E Yaga Beka na Masu?

E TIKO na gauna, e voleka ni o keda kece eda vinakata meda masu. Na kena dina, ni vuqa ena veimatalotu era daumasu vagumatua. Me kena ivakaraitaki, ena cavuqaqataka beka vakavica vata na udolu ena loma ni dua na siga e dua na lotu Buddha na masu, “Au vakabauti Amida Buddha.”

Nida raica na leqa sa tu e vuravura, e ka vakayalomatua me tarogi: Nira masu, na cava era namaka na tamata me na yaco? E yaga tiko beka na masu kece oqo?

Na Cava Era Masu Kina e So?

E levu ena veivanua vakaesia era masu vei ira na tukadra kei ira na budra era sa takali, kei na nodra kalou o Shinto se o Tao. Era cakava oqo mera rawata kina na nodra veitarogi e koronivuli, mera tamusuka kina na vua ni itei vinaka, se me itataqomaki mai na tauvimate. Ena nodra sasaga, era nuitaka na lotu Buddha mera na vakararamataki. O ira na lotu Idu era masuta ena yalodina na nodra kalou tagane kei na kalou yalewa era taleitaka vakalevu me soli kina vakalevu vei ira na kilaka, me levu kina na nodra iyau, ra qai taqomaki tale ga kina.

E so na lotu Katolika era nuitaka mera yaga raraba ina kawatamata, era lai solia kina na nodra bula mera lai veiqaravi vakabete se sisita ena monasitiri se koniveni era sogolati vei ira na lewenivanua, mera qai lai masu tu kina vakawasoma. E vica vata na milioni na lotu Katolika era qara na veivuke mai vei Meri ena nodra cavuqaqataka na masu, ra qai vakayagataka beka kina na cokocoko ni rosario. Ena vanua vakaesia, e levu era dauvola na nodra masu ra qai biuta ena dua na dramu ena nodra nanuma ni veigauna era vakacowiritaka kina sa tokaruataki tiko na nodra kerekere. Era dau cavuqaqataka na lotu Tawase na Masu ni Turaga, e dina beka ni so na gauna era na talaucaka ga na lomadra vua na Kalou nira masu. E levu na Jiu era lako sara vakayawa mera lai masu ena lalaga e vakatokai na Western Wall mai Jerusalemi, nira nuitaka me na vakalesui mai na valenisoro kei na yabaki vou ni rawaka kei na sautu.

E dina ni le vica vata na milioni era dau masu vakawasoma, sa qai sotava ga vakalevu na kawatamata na leqa ni dravudravua, na bobula ena vakatavako kei na so tale na ka, na kavoro ni vuvale, na basulawa, kei na ivalu. E rawa beka nida kaya ni cala tiko na ivalavala ni nodra masu o ira kece oqo? E tiko dina beka e dua e dau rogo masu?

E Tiko Beka e Dua e Dau Rogo Masu?

Ena sega ni yaga na masu kevaka e sega ni rogoci. Ni dua e masu, e vakabauta deivaki ni na rogoca e dua e tiko vakatawarairai mai lomalagi. Ia, e sega ni vakau na masu ena biau ni rorogo. E levu era kaya ni tiko e dua e rawa sara mada ga me kila na vakasama i koya e masu tiko. O cei beka oya?

Era se lomatarotarotaka tu ga na dauvakadidike se vure vakacava mai ena vica vata na bilioni na nave era veiqali tu ena noda mona, na vakasama. Sa macala ga, ni o koya a bulia na mona e rawa ni kila na ka eda vakasamataka tiko. E sega tale ni dua, na noda Dauveibuli ga, o Jiova na Kalou. (Same 83:18; Vakatakila 4:11) E dodonu me vakamuai vua na masu. Ia e rogoca beka o Jiova na masu kece vaka oqo?

E Rogoci Kece Beka na Masu?

E daumasu o Tui Tevita e Isireli makawa. Ni daunisame uqeti vakalou, e seretaka: “Oi kemuni sa daurogoca na masu, ena toro mai vei kemuni na tamata kecega.” (Same 65:2) E kila o Jiova na masu e vakamuai yani vua ena vica vata na udolu na veimataqali vosa eda vosataka tu oqo na kawatamata. Nida sega ni katona rawa na tamata na levu ni itukutuku vaka oya, e sega ni kena ibalebale ni sega tale ga ni rawa vua na Kalou me rogoci ira kece era masu vua ena sala e vakadonuya.

Ia, o Jisu Karisito, e dua e kilai ni daumasu​—e vakaraitaka ni sega ni vakadonuya kece na masu na Kalou. Dikeva na ka e kaya o Jisu me baleta na cavuqaqataki ni masu sa vakarautaki oti era dau vakayacora vakalevu ena gauna oya. E kaya kina na iVolatabu Vakaviti: “Ia ni dou sa masu, kakua ni vosa balabalavu walega, me vakataki ira na tawa lotu; ni ra sa nanuma era na rogoci ni ra sa vosa balabalavu.” (Maciu 6:7) Eda sega ni namaka me rogoca o Jiova na masu e sega ni vu mai lomada.

Me vakaraitaka na vuna e sega ni vakadonuya kina na Kalou e so na masu, e kaya kina na vosa vakaibalebale ena iVolatabu: “O koya sa vaqara tani na daligana me kakua ni rogoca na vunau, ena ka vakasisila na nona masumasu.” (Vosa Vakaibalebale 28:9) E kaya tale e dua na vosa vakaibalebale: “Sa yawa tiko ko Jiova vei ira nai valavala ca: ia na nodra masu na yalododonu ena rogoca ko koya.” (Vosa Vakaibalebale 15:29) Ena gauna era cakacala kina na iliuliu makawa kei Juta, e kaya o Jiova: “Ia ni dou sa dodoka mai na ligamudou, Ka’u na tabonaka na mataqu maivei kemudou: io, ni dou sa masu vakavuqa, ka’u na sega ni rogoca: a ligamudou sa lomoci e na dra.”​—Aisea 1:​1, 15.

E kaya na yapositolo o Pita e dua tale na ka e rawa ni sega ni vakadonuya kina na masu na Kalou. E vola o Pita: “Oi kemudou talega na tagane, dou tiko vata kei na watimudou me vaka na tiko vakavuku, mo dou doka na yalewa, me vaka sa ka malumalumu, ni dou sai taukei vata e na loloma ni bula; me kakua ni tarovi na nomudrau masu.” (1 Pita 3:7) Ena sega mada ga ni sivia na delavuvu ni vale na nona masu o koya e sega ni muria na ivakasala oqo!

O koya gona, me rogoci na masu, e dodonu me vakayacori e so na ka. Ia, e lailai wale vei ira era daumasu era vakasamataka mera cakava na loma ni Kalou. Oqo na vuna e sega ni vinaka rawa kina na noda vuravura, e dina ni gumatuataki na masu.

Na cava gona e vinakata na Kalou ena noda masu me qai rogoci keda? Na kena isau e tiko ena inaki yadudua ni noda masu. Na kena dina, kevaka eda via kila ni yaga na noda masu se sega, e dodonu meda kila se cava na inaki ni masu. Na cava e vakatara kina o Jiova meda vosa vua?

[iTaba ni Credit Line ena tabana e 3]

G.P.O., Jerusalem