O Ira na iVakaraitaki Vinaka​—O sa Vuli Tiko Vei Ira?

“DOU a yaco kina mo dou nodrai vakarau kecega era sa vakabauta mai Masitonia kei Akaia.” A vola na veivosa oqo na yapositolo o Paula vei ira na lotu Vakarisito yalodina mai Cesalonaika. Era sa ivakaraitaki vinaka dina vei ira na nodra itokani vakabauta. Ia, era tosoya tiko ga na nodra vakatotomuri Paula kei ira na nona ilala na kai Cesalonaika. E kaya o Paula: “Ni sa sega ni yaco vei kemudou na neitoui tukutuku-vinaka e na vosa walega, e na kaukauwa talega, kei na Yalo Tabu, ka ni sa vakadinadinataki vakalevu; ni dou sa kila na neitoui valavala e na vukumudou ni keitou a tiko vata kei kemudou. Ia dou a dauvakadamurimuri keitou.”​—1 Cesalonaika 1:​5-7.

E matata ni a sega ni vunau wale ga vei ira o Paula. E sa vosa ga na ivakarau ni nona bula​—na ivakaraitaki ni vakabauta, dauvosota, kei na nona cabori koya. Oqo na vuna e yaco kina o Paula kei iratou na nona ilala me ratou ivakaraitaki vinaka vei ira na kai Cesalonaika, ni yavalati ira mera ciqoma na ka dina “e na veivakararawataki levu.” Ia, e sega ni o Paula wale ga kei iratou na nona ilala eratou vu ni veivakamuai donu vei ira na vakabauta oqori. E veivakayaloqaqataki tale ga na nodra dauvosota na ka rarawa e so tale. A vola o Paula vei ira na kai Cesalonaika: “Ni dou a mai vakadamurimuri ira na veisoqosoqo lewe ni lotu ni Kalou mai Jutia era sa tu vata kei Karisito Jisu, oi kemudou na veiwekani: ni dou a vosota na veika ca maivei ira na kai nomudou, me vaka era sa vosota maivei ira na kai Jutia.”​—1 Cesalonaika 2:14.

Karisito Jisu​—na iVakaraitaki Uasivi

E dina ga ni a vakaraitaka o Paula e dua na ivakarau e veiganiti me vakatotomuri, e dau vakacerecerei Jisu Karisito tiko ga na ivakaraitaki vinaka duadua e dodonu mera muria na lotu Vakarisito. (1 Cesalonaika 1:6) A ivakaraitaki uasivi na Karisito ena gauna oya e vaka kina ena gauna oqo. A vola na yapositolo o Pita: “Ni dou sa kacivi me vakakina: ni sa vosota talega na Karisito na rarawa e na vukumudou, a sa laiva vei kemudou nai vakarau, mo dou muria na we ni yavana.”​—1 Pita 2:​21.

Ia, a mai cava na bula vakatamata i Jisu rauta na 2,000 na yabaki sa oti. E sa kabula vakayalo oqo qai bula tawamudu tiko “e na rarama e sega ni torovi rawa.” Ni kabula vakayalo o koya e “sega na tamata e bau raici koya oti se me na raici koya rawa.” (1 Timoci 6:​16, VV) Eda na qai vakatotomuri koya ga vakacava? E dua na kena sala meda vulica na va na ivolatukutuku baleti Jisu ena iVolatabu. Nida dikeva na Kosipeli eda na raica kina na nona itovo, nona ivakarau ni bula, kei na “i tovo ni yalo[na].” (Filipai 2:​5-​8, VV) Ena vakatitobutaka na noda rai ke da vulica vinaka na ivola Na Tamata Rogo Duadua a Bau Bula, ni vakamacalataka vakavinaka na veika e sotava o Jisu ena nona bula kei na veitaravi ni gauna era yaco kina.a

A vakamua vakalevu na bula ni yapositolo o Paula na ivakaraitaki ni nona cabori koya o Jisu. E kaya vei ira na lotu Vakarisito mai Korinica: “Ia sa yaloqu sara me’u soli au kei na ka sa tu vei au e na vuku ni yalomudou.” (2 Korinica 12:15) Oqori na rai dina vakarisito! Nida vakananuma na ivakaraitaki uasivi i Karisito, sa dodonu tale ga me vakamuai keda meda vakatotomuria na ivakarau ni nona bula.

Me kena ivakaraitaki, e vakatavulici keda o Jisu meda vakararavitaka ina vosa ni yalayala ni Kalou na veika vakayago eda gadreva. Ia e sega ni o koya ga oqori na ka e cakava. E vakadeitaka ena nona bula e veisiga ni vakabauti Jiova dina qai vakararavi vua. E kaya: “Sa vaqara na fokise, a sa vakairoro na manumanu vuka; ia na Luve ni tamata, sa sega vua na tikina me kotora kina na uluna.” (Maciu 6:25; 8:20) E vakaosota beka na nomu vakasama kei na nomu bula na leqataki ni veika vakayago? Se vakadinadinataki ena nomu bula ni o vakasaqara taumada tiko na Matanitu ni Kalou? O raica vakacava tiko na nomu qaravi Jiova? E salavata beka kei na bula i Jisu na noda iVakaraitaki? E vakaraitaka na iVolatabu ni sega ni vunautaka wale ga o Jisu na lomakatakata, ia e vakaraitaka sara ga na lomakatakata oqori ena vuqa na gauna. (Joni 2:​14-​17) Kuria, sa ivakaraitaki vinaka dina o Jisu ena loloma! A solia sara ga na nona bula ena vukudra na nona tisaipeli! (Joni 15:13) O sa vakatotomuri Jisu tiko ena nomu dau lomani ira na mataveitacini lotu Vakarisito? Se dau vakataotaka na nomu lomani ira e so na nodra malumalumu?

Eda na sega ni yacova sara na ivakaraitaki vinaka i Karisito, dina ga nida na via vakatotomuri koya tiko. E sega ni vakatitiqataki ni marautaka o Jiova na noda sasaga meda “tokara na Turaga ko Jisu Karisito.”​—Roma 13:​14, VV.

“Dou Nodrai Vakarau ga na Qele ni Sipi”

Era tu beka ena ivavakoso nikua e so era ivakaraitaki vinaka vei keda? E vaka dina kina! Vakabibi ni dodonu mera ivakaraitaki vinaka o ira na mataveitacini era lesi mera vakaitavi. E kaya o Paula vei Taito, a veiqaravi ena veivavakoso mai Kiriti qai lesi ira tale ga na ivakatawa e kea, ni dodonu vei ira kece na qase ni ivavakoso mera “[tagane era] sega ni cala.” (Taito 1:​5, 6) E vakasalataki ira vaka kina “nai talatala qase” na yapositolo o Pita mera nodra “[i]vakarau ga na qele ni sipi.” (1 Pita 5:​1-​3) Ia vakacava ga o ira na dauveiqaravi vakaitalatala? O ira tale ga mera “[tagane] era kitaka vinaka na cakacaka ni tuirara.”​—1 Timoci 3:​13.

Ia, eda na sega ni namaka mera na kenadau kece na qase ni ivavakoso kei ira na dauveiqaravi vakaitalatala ena veibasoga kece ni cakacaka vakarisito. E kaya vei ira na lotu Vakarisito mai Roma o Paula: “Ni da sa rawata na veisolisoli sa duidui me vaka na loloma sa soli vei keda.” (Roma 12:6) Era kenadau na mataveitacini ena duidui tabana. Ena sega ni veiganiti meda namaka nira na vinaka vakaoti na qase ena ka kece era kaya se cakava. “Ni da sa cala kecega e na ka e vuqa,” e kaya na iVolatabu ena Jemesa 3:2. “Kevaka sa sega ni cala e dua e na vosa, sa tamata uasivi sara ko koya, a sa rawarawa vua me tarova na yagona taucoko.” Dina ga nira sega ni uasivi na qase, ia me vakataki Timoci e rawa mera “nodrai vakarau era sa vakabauta, e na vosa, e nai valavala, e na loloma, e na lomadina, e na yalosavasava.” (1 Timoci 4:12) Nira cakava vaka kina na qase, ena rawarawa sara vei ira na qelenisipi mera muria na ivakaro ena Iperiu 13:7: “Dou nanumi ira era a liutaki kemudou, . . . vakadamurimuria na nodra vakabauta, ka nanuma nai otioti ni nodrai valavala.”

E So Tale na iVakaraitaki Vinaka ni Gauna Oqo

E vuqa tale era ivakaraitaki vinaka ena vica na itabayabaki sa oti. Vakacava o ira na daukaulotu era cabori ira, era ‘sa biuta na nodra vale, na veitacini, na ganedra, na tamadra, na tinadra, na luvedra, na nodra vanua,’ mera vakayacora na nodra ilesilesi vakarisito ina veivanuatani? (Maciu 19:29) Vakasamataki ira tale ga na ivakatawa dauveilakoyaki kei ira na watidra, o ira na tagane kei na yalewa era bolecakacaka ena veivalenitabana ni Watch Tower Society, kei ira na painia era veiqaravi ina veivavakoso. Ena rawa beka ni uqeti ira e so tale na ivakaraitaki vinaka vaka oqo? E dua na lotu Vakarisito e daukacivaka na itukutuku vinaka e Esia e nanuma lesu e dua na daukaulotu ena ikawalu ni kalasi ni Watchtower Bible School of Gilead. E kaya ni tacida yalodina oqo e “sa tu vakarau me vorati ira na ilala namu kei na draki tunumaka. . . . Qai torocake sara ni rui matai dina ena vakamacala ena vosa vakajaina kei na vosa vakamaleya tale ga, dina ga ni kai Igiladi.” E vakayacoka vakacava na ivakaraitaki vinaka oqo? E kaya na tacida: “E uqeti au na nona ivalavala malua qai yalodei meu dua tale ga na daukaulotu niu sa na tubucake.” E sega gona ni kurabuitaki ni qai yaco dina me daukaulotu na tacida oqo.

Na Watch Tower Publications Index e tuvani kina na ivakamacala ni nodra bula e vuqa e tabaki ena Vale ni Vakatawa kei na Yadra! E vakayatuyatutaki kina na kedra itukutuku o ira era sa vakanadakuya na nodra cakacaka kei na isausau vakavuravura, era valuta rawa na nodra malumalumu, ra veisautaka na ivakarau ni nodra bula, e dodonu tu ga na nodra rai ena gauna dredre ni bula, era vakaraitaka na gugumatua, na vosota, na yalodina, na yalomalumalumu, kei na yalo ni cabori ira. E kaya e dua na dauwiliwili me baleta na italanoa ni nodra bula o ira oqori: “Era vakavuna meu dua kina na lotu Vakarisito yalomalumalumu qai dau vakavinavinaka niu dau vakawilika na veika era sa sotava, era qai vukei au meu kakua ni dau qaciqacia, se meu dau yalokocokoco.”

Me kena ikuri, era tu tale ga na ivakaraitaki vinaka ena nomu ivavakoso: o ira na ulunivuvale era sega ni guce ni qarava ruarua na veika vakayago kei na veika vakayalo ni nodra matavuvale; o ira na ganeda​—wili kina o ira na itubutubu tina le dua​—era colata rawa na icolacola levu ni qaravi luvedra era qai gugumatua tale ga ena cakacaka vakaitalatala; o ira na sa qase kei ira na malumalumu era yalodina tiko ga dina ga ni sa torosobu sara vakatotolo na nodra bula. Era sega li ni yavalati iko na ivakaraitaki kece oqori?

E sega ni rawa ni vakalasui na kena bini tu na ivakaraitaki ca e vuravura. (2 Timoci 3:​13) Ia, vakananuma mada na ivakasala i Paula vei ira na lotu Vakarisito e Jutia. Ni sa vakayatuyatutaka oti na nodra ivakaraitaki vinaka na tagane kei na yalewa ena gauna e liu, sa qai uqeti ira na yapositolo o Paula: “Ena vuku ni ka oqo, ni sa vakavolivoliti keda talega e lewe vuqa e vaka na o era sa vakaraici keda, me da . . . ciciva tikoga na cere sa tu e matada, ka me da vakaraici Jisu, o koya sa vakatekivuna ena sauma talega na noda vakabauta.” (Iperiu 12:​1, 2) E vakavolivoliti ira tale ga na lotu Vakarisito nikua e vuqa na ivakaraitaki vinaka e “vaka na o”​—ni gauna makawa kei na gauna oqo. E sa yaga tiko li vei iko na nodra ivakaraitaki? Ena rawa kevaka mo “kakua ni muria na ka ca, muria ga na ka vinaka.”​—3 Joni 11.

[iVakamacala e ra]

[Tikina bibi ena tabana e 20]

Eda na sega ni namaka mera na kenadau kece na qase ni ivavakoso kei ira na dauveiqaravi vakaitalatala ena veibasoga kece ni cakacaka vakarisito

[iYaloyalo ena tabana e 21]

Mera ‘nodra ivakarau na qelenisipi’ o ira na qase ni ivavakoso