Eda sa Vakataki Ira sa Vakabauta

Kacivaki na Matanitu ni Kalou ena Yatuyanuyanu e Viti

ENA dua na gauna a tukuna kina o Jisu Karisito e rua na gaunisala. E dua e rabailevu qai tini ina rusa. E dua tale e qiqo ia e tini ina bula. (Maciu 7:​13, 14) Mera digitaka na kawatamata na gaunisala e dodonu, e loma i Jiova na Kalou me vunautaki na itukutuku vinaka ni nona Matanitu ena vuravura taucoko. (Maciu 24:14) O koya gona, era sa rogoca tiko na tamata ena veivanua na itukutuku ni Matanitu ni Kalou, ra qai digitaka e so na bula mera “vakataki ira ga era sa vakabauta ka ra sa vakabulai.” (Iperiu 10:​39, VV) Oni sureti mo ni wilika mada na italanoa ni nodra digitaka na bula e so e Viti kei na so tale na yatuyanuyanu ena Ceva ni Pasivika.

Era Vakabauti Jiova

A se qai gonevuli o Mere ena 1964 sa rogoca kina vakadua na itukutuku ni Matanitu ni Kalou. Ni tu tani ena dua tale na yanuyanu, e lailai sara nona veitaratara kei ira na iVakadinadina i Jiova. Toso na gauna, sa vulica rawa o koya na ka dina mai na iVolatabu. Ena gauna oya sa watina tiko kina na turaga ni yavusa ena nona koro. Ena nona digitaka o Mere me muria na ivakavuvuli vakaivolatabu, era cati koya ra qai vakalialiai koya kina o watina kei ira na wekana e lomanikoro. Dina nira yaco tu na veika oqo, e a papitaiso rawa ga ena 1991.

Sega ni dede sa malumu sobu na nona cati Mere o watina, o Josua, sa tekivu me dabe kei iratou na gone ni vakavulici iratou o Mere ena iVolatabu. Sa sega tale ni lotu Wesele o Josua. Ia se liutaka tiko ga na bose vakoro ni dua o koya na turaga. Vei ira na lewenikoro, sa tawayalodina o Josua baleta na lotu Wesele e tiki bibi tiko ni bula ena koro vakaviti. E mani uqeti Josua kina na italatala ni lotu me lesu tale ina nona lotu makawa.

E vosa cake ena doudou o Josua me vakadeitaka ni ratou sa digitaka vakaveitamani me ratou qaravi Jiova “vakayalo ka vakaidina.” (Joni 4:​24) Ena dua tale na bose vakoro, sa vakadonuya kina na turaga ni tikina me ratou sa na biuta na koro. E soli vei iratou e vitu na siga me ratou biuta kina na yanuyanu, na nodratou vale, na nodratou qele kei na vua ni nodratou iteitei, na ka kece eratou a bula kina.

Era vukei iratou vakaveitamani o ira na mataveitacini vakayalo ena dua tale na yanuyanu ena nodratou itikotiko kei na tikiniqele me ratou teitei kina. Sa papitaiso oti o Josua kei na luvena tagane ulumatua, sa dautukutuku bera ni papitaiso tale tiko ga ni itukutuku vinaka e dua tale na luvena tagane. O Mere se qai painia tudei (daukacivaka vakatabakidua na Matanitu ni Kalou) wale tiko ga oqo. Ena nodratou digitaka me ratou qaravi Jiova eratou vakayalia kina na nodratou itutu vakavanua kei na nodratou iyau ia me vakataka ga na yapositolo o Paula, eratou okata me sega ni dua na ka na veika eratou sotava me vakatauvatani kei na ka eratou sa rawata.​—Filipai 3:8.

Na Digidigi e Salavata Kei na Lewaeloma

Na noda digitaka meda muria na lewaeloma e vakatavulici vakaivolatabu e gadrevi kina na vakabauta kei na nuidei. E dina taucoko oqo vei Suraang e dua na goneyalewa se qai papitaiso oti ga, e vakaitikotiko e Tarawa, e dua na yanuyanu e Kiribati. E kerea o Suraang me sa cegu mai na dua na taba ni nona cakacaka vakanasi e valenibula. E sega ni ciqomi na nona kerekere, mani lesi sara ina dua na itikotiko ni nasi ena dua na yanuyanu ribayawa. E kea sa na sega tale kina ni rawa me veitaratara kei ira era vakabauta vata.

Vei ira na se qai lakova vakadua na yanuyanu oqo e dau kena ivalavala mera cabora e dua na ka vua na nodra “vu” na lewenivanua. Era vakabauta na lewenivanua ni kevaka e sega ni cakava oqo na vulagi ena mate. Ni sega ni vakadonuya o Suraang na ivalavala ni sokalou butobuto vaka oqo me caka vua kei iratou na nona ilala, era waraka kina na lewenikoro me na kidomoki koya na vu. Ni sega ni bau yacovi koya se o iratou na nona ilala e dua na ka, e tadola kina e so na sala vinaka sara vua me vunau vakavinaka kina.

Ia e sega ni yala ga e kea na nona vakatovolei o Suraang. Era dau dokadokataka e so na cauravou ena yanuyanu oqo mera saga e dua na goneyalewa e vulagi yani. Ia e tutaka rawa o Suraang na nodra wede qai yalodina tiko ga vua na Kalou. Yaco sara me painia tudei, dina ga ni veiqaravi tiko vakanasi ena veisiga.

Ni sa vakarau biubiu o Suraang, era kaya kina na qase ni koro ni bera na kanavata e caka me baleti koya, ni se qai imatai ni daukaulotu yalodina me bau sikovi ira. Ena vuku ni nona tudei ena ivakavuvuli vakaivolatabu, e lai vakayacoka sara vei ira e so na itukutuku ni Matanitu ni Kalou.

Sasaga Kaukaua

Ni yawa sara tu e so na koro, e dau vakavuna mera sasaga vakaukaua na tamata i Jiova mera vakaitavi ena cakacaka vakaitalatala kei na nodra tiko ena soqoni vakarisito. Dikeva mada na nodratou ivakaraitaki e le va na iVakadinadina papitaiso oqo​—e dua na tagane kei na tolu na yalewa e tauri iratou e vica vata na aua me ratou dau mai tiko ena soqoni vaka kina na nodratou lesu tale. Na nodratou lako mai kei na nodratou lesu tale eratou na takosova tiko e tolu na uciwai. Ni levu na wai, e dau qalo takoso e liu o tagane kei na dua na kuro ni vakasaqa e tawa tu kina na nodratou kato, na ivola, kei na isulu ni soqoni. Oti oya sa qai dau qalo tale mai me mai vukei iratou yani na ganena.

E dua tani na ka eratou sotava e dua na ilawalawa lailai era dau tiko ena soqoni ena yanuyanu lailai ribayawa o Nonouti e Kiribati. Na vale eratou dau soqoni kina e rauta ga e le vitu se le walu. Era dabe e tuba na kena vo ra qai qara i loma ena nodra rai basikata na lalaga e caka ena bai ni toa. Era raica vinaka tu na lewenikoro na valenisoqoni oqo nira lako se ra lesu mai na nodra valenilotu lelevu. Ia ena rai ni Kalou era kila kina na dauveiqaravi i Jiova ni bibi cake na tamata mai na vale. (Akeai 2:7) E dua ga na tacida yalewa sa papitaiso ena yanuyanu oqo, sa kena marama sara qai sega ni yawa na vanua e rawa ni taubaletaka. Ia se rawa ga vua me lako ina cakacaka vakaitalatala ena veivuke ni dua na goneyalewa dautukutuku bera ni papitaiso, ni dau biligi koya wavoki ena dua na bara. Oqo e vakaraitaka na nodra taleitaka na ka dina.

Era vakadeitaka na sivia e 2,100 na dautukutuku era veiqaravi tiko ena yatuyanuyanu e Viti mera kacivaka tiko ga na itukutuku vinaka ni Matanitu ni Kalou. Era nuidei ni le levu tale era na yaco mera “vakataki ira ga era sa vakabauta ka ra sa vakabulai.”

[Mape ena tabana e 8]

(Raica tale na ivola)

Ositerelia

Viti