”

Sa na kena irairai ga ni a uqeta na vosa kudrukudru na dau butako o Jutasa, ni na levu cake kina na ilavo ena butakoca kevaka e volitaki na waiwai saulevu oya qai biu na kena isau ina taga ni ilavo e dau kauta voli. Ni sa kudrutaka oti o Jutasa na tikina oqo, de ra qai vosa cake tale ga kina e so na yapositolo ena nodra tokoni koya ni vaka me dina na ka e kaya. Ia o Jutasa ga e vakavurea na vosa kudrukudru.