Na Cava Mo Masu Kina?

“KO NI sa dau kerekere ka sega ni rawata, e baleta ni cala na i naki ni nomuni kerekere . . . Toro voleka vua na Kalou, ka na toro voleka yani vei kemuni ko koya.” (Jemesa 4:​3, 8, VV) Na veivosa oya nei Jemesa na tisaipeli i Jisu e rawa ni uqeti keda meda vakasamataka na vu ni noda masu.

Na masu e sega wale ga ni noda kaya vua na Kalou na ka eda vinakata. Ena nona iVunau rogo ena Ulunivanua, e kaya kina o Jisu: “Ni sa kila tu na Tamamudou na ka e yaga vei kemudou ni bera ni dou kerea vua.” Ia, e qai kaya tale o Jisu: “Dou kerekere, ka na soli vei kemudou.” (Maciu 6:8; 7:​7, VV) O koya gona e vinakata o Jiova meda kerea vua na ka eda gadreva. Ia e sega wale ga ni yala e kea na ka meda masulaka.

Erau na sega ni veivosaki wale ga e rua na veitokani vinaka ena gauna erau gadreva kina e dua na ka. Erau veitaleitaki, qai kaukaua na nodrau veitokani ni rau dui vakaraitaka na lomadrau. E vaka kina na noda masu, e tiko na kena inaki e levu cake, e sega ni vauci wale ga kina na noda kerekere. E dolava tale ga na sala meda vaqaqacotaka kina na noda veiwekani kei Jiova nida sokaloutaki koya mai lomada.

Io, sa vakarautaka vei keda na Kalou na isolisoli dokai na masu me rawa nida torovi koya voleka kina. E rawa ni yaco oqo kevaka eda talaucaka sara ga vua na lomada, sega mai na noda cavuqaqataka wale tiko ga na masu sa vakarautaki rawa tu. E dua na ka marautaki meda veivosaki kei Jiova ena masu! Me kena ikuri, e kaya na vosa vakaibalebale ena iVolatabu: “Ia na nodra masu na yalododonu sa vinakata ko koya.”​—Vosa Vakaibalebale 15:8.

E seretaka na daunisame o Esafa: “Ia koi au, e yaga vei au me’u toro vua na Kalou.” (Same 73:28) Ia meda toro voleka vua na Kalou, e levu tale na ka meda vakayacora mai na noda masu wale ga. Raica na kena ivakadinadina ena ivakaraitaki oqo:

“Sa qai kaya vua e dua na nona tisaipeli, Turaga, ni vakavulici keitou mada me keitou masu.” E qai sauma lesu o Jisu: “Ni dou sa masu, dou kaya, ‘Tama i keimami, me vakarokorokotaki na yacamuni, me yaco mai na nomuni matanitu.’” (Luke 11:​1, 2, VV) Ena rawa beka ni vakaibalebale na noda masu kevaka eda sega ni kila na yaca ni Kalou kei na sala me vakarokorokotaki kina o koya? Ena salavata vakacava na noda masu kei na veivosa oqo i Jisu, kevaka eda sega tu mada ga ni kila na Matanitu ni Kalou? E rawa nida kila na veika kece oqo kevaka eda dikeva vagumatua na iVolatabu. Na kila eda na rawata mai kina ena vukei keda meda kila na Kalou kei na nona sala. Kuria, noda veikilai vinaka kei na Kalou o Jiova ena vakavolekataki keda vua, ena vakavuna tale ga meda soli keda vakatabakidua vua. Ena qai vukei keda oqo meda vosa ena doudou vua ena masu.

Na Masu e Rawa ni Walia na Leqa

Nida bucina na veiwekani voleka kei Jiova ena vukei keda meda walia na leqa. Raica na kena dina ena ituvaki kece oqo. E vakaraitaka ni rawa nira vakaqaqacotaka na nodra veiwekani kei Jiova o ira era daumasu.

E masuta na veivuke ni Kalou e dua na marama mai Brazil na yacana o Maria. E via vorata na itovo vinaka e so e ciqomi raraba me ivakatagedegede ni ivakarau me muri, e vu vakatikina oqo ena nona raica na veivakaisini e yaco tiko. Sa biuta tale ga o Maria na nona vale, na watina, kei na luvena. Tekivu tale ga me gunu wainimate gaga. Ia, ni sega ni kunea rawa na marau, e talaucaka sara na lomana vua na Kalou qai masu ni qara veivuke.

Sega ni dede, rau sikovi Maria sara yani e rua na iVakadinadina i Jiova, rau qai biuta tu vua e dua na ilavelave ni Vale ni Vakatawa e vakamacalataki kina na yaga ni kena ciqomi na idusidusi vakalou. E tara sara ga na lomana na veika e wilika, sa mani tekivu vuli iVolatabu sara kina kei ira na iVakadinadina ena siga tiko ga oya. Na veika oqo e duavata tale kina na nona vuvale. Ni toso tiko na nona vulici Jiova, sa vakaraitaka tale ga na nona lomani koya. “E veisau sara vakalevu na noqu itovo,” e kaya o Maria. “E tarovi au na watiqu kei na noqu vuvale meu kua ni vuli iVolatabu. Ia eratou qai vakayaloqaqataki au tale ni ratou raica na noqu veisau.” E muri e qai yalataka o Maria nona bula vua na Daurogo masu, me rawa ni qaravi koya kina.

E dina ni toso vinaka na nona bisinisi o José qai dua na watina rairai totoka, e sega ga ni solia vua na marau. E biuti koya o watina ni lai lasa tale i tuba. E gunu vakasivia, lai vaka me vakasamataka kina ni sa tawayaga o koya. E kaya o José: “E vu sara ga mai lomaqu noqu masu, niu kerea na ka meu cakava meu vakalomavinakataka kina na Kalou. Sega ni dede era sikova mai na noqu vanua ni bisinisi na iVakadinadina i Jiova nira veisureti ina vuli iVolatabu wale e veivale, ia au vakatalai ira tani. E yaco vakatolu na ka oqo. Ena gauna kece au masu kina ni kere veivuke, era yaco tiko ga mai na iVakadinadina. O koya gona, au vakadeitaka meu sa na vakarorogo ena dua tale na gauna mai muri. Au sa wilika tasevu na iVolatabu qai levu sara tu ga noqu taro, ia na nodra isaunitaro kece e dau solia vei au na lomavakacegu. E veisau na inaki ni noqu bula niu vulici Jiova tiko, ra qai dauveivakayaloqaqataki dina na noqu itokani iVakadinadina! Au biuta na noqu itokani yalewa kei ira na noqu ilala ni gunu. Sega ni dede, keitou sa tiko vata tale vakavuvale. Au papitaiso ena itekitekivu ni 1999.”

E leqa na nona vakawati o Tamara, mai Itali, mani masu ni kerea na vuku. E dau cudrucudru o koya, ni vu oqo mai na nona dau mokulaki qai cemuri tani mai nodratou ni se yabaki 14. E kaya o Tamara: “Au kunea e dua na iVolatabu, au tekivu wiIika sara. Dua na yakavi, au wilika kina ni ‘vakasaqarai ni vuku e vaka na vakasaqarai ni iyau vuni.’ Au mani masuta sara na vuku oya. (Vosa Vakaibalebale 2:​1-6) Ena mataka e tarava, era veisiko sara mai na iVakadinadina i Jiova. Au tekivu vulica na iVolatabu kei ira, ia e taura na gauna meu vakatovotovotaka na ka au vulica. Na kena itinitini, au vakadeitaka meu muria tiko ga na sala vakarisito me yacova noqu papitaiso. Nikua, niu salavata kei watiqu, au vukei ira na tani me yaga vei ira na vuku vakalou.”

E kilai levu o Beatriz ena kedra maliwa na tamata kilai mai Caracas, e Venezuela. Ia, e tini veisere qai yalolailai. Ni veilecayaki, e mani masu kina ena vica vata na aua. Ena mataka e tarava, e taqiri sara na lali ena katuba. Ena levu ni nona cudru, e rai sara ena qara lailai ena katuba qai raici rau e rua erau tube kato tu. E vakalecaleca sara me nanumi ga ni sega ni tiko e vale, ia ni bera ni rau biubiu na veiwatini oqo, erau curumaka mai e dua na tikidua ena ruku ni katuba. Na kena ulutaga, “Kila Nomu iVolatabu.” E veisemati beka na nodrau veisiko kei na nona masu ena bogi sa oti? E mani kacivi rau lesu mai. Sega ni dede sa vuli iVolatabu sara qai papitaiso. Dua na ka nona marau, ena gauna oqo sa lai vakavulici ira tale ga na tani o Beatriz mera kunea na sala mera marau kina.

E masulaka o Carmen na nona sasaga me vakaotia na nodratou dravudravua. E dau mateni o Rafael na watina qai tini na luvena. E kaya o Carmen: “Au sava isulu me rawa kina e so na ilavo.” Ia sa qai torosobu ga na ivakarau ni gunu i Rafael. “Ia, sa qai tekivu me veisau mai o watiqu ni keirau vuli iVolatabu kei ira na iVakadinadina i Jiova. Keirau vulica na veika e yalataki ni na vakayacora na Matanitu ni Kalou​—ni na kauta laivi o Jiova e vuravura na dravudravua kei na nuiqawaqawa. Sa qai rogoca na Kalou na noqu masu!” Nona vulici Jiova o Rafael, e vukei koya me biuta rawa kina na gunu qai vakasulumi koya ena “i tovo vou.” (Efeso 4:​24, VV) Eratou vakavinakataka rawa o Rafael kei na nona vuvale na nodratou bula. E kaya o Rafael: “E dina ni keitou sega ni vutuniyau, qai sega tale ga na neitou vale vakataki keitou, ia sa rauti keitou na veika me keitou bula kina, keitou mamarau tale ga.”

Ni sa na Rogoci Kece na Masu

E yaga beka vei ira kece oqo na masu? E vaka dina kina! O raica rawa ena levu na ituvaki oqo ni saumi na nodra masu ni vukei ira e dua mai na ivavakoso vakarisito, mera toro voleka vua na Kalou o Jiova nira vulica na iVolatabu?​—Cakacaka 9:11.

O koya gona, e tiko na vuna vinaka meda masu kina. Sega ni dede oqo, ena saumi na masu me baleta na yaco mai ni Matanitu ni Kalou kei na caka ni lomana e vuravura. (Maciu 6:​10, VV) Ni oti nona vakasavasavataka na vuravura na Kalou mai vei ira era saqati koya, ena qai “roboti ko vuravura e na veikilai kei Jiova.” (Aisea 11:9) O ira kece era lomani Jiova era na marautaka na “nodra galala lagilagi na luve ni Kalou”​—kei na kena saumi dina na nodra masu.​—Roma 8:​18-21, VV.

[iYaloyalo ena tabana e 7]

O kila se cava na vu ni noda masu?