O Lotu Vakarisito “Yalomatua”?

“NI’U a gone, au dauvosa me vaka na gone, au dau kila ka me vaka na gone, au a dauvakanananu me vaka na gone.” Oya na ka a vola na yapositolo o Paula. Eda a donuya kece mai na gauna ni gone. Ia eda sega ni gone tiko ga me tawamudu. E kaya o Paula: “Ia ni’u sa yaco me tamata bula, au sa biuta tani na ka vagonegonea.”​—1 Korinica 13:11.

Vaka kina o keda, eda gone vakayalo kece nida se qai tekivu lotu Vakarisito. Ia ni toso tiko na gauna, ena rawa nida na “yacova kece sara kina na duavata e na noda vakabauta kei na noda kila na Luve ni Kalou; me da yaco me da tamata yalomatua ka ucuya na i vakarau taucoko i Karisito.” (Efeso 4:​13, VV) Ena 1 Korinica 14:​20, eda vakaroti kina: “Oi kemudou na veiwekani, dou kakua ni gone lalai e na vuku; . . . ia e na vuku mo dou tamata bula [se, “yalomatua,” NW].”

Na nodra maliwai keda tiko nikua na lotu Vakarisito matua, ra qai yalomatua tale ga, e vu ni kalougata dina vei ira na tamata ni Kalou, vakauasivi ni sa levu sara nikua na lotu Vakarisito vou. Era vakataudeitaka na ivavakoso na lotu Vakarisito yalomatua. E dau vakilai na vinaka ni nodra rai ena ivakarau ni yalo e kune ena ivavakoso cava ga era lewena.

E dina beka nida na tubu kece ga vakayago, ia e gadrevi na gauna kei na sasaga me rawa kina nida tubu vakayalo. E sega ni kurabuitaki kina ni so na lotu Vakarisito ena gauna i Paula era sega ni ‘torocake mera matua sara,’ dina ga nira sa qaravi Kalou tiko ena vica vata na yabaki. (Iperiu 5:​12; 6:1) Vakacava o iko? Se o sa qaravi Kalou voli ena vica vata na yabaki se ena loma ga ni dua na gauna lekaleka, e dodonu mo vakasamataki iko vinaka. (2 Korinica 13:5) E rawa beka mo vakatokai tale ga mo lotu Vakarisito yalomatua? Ke sega, ena rawa vakacava mo na vaka kina?

‘Dou Matua Ena Vuku’

E rawarawa vei ira era gone vakayalo mera “veikauyaki e na ua kei na cagi kece ga ni veivakavuvuli, e na i vadi qaseqase era bulia na tamata me ka ni veivakacalai.” E veiuqeti kina o Paula: “Eda na qai tubu cake kina e na ka kece ga vei Karisito, o koya na uluda.” (Efeso 4:​14, 15, VV) Eda na vakayacora vakacava oya? E kaya na Iperiu 5:14: “Sa yaga vei ira sa matua na kakana dina, o ira era sa vakarautaka na yalodra e nai valavala, me ra vakalewa rawa na ka se vinaka se ca.”

Dikeva ni vakavulici vinaka na lomadra na tamata matua ena nodra dau vakayagataka vakalevu, se ni sa dede na nodra bulataka voli mai na ivakavuvuli vakaivolatabu. E matata ni sega ni vakasauri ga na nona matua e dua, ni na taura toka e dua na gauna na tubu vakayalo. Ia o na rawa ni vakatotolotaka na nomu tubu vakayalo ena nomu vuli vakataki iko​—vakauasivi nomu vulica na veika titobu ena Vosa ni Kalou. A vakamacalataki ena Vale ni Vakatawa ena vica na gauna lekaleka sa oti e levu na ulutaga titobu. Era sega ni levea na ulutaga vaka oya o ira sa matua baleta wale ga ni “tu kina na ka eso e dredre me kilai.” (2 Pita 3:​16) Ia era marautaka ga ni kania na kakana dina vakayalo vaka oya!

Dauvunau Kei na Dauveivakavulici Gugumatua

E vakaroti ira nona tisaipeli o Jisu: “Dou lako yani ka qisi ira me ra noqu tisaipeli na lewe ni veivanua kece ga, ka papitaisotaki ira e na yaca ni Tamamudou kei na Luvena kei na Yalo Tabu; vakavulici ira me ra muria na veika kece ga au sa vakarota tu vei kemudou.” (Maciu 28:​19, 20, VV) E rawa ni vakatotolotaka tale ga na nomu matua vakayalo ke o vakaitavi vagumatua ena cakacaka vakavunau. Vakacava mo saga mo vakaitavi ena cakacaka oqori ena kena levu ga o rawata?​—Maciu 13:23.

Ena vuku ni dredre ni bula, ena rawa ni ka ni bolebole kina ena so na gauna na kunei ni gauna ni vunau. Ia, ke o dauvunau ‘gugumatua,’ o sa vakadinadinataka tiko ni bibi dina vei iko “nai tukutuku-vinaka.” (Luke 13:24; Roma 1:​16) O na dau kilai “mo i vakarau vei ira era sa vakabauta.”​—1 Timoci 4:​12, VV.

Ira na Yalodina

Era dau saga tale ga mera yalodina na lotu Vakarisito yalomatua. E kaya o Tevita ena Same 26:1: “I Jiova, mo ni lewai au; ni’u a muria lako na noqu yalododonu [se, “yalodina,” NW].” E ibalebale ni yalodina na vinaka kei na dei tu ga ni itovo. Ia e sega ni kena ibalebale na tabucala. O Tevita mada ga e vakayacora e vica na ivalavala ca lelevu. Ia a vakarorogo ina veivunauci qai veisautaki koya, e vakaraitaka kina ni se vu dina tiko mai lomana na nona lomana dina na Kalou o Jiova. (Same 26:​2, 3, 6, 8, 11) E okati ena yalodina na taucoko se na vinaka vakaoti ni lomada. A tukuna o Tevita vei luvena o Solomoni: “Mo kila na Kalou i tamamu, ka qaravi koya e na yalo dina.”​—1 Veigauna 28:9.

E okati tale ga ena yalodina na noda “sega ni vakavuravura,” noda sega ni vakaitavi ena veika vakapolitiki kei na ivalu. (Joni 17:16) E dodonu tale ga meda taqomaki keda mai na itovo dukadukali me vaka na veidauci, veibutakoci, kei na vakayagataki ni wainimate gaga. (Kalatia 5:​19-​21) E levu tale na ka e vauca na yalodina, sega ni kena levei wale ga na veika oqori. A veivakasalataki o Solomoni: “A lago mate sa vakaboicataka na waiwai e vakaisaluakitaki vakamatai: sa vaka kina na nona lialia lailai na tamata sa rogo ni sa vuku ka dokai.” (Dauvunau 10:1) Io, na “lialia lailai” mada ga me vaka na veiwali ca se veiwedevi e rawa ni vakacacana na irogorogo i koya “sa vuku.” (Jope 31:1) Vakaraitaka gona ni o sa matua ena nomu saga mo ivakaraitaki vinaka ena ka kece o cakava, ena nomu ‘qarauni iko mai na ivalavala kece ga e ca.’​—1 Cesalonaika 5:​22.

Daudina

E daudina tale ga na lotu Vakarisito e yalomatua. Eda wilika ena Efeso 4:24 na ivakaro ni yapositolo o Paula vei ira na lotu Vakarisito: “Mo dou vakaisulu e na tamata vou, o koya sa caka me vaka na Kalou e na yalododonu kei na yalosavasava ni dina.” Na vosa vakirisi ni “dina” ena iVolatabu Vakirisi, e tiko kina na vakasama ni savasava, yalododonu kei na veidokai. O koya e daudina e soli koya vakatabakidua, e yalododonu, qai dau cakava sara vakavinaka na nona itavi vua na Kalou.

Na cava e so na sala o rawa ni daudina kina? Dua ena nomu dau cakacaka vata kei ira na qase ni ivavakoso o lewena. (Iperiu 13:17) Nira kila na lotu Vakarisito matua ni digitaki o Karisito me Ulu ni ivavakoso vakarisito, era na solia nodra dina vei ira na lesi mera “vakania nai soqosoqo lewe ni lotu ni Kalou.” (Cakacaka 20:28) E sega kina ni dodonu meda saqata se beca na nodra lewa na qase era lesi! Meda dina tale ga vua “na dauveiqaravi yalo dina ka vuku” kei na veitabana e vakayagataki me vakadewai mai kina na “kakana [vakayalo] e na kena gauna dodonu.” (Maciu 24:​45, VV) Dau wilika qai bulataka na veika e volai ena Vale ni Vakatawa kei na ivola tale e so era tabaki vata.

Vakavatukanataka Nomu Loloma

E vola o Paula vei ira na lotu Vakarisito mai Cesalonaika: “Sa toso cake tiko ga na nomuni veilomani vaka i kemuni.” (2 Cesalonaika 1:​3, VV) Na toso cake tiko ga ni veilomani e dua na tiki bibi ni noda tubu vakayalo. E kaya o Jisu ena Joni 13:35: “A ka oqo era na kila kina na tamata kecega ni dou sa noqu tisaipeli, kevaka dou sa veilomani.” E sega ni vakasamataki wale tiko ga e lomada na veilomani vakaveitacini. E kaya na ivolavosa na Vine’s Expository Dictionary of Old and New Testament Words: “Ena kilai ga na loloma mai na ka e vakavatukanataki.” E dodonu mo toso tiko ga mo matua ena nomu dau vakavatukanataka na nomu loloma!

Me kena ivakaraitaki, eda wilika ena Roma 15:7: “Dou qai veivakacegui [se, “veikidavaki,” NW] vakai kemudou.” E dua na sala eda vakaraitaka kina nida veilomani, oya noda kidavaki ira ena marau na noda itokani eda vakabauta vata kei ira na sureti mai ena veisoqoni vakarisito. Saga mo kilai ira yadudua. Dau “kauaitaki ira yadudua” na tani. (Filipai 2:​4, NW) O rawa ni vakaraitaka nomu veikauaitaki ena nomu veisureti e nomu vale. (Cakacaka 16:​14, 15) Na nodra malumalumu na tani e rawa ni vakatovolei kina na titobu ni nomu loloma, ia ni o “veivosoti e na loloma,” o vakaraitaka ni o sa tamata yalomatua.​—Efeso 4:2, VV.

Vakayagataki ni Noda iYau me Tutaki Kina na Sokalou Savasava

Ena gauna makawa, e so na tamata ni Kalou era sega ni cakava na nodra itavi ena kena qaravi na valenisoro i Jiova. Mani talai ira yani kina na nona parofita na Kalou, me vakataki rau o Akeai kei Malakai, mera lai veivakauqeti. (Akeai 1:​2-6; Malakai 3:​10) Era marau ni vakayagataka na nodra iyau na lotu Vakarisito matua nikua me tokoni kina na sokaloutaki i Jiova. Vakatotomuri ira ena nomu cakava na ivakavuvuli ena 1 Korinica 16:​1, 2, (VV), mo ‘vakatikitikitaka toka e so na ilavo’ mo cautaka ina ivavakoso kei na cakacaka ni iVakadinadina i Jiova e vuravura raraba. E yalataka na Vosa ni Kalou: “Ko koya sa kaburaka vakalevu, ena tamusuka talega vakalevu.”​—2 Korinica 9:6.

Kua ni guilecava na iyau tale e so o taukena, me vaka na nomu gauna kei na nomu kaukaua. Tovolea mo ‘volia na gauna’ o vakayagataka ena sasaga era sega soti ni bibi. (Efeso 5:​15, 16; Filipai 1:​10) Vulica mo vakayagataka vinaka na gauna. Ena rawa mo vakaitavi kina ena kena vakavinakataki na Kingdom Hall kei na veicakacaka e tutaka na sokaloutaki i Jiova. Ni o vakayagataka vaka oqori na nomu iyau o sa vakaraitaka tiko ni o sa lotu Vakarisito yalomatua.

Torocake Mo Matua!

Era vu dina ni veivakalougatataki o ira na tagane kei na yalewa era qacoya na vuli qai levu na ka era kila, era gumatua ena vunau, era yalodina, era daudina qai dau loloma, ra qai lomasoli mera solia nodra kaukaua kei na nodra iyau me tokoni kina na cakacaka ni Matanitu ni Kalou. Sa rauta me vakarota kina na yapositolo o Paula: “Me da qai laiva nai vakatekivu ni vakavuvuli kei Karisito me da torocake me da matua sara.”​—Iperiu 6:1.

O iko beka e dua na lotu Vakarisito yalomatua? Se o se vaka tu ga e dua na gone vakayalo? (Iperiu 5:​13) Se o matua se sega, tomana tiko ga nomu vuli vakataki iko, vunau tiko ga, qai dau lomani ira na tacimu. Ciqoma nodra ivakasala kei na nodra veivakadodonutaki na matua cake. (Vosa Vakaibalebale 8:​33) Colata na nomu icolacola vakarisito. Ni toso tiko na gauna o qai sasaga tale tiko ga, ena qai rawa mo ‘lomavata ena vakabauta, qai kila sara na Luve ni Kalou, mo tautauvata kei na ivakarau ni tamata dina [se, “yalodina,” NW], era sa sinai sara vei Karisito.’​—Efeso 4:13.

[Tikina bibi ena tabana e 27]

Era vakataudeitaka na ivavakoso na lotu Vakarisito yalomatua. E dau vakilai kina na vinaka ni nodra rai

[iYaloyalo ena tabana e 29]

Ena nodra kauaitaki ira na tani na tacida matua, era vakatetea kina ena ivavakoso na yalo ni duavata