Rogoca na Ka e Tukuna na Yalo Tabu

“Ia ni dou gole tani vaka ki nai matau se ki nai mawi, dou na qai rogoca e dua na vosa mai dakumudou ka vaka, oqo na sala, dou mai lako tu ga kina.”​—AISEA 30:21.

1, 2. E vakauitukutuku mai vakacava o Jiova ena veigauna sa oti?

E TIKO mai na yanuyanu o Puerto Rico na disi ni radio telescope kaukaua duadua qai levu duadua e vuravura. Sa sagavulu na yabaki nodra namaka tiko na saenitisi me taura e dua na itukutuku mai na taudaku kei vuravura na misini vakaitamera oya. E se sega ni tauri rawa e dua na itukutuku. Ia e rawa nida taura kece mai na taudaku kei vuravura ena dua ga na gauna e rawa, e so na itukutuku matata​—ni sega ni vakayagataki kina na misini vereverea. E iVurevure ni itukutuku oqo e dua e uasivi duadua ena taudaku kei vuravura. O cei e iVurevure ni itukutuku oya, o cei e ciqoma tiko? Na cava e tukuna na itukutuku?

² E volai ena iVolatabu na gauna e so era rogoca sara ga kina e daligadra na tamata na itukutuku mai vua na Kalou. So na itukutuku era kauta mai na kabula vakayalo e talai ira mai na Kalou. (Vakatekivu 22:11, 15; Sakaraia 4:​4, 5; Luke 1:​26-​28) Ena tolu na gauna, e rogoci sara ga na domo i Jiova. (Maciu 3:​17; 17:5; Joni 12:28, 29) E vosa tale ga na Kalou ena gusudra na parofita, e levu vei ira era vola na ka e vakauqeta mera tukuna. Na iVolatabu e tu vei keda nikua e volai tu kina e levu na itukutuku oya, oka kina na ivakavuvuli i Jisu kei ira na nona tisaipeli. (Iperiu 1:​1, 2) Sa dau vakauitukutuku tiko mai o Jiova vei ira na nona ibulibuli tamata.

3. Na cava na inaki ni itukutuku ni Kalou, na cava e namaki meda cakava?

³ Na itukutuku vakauqeti ni Kalou oqo e sega so ni tukuni kina na noda lomalagi kei na vuravura. E tukuni ga mai kina na veika bibi, na ka e tara na noda bula ena gauna oqo kei na gauna mai muri. (Same 19:​7-​11; 1 Timoci 4:8) Ena itukutuku kece oqori, e vakaraitaka mai kina o Jiova na lomana kei na nona ivakasala. Oqo e dua na sala e vakayacori kina na vosa i Aisea na parofita: “Ia ni dou gole tani vaka ki nai matau se ki nai mawi, dou na qai rogoca e dua na vosa mai dakumudou ka vaka, oqo na sala, dou mai lako tu ga kina.” (Aisea 30:21) E sega ni vakasaurarataki keda o Jiova meda rogoca nona “vosa.” E vakatau vei keda noda muria se sega na ivakasala ni Kalou kei na nona sala. Oya na vuna e vakadreti keda kina na iVolatabu meda rogoca na itukutuku i Jiova. E uqeti keda vakavitu na ivola na Vakatakila meda “rogoca sara na ka sa tukuna na Yalo Tabu.”​—Vakatakila 2:​7, 11, 17, 29; 3:​6, 13, 22.

4. E dodonu beka meda namaka me rogo na domo i Jiova mai lomalagi ena gauna oqo?

⁴ Sa sega ni dau vosa o Jiova me rogo na domona mai lomalagi ena gauna oqo. Ena gauna mada ga vakaivolatabu, e vakavudua na nona vosa mai, so na gauna ni oti e vica na senitiuri. Ena veigauna sa oti, e veitaratara ga vakalevu o Jiova kei ira na nona tamata ena so tale na sala. E vaka kina ena gauna oqo. Meda raica mada e tolu na sala e veitaratara tiko kina kei keda o Jiova ena gauna oqo.

“Vakavuna Nai Vola Tabu Kecega”

5. Na cava e sala levu ni nona veitaratara o Jiova nikua, ena yaga vakacava vei keda?

⁵ E vakayagataki vakalevu ga na iVolatabu me veitaratara kina na Kalou kei na tamata. E vakavuna na Kalou na kena volai, e rawa tale ga ni yaga vei keda. (2 Timoci 3:​16) E bini ena iVolatabu na kedra itukutuku na tamata era lewa ga vakataki ira nodra rogoca se sega na domo i Jiova. E vakaraitaka oya ni dodonu meda rogoca na ka e tukuna na yalo ni Kalou. (1 Korinica 10:11) E tu tale ga ena iVolatabu na vuku dina e rawa nida vakayagataka nida vakatulewataka na veika eda sotava ena noda bula. E vaka sara ga me tu e dakuda na Kalou, me vakasolokakana mai: “Oqo na sala . . . lako tu ga kina.”

6. E uasivi vakacava na iVolatabu mai na ivola tale e so?

⁶ Me rawa nida rogoca na ka e tukuna na yalo tabu ena iVolatabu, e dodonu meda wilika wasoma. Na iVolatabu e sega wale ga ni ivola e volai vakamaqosa qai wiliki vakalevu me vaka ga na ivola era tu nikua. Na iVolatabu e uqeti ena yalo tabu, e tu kina na vakasama ni Kalou. E tukuna na Iperiu 4:​12: “Ni sa bula na vosa ni Kalou, ka kaukauwa, ka gata vakalevu ka mucu ga nai seleiwau batirua, ka suaka me wasea rua kina na lomada kei na yaloda, kei na nodai sema kei na uto ni sui, a sa vakalewa sara na nanuma kei nai naki ni yaloda.” Nida wilika na iVolatabu, e vaka na iseleiwau na veika e tukuni kina ni suaka noda vakasama kei na lomada, ni vakaraitaka na ivakatagedegede eda sa bulataka tiko kina na loma ni Kalou.

7. Na cava e bibi kina na wili iVolatabu, me vakacava na kena wasoma?

⁷ E rawa ni veisau na “nanuma kei nai naki ni yaloda” ni toso na gauna, vaka kina nida sotava na ituvaki vinaka se dredre ena noda bula. Ke da sega ni vulica tiko ga na Vosa ni Kalou, sa na sega ni duavata kei na ivakavuvuli vakalou na noda vakasama, noda itovo ni rai, kei na yaloda. Oya na vuna e vakaroti keda kina na iVolatabu: “Dou dikevi kemudou [“tiko ga,” NW], se dou tu e na vakabauta, se segai; vakatovolei kemudou [“tiko ga”].” (2 Korinica 13:5) Me rawa nida rogoca tiko ga na ka e tukuna na yalo tabu, e dodonu meda wilika e veisiga na Vosa ni Kalou.​—Same 1:2.

8. Na vosa cava ni yapositolo o Paula e vukei keda meda dui dikevi keda ena ivalavala ni noda wili iVolatabu?

⁸ Oqo e dua na idusidusi bibi vei ira na wili iVolatabu: Taura na gauna mo vakasamataka kina na ka o wilika! Nida muria na ivakasala ni wili iVolatabu e veisiga, eda na sega ni via wilika sara vakatotolo e vica vata na wase da qai sega ni kila na kena ibalebale. Dina ni bibi na wili iVolatabu wasoma, ia me kua ni kena inaki na noda vakamuria wale toka ga e dua na ituvatuva; meda gadreva dina meda vulici Jiova kei na nona inaki. Na vosa ni yapositolo o Paula ena yaga e ke meda dui dikevi keda kina. E vola vei ira na nona itokani lotu Vakarisito: “Ka’u sa tekiduru kina vei koya na Tamada, me solia vei kemudou ko koya, . . . me tiko ga e na lomamudou na Karisito e na vakabauta; mo dou vakawakana ka tauyavutaki e na loloma, ka rawata kina mo dou kila vata kei ira kecega era sa lotu, se cava na kena raraba, kei na kena balavu, kei na kena titobu, kei na kena cecere: ka mo dou kila na loloma i Karisito, o koya sa uasivi cake e na ka e kilai rawa; mo dou sinai e na ka kecega sa sinai kina na Kalou.”​—Efeso 3:​14, 16-​19.

9. Eda na teivaka vakacava me titobu na noda gadreva me vakavulici keda o Jiova?

⁹ Dina ni so vei keda eda sega ni taleitaka soti na wilivola, ia e so era taleitaka. Se mani vakacava na noda ivakarau, meda teivaka ga da qai vakatitobutaka na noda gagadre me vakavulici keda o Jiova. E vakamacalataka na yapositolo o Pita ni dodonu meda gadreva na vuku vakaivolatabu, e kila tale ga o koya ni na rairai vinakati me teivaki na gagadre oya. E vola: “Me vakataki ira na gone dramidrami ni dau gadreva na wai ni sucu vakayalo sa sega na kena ca, mo ni tubu cake kina mo ni vakabulai.” (1 Pita 2:2, VV, neitou na matanivola kala.) E vinakati meda vakavulici keda meda “gadreva” na vuli iVolatabu. Me vaka noda taleitaka e dua na kakana vou nida sa tovolea vakavica, ena rawa tale ga ni veisau me vinaka cake na ivakarau ni noda wilivola kei na vuli, ke da vakavulici keda meda muria e dua na kena ivalavala tudei.

“Kakana e na Kena Gauna Dodonu”

10. O cei era lewe ni “dauveiqaravi yalo dina ka vuku,” e vakayagataki ira tiko vakacava nikua o Jiova?

¹⁰ E vakatakila o Jisu ena Maciu 24:45-​47 (VV), e dua tale na sala e vakayagataka tiko o Jiova me vosa kina vei keda nikua. A vakamacalataka tiko o Jisu na ivavakoso vakarisito e lumuti ena yalo tabu​—“na dauveiqaravi yalo dina ka vuku” e lesi me vakarautaka na ‘kakana vakayalo ena kena gauna dodonu.’ Era “matavuvale” i Jisu o ira yadua na lewe ni ilawalawa oya. Era vakauqeti ra qai vakasalataki tiko o ira oqo kei ira “nai soqosoqo levu” ni ‘so tani tale na sipi.’ (Vakatakila 7:9; Joni 10:16) E levu ga na kakana ena kena gauna dodonu e tabaki mai ena Vale ni Vakatawa, na Yadra!, kei na ivola tale e so. E vakarautaki mai na ikuri ni kakana vakayalo ena vunau soqovi levu kei na vakatasuasua ena soqo ni tikina kei na soqo ni tabacakacaka, vaka kina ena soqoni vakaivavakoso.

11. Eda talairawarawa vakacava ina ka e tukuna na yalo tabu ena gusu i koya “na dauveiqaravi yalo dina ka vuku”?

¹¹ Na itukutuku e vakarautaka mai “na dauveiqaravi yalo dina ka vuku” e vakaukauataka na noda vakabauta, e vakavulica tale ga na yaloda. (Iperiu 5:​14) Na ivakasala vaka oqori e dau tukuni mai vakararaba me rawa kina nida dui vakayagataka. So na gauna eda vakasalataki tale ga vakadodonu me baleta na noda itovo. Na rai cava me tiko vei keda ke da rogoca dina na ka e tukuna tiko na yalo tabu ena gusu i koya na ilawalawa e vaka e le dua na dauveiqaravi? E sauma na yapositolo o Paula: “Dou talairawarawa vei ira sa liutaki kemudou, ka mo dou vakamalumalumutaki kemudou.” (Iperiu 13:17) Era tamata ivalavala ca kece o ira na vakaitavi ena cakacaka oqo. Ia, e marau o Jiova ni vakayagataki ira nona dauveiqaravi ivalavala ca e vuravura mera vakasalataki keda tiko ena gauna ni ivakataotioti.

Veidusimaki ni Noda Lewaeloma

12, 13. (a) Na sala cava tale e dusimaki keda kina o Jiova? (b) E vakayacoka vakacava na lewaeloma vei ira na sega ni kila vinaka na Vosa ni Kalou?

¹² E dua tale na sala e dusimaki keda kina o Jiova—na noda lewaeloma. E buli keda o Jiova meda liaca rawa na ka e dodonu kei na ka e cala. E tiki ni noda itovo oya. Ni volavola vei ira na kai Roma, e vakamacalataka na yapositolo o Paula: “Ni ra sa kitaka vakai ira ga na ka ni vunau ko ira na veimatanitu tani, sa sega vei ira na vunau, era sa qai nodra vunau vakai ira ga, ia sa dina sa sega vei ira na vunau: o ira era sa vakatakila sara ni sa volai e na yalodra nai valavala ni vunau, ka ni sa vakadinadina tiko na nodra lewa-eloma talega, ka ra sa dui lewa ni sa cala, se sa dodonu na nodrai valavala.”—Roma 2:14, 15.

¹³ E rawa vei ira e levu na sega ni kilai Jiova me via tautauvata na nodra vakasama kei na nodra ivalavala kei na ivakavuvuli vakalou me baleta na ka e dodonu kei na ka e cala. E vaka era rogoca e dua na domo rogo malumu ni dusimaki ira tiko ena sala dodonu. Ke ra vakila oqori na sega ni kila vinaka na Vosa ni Kalou, e dodonu me kaukaua cake na domo oqori vei ira na lotu Vakarisito dina! Io, e idusidusi nuitaki na lewaeloma vakarisito e vakavulici vakaivolatabu, e cakacaka vata tale ga kei na yalo tabu i Jiova.​—Roma 9:1.

14. E vukei keda vakacava na lewaeloma e vakavulici ena iVolatabu meda muria na ka e tukuna na yalo i Jiova?

¹⁴ Na lewaeloma vinaka e vakavulici ena iVolatabu, e dusimaki keda ena sala e vinakata na yalo tabu meda muria. De sega ni vakamacalataka na iVolatabu se noda ivola vakaivolatabu e dua na ituvaki eda sotava. E se rawa ga ni vakasalataki keda noda lewaeloma, me dusia vei keda na leqa e rawa nida sotava. Ke yaco oya da qai sega ni kauaitaka noda lewaeloma, sa na vaka ga eda sega ni via rogoca na ka e kaya na yalo i Jiova. Ena yasana adua, ke da vakararavi ina noda lewaeloma vakarisito e vakavulici, e rawa nida vakatulewa vinaka ke sega mada ga na idusidusi matata e volai. Ia meda nanuma dei tiko oqo, ke sega ni dua na ivakavuvuli, idusidusi, se lawa vakalou e veivakasalataki ena ka e dui baleti keda ga, meda kua ni suguraka na noda lewaeloma vua na noda itokani lotu Vakaristo.​—Roma 14:​1-4; Kalatia 6:5.

15, 16. Na cava e rawa ni vakavuna me sega ni cakacaka vinaka noda lewaeloma, eda na tarova vakacava me kua ni yaco oya?

¹⁵ Na lewaeloma e savasava qai vakavulici ena iVolatabu e isolisoli vinaka ni Kalou. (Jemesa 1:​17) Taqomaka na isolisoli oya, kua ni vakaleqa, me rawa kina ni cakacaka vinaka me vaka e dua na itataqomaki. Ke da muria na itovo vakavanua kei na itovo tale e so e veisaqasaqa kei na ivakatagedegede ni Kalou, ena rawa ni vakavuna me sega ni cakacaka vinaka noda lewaeloma, ena sega tale ga ni dusimaki keda ina sala dodonu. E rawa ni veicalati noda vakatulewa da qai vakaisini keda ena noda nanuma ni dodonu na ka cala eda cakava tiko.​—Vakatauvatana Joni 16:2.

¹⁶ Ke da sega ni kauaitaka tiko na ivakasala ni noda lewaeloma, sa na rogo malumu tiko ga na domona me yacova nida sa sega ni vakila ni cala na ka eda cakava tiko. E tukuni ira na tamata vaka oya na daunisame: “Sa sega ni vakila e dua na ka na lomadra me vaka ga na uro.” (Same 119:70, NW) O ira na sega ni kauaitaka na ka e uqeti ira kina nodra lewaeloma era na sega ni dauvakasama vinaka. Era sa sega ni muria na ivakavuvuli vakalou, ra sega tale ga ni vakatulewa vinaka. Nida sega ni vinakata meda vakataki ira oya, meda kauaitaka tiko ga noda lewaeloma vakarisito ena veika mada ga e sega so ni bibi.​—Luke 16:10.

Kalougata o Koya e Rogoca Qai Talairawarawa

17. Eda na vakalougatataki vakacava nida rogoca na ‘vosa mai dakuda,’ da qai muria noda lewaeloma e vakavulici ena iVolatabu?

¹⁷ Ena vakalougatataki keda na yalo i Jiova nida vakamatauni keda meda rogoca na ‘vosa mai dakuda’​—oya na vosa ena iVolatabu kei na kena e dau vakarautaka mai na dauveiqaravi yalodina ka vuku​—vaka kina na lewaeloma e vakavulici ena iVolatabu. Ena qai vukei keda na yalo tabu me vaqaqacotaka noda rogoca da qai kila na ka e tukuna vei keda o Jiova.

18, 19. Ena yaga vakacava na veidusimaki i Jiova ina noda bula kei na noda cakacaka vakaitalatala?

¹⁸ Ena vakaukauataki keda tale ga na yalo i Jiova meda vorata na veika dredre, ni solia vei keda na lomavuku kei na yaloqaqa. Me vaka era vakadinadinataka na yapositolo, e rawa ni uqeta noda vakasama na yalo ni Kalou qai vukei keda tale ga me salavata kei na ivakavuvuli vakaivolatabu na veika eda cakava kei na ka eda tukuna. (Maciu 10:18-​20; Joni 14:26; Cakacaka 4:​5-8, 13, 31; 15:28) Ni rau cakacaka vata na yalo i Jiova kei na noda dui sasaga, ena rawa nida vakatulewataka vinaka kina na veika bibi ni noda bula da qai yaloqaqa ni cakava na ka eda vakatulewataka. Me kena ivakaraitaki, de o via veisautaka na ivakarau ni nomu bula mo vakaliuca na veika vakayalo. Se o via vakatulewataka beka e so na ka bibi e tara nomu bula, me vaka nomu digitaka na kemu isa, veisautaka na nomu cakacaka, se voli vale. Nida vakatulewa, kua ni vakararavi ga ina ka e malele kina na lomada, e dodonu meda rogoca tale ga na ka e kaya na yalo ni Kalou da qai muria na veidusimaki oya.

¹⁹ Eda marautaka dina nodra veivakadreti vakayalololoma kei na nodra ivakasala noda itokani lotu Vakarisito, bau kina o ira na qase. Ia, meda kua ni waraka me tukuni vei keda na ka. Ke o kila na ka e dodonu mo cakava kei na veisau cava mo vakayacora me marau kina na Kalou, kusa. E kaya o Jisu: “Kevaka dou sa kila na veika oqo, dou sa kalougata kevaka dou sa kitaka.”—Joni 13:17.

20. Era na vakalougatataki vakacava o ira na rogoca na ‘vosa mai dakudra’?

²⁰ Me kilai na sala me vakamarautaki kina na Kalou, e sega ni vinakati mera rogoca sara na lotu Vakarisito na domo mai lomalagi se me sikovi ira mai na agilosi. Era kalougata ni tu vei ira na Vosa volai ni Kalou ra qai veidusimaki vakayalololoma tiko na ilawalawa lumuti e vuravura. Ke ra rogoca vinaka na ‘vosa mai dakudra’ ra qai muria na veidusimaki ni nodra lewaeloma e vakavulici ena iVolatabu, era na rawaka nira cakava na loma ni Kalou. Era na qai vakadinadinataka na vosa ni yalayala ni yapositolo o Joni: “Ko koya ga sa vakayacora na loma ni Kalou sa tu dei ka tawa mudu.”—1 Joni 2:17, VV.

Railesu

• Na cava e veitaratara kina o Jiova kei na tamata?

• Ena yaga vakacava noda wili iVolatabu wasoma?

• Meda raica vakacava na veidusimaki ni ilawalawa e vaka e le dua na dauveiqaravi?

• Na cava e rawa ni yaco ke da sega ni kauaitaka noda lewaeloma e vakavulici ena iVolatabu?

[iYaloyalo ena tabana e 13]

E sega ni gadrevi na misini vereverea me rogoci kina na itukutuku ni Kalou

[Credit Line]

Courtesy Arecibo Observatory/David Parker/Science Photo Library

[iYaloyalo ena tabana e 15]

Ni vosa vei keda, e vakayagataka o Jiova na iVolatabu kei “na dauveiqaravi yalo dina ka vuku”