Taro na Dauwiliwili
E tiko ena Aisea wase 53 e dua na parofisai kilai levu me baleta na Mesaia. E kaya na tikina e 10: “Ia sa vinakata ko Jiova me qaqi koya, ka sa vakararawataka ko koya.” Na cava beka na kena ibalebale?
E rawarawa me kilai na vuna me tarogi kina na Aisea 53:10. Ena dredre vua na lotu Vakarisito dina me vakabauta ni na vinakata na noda Kalou yalololoma, dauveikauaitaki me qaqia se vakararawataka e dua. E solia vei keda na iVolatabu na yavu meda nuidei kina ni sega ni taleitaka na Kalou me vakararawataki ira na yalododonu. (Vakarua 32:4; Jeremaia 7:30, 31) E rairai sa dau vakatara beka o Jiova e so mera vakararawataki ena veisenitiuri sa sivi ni yavutaki ena ka e kila kei na nona loloma. Ia e sega ni vakavuna o Koya me a vakararawataki na Luvena lomani o Jisu. Na cava ga na ibalebale ni tikinivolatabu oqo?
Ena rawa ni vukei keda meda kila na kena ibalebale kevaka eda dikeva na tikinivolatabu kece oya, da qai vakasamataka na kena basika kina vakarua na vosa “vinakata.” E kaya na Aisea 53:10: “Ia sa vinakata ko Jiova me qaqi koya, ka sa vakararawataka ko koya; ni sa cakava na yalona mei soro e na vuku ni valavala ca, ena qai kunea na nona kawa, ena vakadedetaka na nona gauna, ia na ka e vinakata ko Jiova ena vakayacora ga ko koya.”
E vakaraitaka na usutu ni iVolatabu ni “ka e vinakata ko Jiova,” e cavuti ena mua ni tikinivolatabu oqo, e vakabibitaka na kena vakayacori na lomana ena cakacaka ni nona Matanitu. Na nona cakava oqo o Jiova ena vakadeitaka na nona dodonu me veiliutaki kei na nona rawa ni kauta laivi mai vei ira na tamata talairawarawa na ivalavala ca era sucukaya mai. (1 Veigauna 29:11; Same 83:18; Cakacaka 4:24; Iperiu 2:14, 15; 1 Joni 3:8) E vakatau na veika kece oqo ena nona mai bula vakatamata na Luve ni Kalou kei na nona soli koya me isoro ni veivoli. Eda sa kila ni a mai kune rarawa kina o Jisu. E vakaraitaka vei keda na iVolatabu ni “a vulica na talairawarawa mai na veika rarawa e sota kaya.” E mai yaga dina vei Jisu na veika rarawa a sotava.—Iperiu 5:7-9, VV.
A sa kila taumada tu o Jisu ni na sotava na rarawa levu ena itavi dokai sa viritu e matana. E matata oqori ena nona vosa ena Joni 12:23, 24, nida wilika kina: “Sa qai yaco mai na gauna me vakarokorokotaki kina na Luve ni tamata. E dina, e dina, au sa kaya vei kemudou, Kevaka ena sega ni mate na vua ni sila ni sa lutu ki na qele, sa tiko duaduaga; ia kevaka sa mate, sa vua vakalevu.” Sa kila vinaka sara tu ga o Jisu ni gadrevi vua me yalodina tiko ga ni na lai tini sara ena mate. E tomana na kena itukutuku: “Sa rarawa na lomaqu; ia a cava li me’u na kaya? Me’u na kaya li, ‘I Tamaqu, ni vakabulai au mai na gauna oqo?’ Ia sa i koya ga oqo na vu ni noqu lako mai, ko ya me mai yaco vei au na rarawa e na tiki ni gauna oqo. I Tamaqu, mo ni vakalagilagia na yacamuni! Sa qai rogo mai e dua na vosa mai lomalagi, ka kaya, ‘Au sa vakalagilagia oti, ka’u na vakalagilagia tale.’”—Joni 12:27, 28, VV; Maciu 26:38, 39.
Noda taura rawa na usutu ni tikina oqo ena rawa nida kila na ibalebale ni Aisea 53:10. Sa kila rawa tu o Jiova ni ka ena mai sotava o Luvena ena vauci kina na nona “qaqi,” se na nona ‘vakararawataki’ vakalevu. Ni sega ni yali mai na nona vakasama na lagilagi kei na vinaka vakaitamera ena qai muri mai, e vinakata kina o Jiova na veika e mai sotava o Jisu. E kena ibalebale ga ni “vinakata o Jiova me qaqi,” se me vakatara na nona lauqaqi na Mesaia. O Jisu tale ga e marautaka na veika sa rawata kei na veika sa vakayacora rawa. E vakadina kina, me vaka e tinia na Aisea 53:10, ‘na ka e vinakata o Jiova a vakayacora dina ga o koya.’