iVakatagi e Vakamarautaka na Kalou

E tukuni ni ivakatagi “duadua ga na ka makawa eda bula vata mai na tamata.” E vaka na vosa, na isolisoli uasivi, e vakaduiduitaki keda mai vei ira na manumanu. E uqeta na lomada. E maleka nida rogoca, e kauta vakayawa noda vakasama, qai vakauasivi ni rawa ni vakamarautaka na Kalou.

E VAKARAITAKA na iVolatabu nira dau vakayagataka na ivakatagi na Isireli. E dau “taurivaki vakalevu na ivakatagi ena gauna makawa vakaivolatabu,” e kaya na Unger’s Bible Dictionary. E ivakarau ni nodra sokalou ena veisiga na lagasere salavata kei na ivakatagi. Ia e vakayagataki ga vakalevu na domo ni tamata.

A digitaka na tui o Tevita e so na Livai “me ra lewa nai valavala ni sere” ena valeniveitavaki ni se bera ni vakatabui na valenisoro a tara na luvena o Solomoni. (1 Veigauna 6:​31, 32) Ni sa kau yani e Jerusalemi na kato ni veiyalayalati, me vakaraitaka ni sa tiko o Jiova ena kedra maliwa, a tuvanaka sara o Tevita e so na Livai “me ra tukutuku, ka vakamolimoli ka vakavinavinaka vei Jiova.” Nodra lagasere ni veivakacaucautaki e vakayagataki kina na “soliteri kei na api, . . . [era] sausau e na sibali me rogo levu; . . . [kei na] uvu davui.” O ira kece na tagane oqo e “cavuti na yacadra yadua mera vakavinavinaka vei Jiova, ni sa tawamudu na nona loloma.”​—1 Veigauna 16:​4-6, 41; 25:1.

Na italetale, ‘sega ni mudu na nona loloma [o Jiova]’ e kunei vakavuqa ena Same, na ivola ena iVolatabu e cavuti kina vakalevu na ivakatagi. Me kena ivakaraitaki, e ikarua tiko ni qaqana ena 26 na tikina ena Same 136. E kaya e dua na vuku ni iVolatabu ni dina ni “lekaleka, ia e dredre nida guilecava, o ira kece era rogoca era na nanuma vinaka.”

Na itekitekivu ni same kece e laurai kina ni dau vakayagataki raraba na iyaya ni ivakatagi. Ena ika150 ni Same e cavuti kina na davui, na api, na tibereli, na bitunivakatagi, na sibali, kei na soliteri. Ia e se vakaliuci tiko ga na domo ni tamata. E kaya na tikina e 6: “Me vakavinavinaka vei Jiova na ka kecega sa cegu rawa. Dou ia vei Jiova na vakavinavinaka.”

E dau vakayatuyatutaki ena ivakatagi na ka e tu e lomada, ia ena gauna vakaivolatabu e dau vakavotui ena sere ni lolosi kei na lele na vusolo ni yalo. Na mataqali lagasere vaka oqo e tiki lailai ga ni nodra ivakatagi kei na sere na Isireli. “Ena sere ni lolosi ga se na lele ena sega ni vakayagataki kina na ivakatagi se me veilutuyaki kina na domo,” e kaya na encyclopedia ni iVolatabu na Insight on the Scriptures.a

A lagasere o Jisu kei iratou nona yapositolo yalodina ena nodra vakacaucautaki Jiova ena bogi ni bera nona mate, sega ni vakabekataki nira lagasametaka na qaqanisame e dau lagati ena Kanavata ni Lakosivia. (Same 113-​118) Rairai a vakataudeitaki iratou sara ga na tisaipeli ni sa takali na nodratou Turaga! Sa na qai gu tale ga na yalodratou me ratou yalodina tiko ga vei Jiova na Turaga Sau ni lomalagi kei vuravura ena gauna eratou taleva kina vakalima na italetale, “Ni sa sega ni mudu na nona loloma.”​—Same 118:​1-4, 29.

Era dau lagata na lotu Vakarisito taumada mai Efeso kei Kolosa na “same ni veivakacaucautaki vua na Kalou” (oqo na “serenilotu”). Era kuria oqo ena “sere vakayalo” era lagata lo ga. (Efeso 5:​19, NW; Kolosa 3:​16) Era vakayagataka vinaka na gusudra ena sere kei na vosa ni veivakacaucautaki. Sega beka ni tukuna o Jisu “ni sa vosataka na gusuda na ka sa oso vakalevu kina na lomada”?​—Maciu 12:34.

Na iVakatagi e Vakacudruya na Kalou

E sega ni ivakatagi kece era cavuti ena iVolatabu e vakamarautaka na Kalou. Vakasamataka na ka e yaco ena ulunivanua o Saineai, ena vanua e soli kina vei Mosese na Lawa, okati kina na Vunau e Tini. Na cava a rogoca o Mosese ena gauna e siro tiko mai kina ena ulunivanua? “Sa sega ni nodra kaila era sa gumatua, sa sega talega ni nodra qoqolou ni ra guca: a domo ni sere ga ka’u sa rogoca.” Oqo na mataqali ivakatagi ni qaravi matakau, e vakavuna sara ga me cudruvi ira na Kalou ra tini mate kina e rauta ni 3,000 na tamata era a vakaitavi ena ivakatagi ni vakasausa oya.​—Lako Yani 32:​18, 25-​28.

Dina ni rawa vua na tamata me bulia, vakatagitaka, qai marautaka na ivakatagi kece ga, ia e sega ni ivakatagi kece e vakamarautaka na Kalou. Baleta na cava? E vakamacalataka na yapositolo lotu Vakarisito o Paula: “Ni sai valavala ca ko ira kecega na tamata, ka ra sega ni yacova na ka e vakarokorokotaki kina na Kalou.” (Roma 3:​23) Na soqo ni vakacoko ni lotu butobuto, na ivakavuvuli ni sega ni dau mate na yalo ni tamata, na nona sokaloutaki o Meri ni “tina ni Kalou,” e levu na ivakatagi era curu tu kina na ivakavuvuli oqo. Na vakabauta kei na ivalavala oqo e beci kina na Kalou ni ka dina, ni veicoqacoqa kei na nona Vosa, na iVolatabu.​—Vakarua 18:​10-​12; Isikeli 18:4; Luke 1:​35, 38.

Digia Vakavuku na iVakatagi

Sega ni caka rawa na levu ni ivakatagi e tu meda digitaka. E caka na waqa ni peleti ni ivakatagi me temaki ira na tamata mera volia na ivakatagi katoni kece ga. Ke dua na dauveiqaravi ni Kalou e vinakata me vakamarautaki koya, ena digia vakavuku na ivakatagi, me kua na mataqali e vu mai na vakabauta ni lotu lasu se na kena e vakabekabei kina na ivalavala dukadukali kei na vakatevoro.

O Albert na lotu Vakarisito a daukaulotu tu mada ena dua na gauna mai Aferika, e kaya ni sega ni levu nona lai taba piano ena nona tu mai kea. A vakarogoca ga vakalevu e so na peleti ni ivakatagi a kauta tu. Sa tiko tale mai nona vanua ena gauna oqo, sa dua tiko na ivakatawa dauveilakoyaki e dau vakasikova na ivavakoso vakarisito. E lailai sara na gauna e dau vakarorogo ivakatagi kina. E kaya: “Noqu daunivakatagi taleitaki vakalevu o Beethoven. Ena veiyabaki sa oti oqo au dau maroroya tu nona ivakatagi e vakatokai na symphonies, concertos, sonatas, kei na quartets.” E dau marautaka vakalevu na vakarogoca. E duidui na ivakatagi eda dui taleitaka, ia vei keda na lotu Vakarisito, meda nanuma tiko na ivakasala i Paula: “O koya ga, se dou kana, se dou gunu, se cava na ka dou sa kitaka, mo dou kitaka kecega me vakarokorokotaki kina na Kalou.”​—1 Korinica 10:31.

iVakatagi Kei na Noda Yalayala

E dau mateca o Susie na ivakatagi. E kaya: “Au tekivu meu taba piano niu se qai yabaki 6, au vakayagataka na violin niu se qai yabaki 10, au vakayagataka na api niu sa yabaki 12.” Tini sara me lai vulica o Susie na qiri api ena Royal College of Music mai Lodoni, Igiladi. Rau vuli vata kei na dua na dau qiri api rogo ni Sipeni, bau dua tale ga na yabaki nona vuli ena koronivuli na Conservatoire e Parisi, e rawata kina na honors degree ni ivakatagi, e vakadipiloma tale ga ena qiri api kei na veivakavulici ena taba piano.

Sa tekivu sara me lai soqoni o Susie ena dua na ivavakoso ni iVakadinadina i Jiova e Lodoni. E raica kina na nodra veikauaitaki kei na nodra veilomani na iVakadinadina. Ni sa tekivu me lomani Jiova, sa gu tale ga na lomana me vaqara na sala me qaravi koya kina. Tini sara me yalataki koya me papitaiso tale ga. E kaya ga o Susie: “Meda dua na daunivakatagi, e vinakati meda na soli keda sara ga kina vakatabakidua, e sega gona ni ka vou vei au na noqu mai yalataki au vakatabakidua vei Jiova.” Ni sa tekivu me talairawarawa ina ivakaro i Jisu me lai vunautaka na itukutuku vinaka ni Matanitu ni Kalou, sa lailai na gauna e vagolea ena nona vakatagi ena buturara ni veivakamarautaki.​—Maciu 24:14; Marika 13:10.

Ena gauna oqo sa sega soti sara ni levu na gauna e vagolea ina ivakatagi, na cava nona rai kina? “So na gauna e vaka meu lomaleqa ni sega ni levu na gauna meu vakatovotovo kina,” e kaya, “ia au se dau vakayagataka tiko ga na noqu iyaya ni ivakatagi, au se marautaka tiko ga na ivakatagi. E isolisoli i Jiova na ivakatagi. Ia, au sa qai marautaka sara vakalevu edaidai niu sa vakaliuca na noqu qaravi koya.”​—Maciu 6:​33.

Na iVakatagi e Vakacaucautaki Kina na Kalou

O Albert kei Susie kei ira na limanamilioni vakacaca na iVakadinadina i Jiova era dau vakacaucautaka na Kalou o Jiova ena ivakatagi. Nodra soqoni vakarisito e dau vakayacori ena Kingdom Hall ena 234 na vanua, ke veiganiti era na dau tekivuna era na dau tinia tale ga nodra soqoni ena nodra lagasere ni vakacaucautaki Jiova. Totoka dina na ikabakaba levu kei na ikabakaba lalai ni sere e curu tu kina na vakasama vakaivolatabu e vakacaucautaki kina na Kalou o Jiova.

O ira kece na tiko ena soqoni era tabalaka na domodra ena lagasere e vakaraitaka ni o Jiova na Kalou dauveinanumi (Sere 44). Ra lagata tale ga na sere e vakacaucautaki kina o Jiova (Sere 190). Na nodra sere tale ga e vakaraitaka na marau kei na itavi era mai colata nira sa lewe ni mataveitacini vakarisito, oqori e okati kina na bula vakarisito, kei na itovo vakarisito. Sa qai wananavu sara na kena veisola tu ena nodra ivakatagi na ikabakaba ni ivakatagi mai Esia, Ositerelia, Urope, Mereke kei Sauca Amerika.b

“Dou seretaka vei Jiova na sere vou: dou sere vei Jiova na vuravura kecega. Dou sere vei Jiova, dou vakavinavinaka ki na yacana,” e vaka oqori na ikau ni sere vakaturaga e volai ena nona gauna na daunisame. “Dou tukuna voli e na veisiga kece ni sa dauia na veivakabulai ko koya. Dou tukuna na nona lagilagi ki na veimatanitu, na nona cakacaka mana vei ira na veimataqali kecega.” (Same 96:​1-3) Oqori sara ga na ka era vakayacora tiko na iVakadinadina i Jiova ena vanua o vakaitikotiko kina, era sureti iko tale ga mo mai tomani ira ena sere ni veivakacaucautaki oqo. Sa dola tu vei iko na nodra Kingdom Hall, na vanua mo vulica kina na sala mo vakacaucautaki Jiova ena ivakatagi e vakamarautaki koya.

[iVakamacala e ra]

[iYaloyalo ena tabana e 28]

Vakacaucautaki Jiova ena sere