O Cei Era iTalatala ni Kalou Edaidai?

“Sa vu mai vua na Kalou ga na neitou kaukauwa; o koya sa vakarautaki keitou me keitou sai talatala ni veiyalayalati vou.”​—2 KORINICA 3:​5, 6.

1, 2. Na itavi cava era vakaitavi kina na lotu Vakarisito kece ena imatai ni senitiuri, ia na veisau cava e yaco?

DUA na ilesilesi bibi e vakacolati vei ira na lotu Vakarisito kece ena imatai ni senitiuri S.K.​—e nodra itavi mera vunautaka na itukutuku vinaka. Era lumuti kece ena yalo tabu, ra qai italatala ni veiyalayalati vou. E so vei ira e tiko e so tale na nodra itavi me vaka na veivakavulici ena ivavakoso. (1 Korinica 12:​27-​29; Efeso 4:​11) Na nodra itavi na itubutubu ena nodra vuvale e bibi dina. (Kolosa 3:​18-​21) Ia era vakaitavi kece ga ena cakacaka bibi qai vakatotolotaki oqo, na cakacaka vakavunau. E vakatokai na itavi oqo ena vosa taumada vakirisi e volai kina na iVolatabu Vakarisito me di·a·ko·niʹa​—na itavi ni veiqaravi se cakacaka vakaitalatala.​—Kolosa 4:​17.

² Ia e yaco na veisau ena toso ni gauna. E cadra mai e dua na ilawalawa, oqo o ira na italatala era okata na vunau me nodra ilesilesi. (Cakacaka 20:30) Dua ga na iwase lailai o ira na italatala oqo vei ira na kaya nira lotu Vakarisito. Na iwase levu era okati mera lewenilotu. Era sega ni vunau na iwase levu oqo, era dau vakarorogo ga, ra qai tuberi mera kila ni tiko e so na nodra icolacola, e wili kina na soli me baleta na nodra qaravi na italatala.

3, 4. (a) Era dau italatala vakacava e so ena lotu ni Veivanua Vakarisito? (b) O cei na italatala ena lotu ni Veivanua Vakarisito, ia na cava era duatani kina ena tikina oqo o ira na iVakadinadina i Jiova?

³ Era kaya na ilawalawa lailai oya nira italatala (mai na vosa vakalatina, minister, e vakadewataki mai na di·aʹko·nos, “italai”).a E tiko na koronivuli se vuli mera lakova mera vakadonui kina mera italatala. E kaya na International Standard Bible Encyclopedia: “ ‘Na veitabaki’ (ordination) e dusia vakalevu na soli ni itutu lavotaki vei ira na italatala se bete ena kena soqo bibi, qai vakabibitaki kina na lewa e soli vei ira mera vunautaka na Vosa se mera qarava na sakaramede, se mera cakava ruarua.” O cei e tabaki ira na italatala? E kaya na New Encyclopædia Britannica: “Ena veilotu era dei tiko ga ena ituvatuva vakabisopi, o koya e dau veitabaki na bisopi. Ena lotu Wesele, era dau veitabaki na italatala qase.”

⁴ Ena lotu gona ni Veivanua Vakarisito, sa lailai sara kina na itavi e rawa ni qarava na italatala. Ia e sega ni vaka oya vei ira na iVakadinadina i Jiova. Baleta na cava? Ni a sega ni vaka kina ena ivavakoso vakarisito ena imatai ni senitiuri.

O Cei Dina Era iTalatala ni Kalou?

5. O cei soti mera italatala me vaka e tukuna na iVolatabu?

⁵ Na iVolatabu e kaya ni o ira kece na sokaloutaki Jiova​—mai lomalagi kei vuravura​—era italatala kece. O ira na agilosi era talai mera qaravi Jisu. (Maciu 4:​11; 26:53; Luke 22:43) Era talai tale ga yani mera “qaravi ira era na yaco emuri mei taukei ni bula?” (Iperiu 1:​14; Maciu 18:10) O Jisu mada ga na italatala e talai mai. E kaya: “Sa sega ni lako mai na Luve ni tamata me qaravi, ka me dauveiqaravi ga.” (Maciu 20:28; Roma 15:8) Nira uqeti na imuri i Jisu mera “muria na we ni yavana,” e sega kina ni kurabuitaki ni kilikili tale ga mera italatala.​—1 Pita 2:​21.

6. E vakaraitaka vakacava o Jisu ni dodonu mera italatala na nona tisaipeli?

⁶ Ni voleka tiko ga ni lako cake i lomalagi o Jisu, e kaya vei ira na nona tisaipeli: “Dou lako yani ka qisi ira me ra noqu tisaipeli na lewe ni veivanua kece ga, ka papitaisotaki ira e na yaca ni Tamamudou kei na Luvena kei na Yalo Tabu; vakavulici ira me ra muria na veika kece ga au sa vakarota tu vei kemudou.” (Maciu 28:​19, 20, VV) O ira na tisaipeli i Jisu e nodra cakacaka mera vukea tale e so mera tisaipeli​—mera italatala. Mera na vulica na tisaipeli vou mera muria na ka kece ga e vakarota o Jisu, wili kina na ivakaro mera lako yani mera qisia tale e so mera tisaipeli. Se ra tagane se yalewa, qase se gone, era italatala kece na tisaipeli dina i Jisu Karisito.​—Joeli 2:​28, 29.

7, 8. (a) Na tikinivolatabu cava soti e vakaraitaka nira italatala na lotu Vakarisito kece? (b) Na cava soti e tarogi me baleta na veitabaki?

⁷ Me salavata kei na tikina oqo, era duavata kece na tisaipeli i Jisu era tiko ena siga ni Penitiko 33 S.K., na tagane kei na yalewa, mera kacivaka “na nona cakacaka e veivakurabuitaki na Kalou.” (Cakacaka 2:​1-​11) Kena ikuri, e vola na yapositolo o Paula: “Ni sa vakadinata na tamata e na vu ni yalona me sa vakadonui kina, ia na gusuna sa vakatusa kina me bula.” (Roma 10:10) Na vosa oya e sega ni cavuta tiko o Paula vei ira ga e dua na ilawalawa era italatala, ia e cavuta vei ira “kecega sa tiko mai Roma, oi kemudou sa daulomana na Kalou.” (Roma 1:​1, 7) O ira tale ga na ‘tamata lotu mai Efeso kei ira sa yalodina vei Karisito Jisu’ e dodonu mera ‘vakaivavataka na yavadra mera vunautaka kina na itukutuku vinaka ni veivinakati.’ (Efeso 1:1; 6:​15) O ira kece tale ga era rogoca na ivola e volai vei ira na Iperiu e dodonu mera ‘taura matua na vakatusai ni nodra vakabauta mera kakua ni yavala.’​—Iperiu 10:23.

⁸ Ia ena gauna cava ga e qai yaco kina e dua me italatala? Kena ibalebale oya, ni naica beka me tabaki kina? O cei ena veitabaki?

Tabaki me iTalatala​—Ni Naica?

9. A tabaki ni naica o Jisu, o cei e tabaki koya?

⁹ Me macala se me tabaki ni naica e dua, o cei tale ga me veitabaki, de vinaka me raici ga na ivakaraitaki i Jisu Karisito. A sega ni taura o koya e dua na sitivikiti se koroi mai na dua na koronivuli ni italatala me ivakadinadina ni sa italatala, a sega tale ga ni tabaki koya na tamata. Ia na cava ga e tukuni kina ni a italatala o koya? Baleta ni vakayacori vua na parofisai i Aisea: “Sa tu vei au na Yalo i Jiova, Ni sa lumuti au ko koya me’u vunautaka nai tukutuku-vinaka.” (Luke 4:​17-​19; Aisea 61:1) E dusia vakamatata na veivosa oqo ni a lesi o Jisu me vunautaka na itukutuku vinaka. O cei e lesi koya? Ni a lumuti Jisu na yalo tabu i Jiova me vakayacora na cakacaka e lesi vua, e macala e ke ni a tabaki koya na Kalou o Jiova. E yaco ni naica oqo? E sobuti Jisu sara ga na yalo i Jiova ena gauna e papitaiso kina. (Luke 3:​21, 22) O koya gona, e laurai e ke ni a tabaki o koya ena gauna e papitaiso kina.

10. O cei e ‘veivakarautaki’ me rawa ni yaco kina e dua me italatala vakarisito?

¹⁰ Vakaevei ga o ira na imuri i Jisu ena imatai ni senitiuri? Na nodra itutu vakaitalatala e solia tale ga o Jiova. E kaya o Paula: “Sa vu mai vua na Kalou ga na neitou kaukauwa; o koya sa vakarautaki keitou me keitou sai talatala ni veiyalayalati vou.” (2 Korinica 3:​5, 6) E vakarautaka vakacava e dua e sokalou vua o Jiova me rawa ni italatala? Dikeva mada na ivakaraitaki i Timoci, e vakatokai koya o Paula me “[i]talatala ni Kalou, kei na neiraui tokani e nai tukutuku-vinaka kei Karisito.”​—1 Cesalonaika 3:2.

11, 12. E lai toso tu vakacava o Timoci me dua na italatala?

¹¹ Na veivosa oqo e volai vei Timoci e dusia vei keda se yaco vakacava o koya me italatala: “Ia ko iko, mo tu dei e na ka ko a vakatavulici kina, a ka sa vakadinadinataki vei iko, ni ko sa kila se ko cei sa vakatavulici iko; ni ko sa kila nai Volatabu, ni ko a gone [se, “gonedramidrami,” NW], oqori sa vakavukui iko rawa mo bula ni ko sa vakabauti Karisito Jisu.” (2 Timoci 3:​14, 15) E yavutaki na vakabauta i Timoci ena veika e kila mai na iVolatabu, e tosoi koya gona oya me vunau yani ena matanalevu. Ia e sa rauta beka ga na nona dau wili iVolatabu? Sega. E gadrevi na veivuke vei Timoci me rawa ni donu kina na ka e kila mai na veika e wilika, me taura rawa tale ga na kedra ibalebale vakayalo. (Kolosa 1:9) A “vakadinadinataki” gona vei Timoci na ka e wilika. Ni a se kila na iVolatabu ni se “gonedramidrami,” kena ibalebale ga oqo ni o rau na tuberi koya e liu o tinana kei buna. Kena irairai ni a sega ni vakabauta o tamana.​—2 Timoci 1:5.

¹² Ia e so tale na ka e vauci tiko ena nona a yaco o Timoci me italatala. Dua mada oya, ni vakataudeitaki na nona vakabauta ena nona dau veimaliwai kei ira na lotu Vakarisito ena ivavakoso era toka voleka. Eda kila vakacava oqo? Ena imatai ni gauna e sota kina kei Timoci o Paula, e tukuni me baleta na cauravou oqo ni “sa rogo vinaka . . . vei ira na veiwekani mai Lisitira kei Ikoniona.” (Cakacaka 16:2) Kena ikuri, ra dau volavola vei ira na ivavakoso ena gauna oya e so na mataveitacini mera veivakayaloqaqataki. Ra sikovi ira tale ga na ivavakoso na ivakatawa mera vakaukauataki ira na lewena. Na isolisoli vaka oqo e yaga dina ena nodra toso vakayalo na lotu Vakarisito me vakataki Timoci.​—Cakacaka 15:​22-​32; 1 Pita 1:1.

13. Ni naica e tabaki kina o Timoci me italatala, ia na cava o kaya kina ni sega ni yala e kea na nona toso vakayalo?

¹³ Sega ni vakatitiqataki ni a tosoi Timoci na nona vakabauta me vakatotomuri Jisu me qai papitaiso me salavata kei na ivakaro i Jisu e volai tu ena Maciu 28:​19, 20. (Maciu 3:​15-​17; Iperiu 10:​5-9) Na ka oya e vakadinadinataka ni o Timoci e sa yalataki koya mai vu ni lomana vua na Kalou. Ena nona papitaiso gona, sa yaco kina o Timoci me italatala. Me tekivu mai na gauna oya, sa taukeni koya na Kalou, sa taukena na nona bula kece kei na nona kaukaua. Na ka oqo e tiki ni nona sokalou, na nona “veiqaravi tabu.” Ia e sega ni kena ibalebale ni sa na mai cava na toso i Timoci ena gauna ga e sa italatala rawa kina. E sasaga tiko ga me toso vakayalo, e lai dua sara na italatala lotu Vakarisito matua. E yaco ga oqo baleta ni dau veimaliwai o Timoci kei ira na lotu Vakarisito matua me vakataki Paula, nona dau vuli vakataki koya, kei na nona qacoya na cakacaka vakavunau.​—1 Timoci 4:​14; 2 Timoci 2:2; Iperiu 6:1.

14. E toso vakacava nikua e dua e “sa vakarau tu me vinakata na bula tawa mudu” me yaco me italatala?

¹⁴ E tautauvata tale ga nikua na sala e vakadonui kina e dua me vakaitavi ena cakacaka vakaitalatala vakarisito. Mai na nona vakavulici ena iVolatabu, ena vukei kina o koya “sa vakarau tu me vinakata na bula tawa mudu” me kila na Kalou kei na nona inaki. (Cakacaka 13:48) E vulica me dau bulataka na ivakavuvuli ni iVolatabu, me vakainaki tale ga na nona dau masu vua na Kalou. (Same 1:​1-3; Vosa Vakaibalebale 2:​1-9; 1 Cesalonaika 5:​17, 18) E veimaliwai kei ira na nona itokani era vakabauta vata kei koya, qai dau vakayagataka na isolisoli kei na ituvatuva e so e vakarautaka na “dauveiqaravi yalo dina ka vuku.” (Maciu 24:​45-​47, VV; Vosa Vakaibalebale 13:20; Iperiu 10:​23-​25) E vakaikabakaba gona na nona tuberi me toso kina.

15. Na cava e yaco ni sa papitaiso e dua? (Raica tale ga na ivakamacala e ra.)

¹⁵ Ni sa tubu me qaqaco e loma i koya e vulica na iVolatabu na nona lomana na Kalou o Jiova kei na nona vakabauta dei na isoro ni veivoli, ena yaco na gauna me sa nona gagadre me yalataki koya vakatabakidua vua na Tamana vakalomalagi. (Joni 14:1) Na nona yalayala oya e vakaraitaka sara ga o koya ena nona masu, oti, sa qai papitaiso e matanalevu me ivakadinadina ni ka e cakava lo oya. Na nona papitaiso e vaka sara tiko ga na nona soqo ni veitabaki, me vakavotui kina ni sa dua o koya na dauveiqaravi se di·aʹko·nos ni Kalou, sa yalataki koya oti vakatabakidua. Me na qarauna me kua ni vakavuravura tale. (Joni 17:16; Jemesa 4:4) Sa cabori koya oti vakadua “mei madrali bula, me savasava, me vinaka vua na Kalou.” (Roma 12:1)b Sa italatala ni Kalou o koya, e vakatotomuri Karisito.

Na Cava na Cakacaka Vakaitalatala Vakarisito?

16. Na cava e so na itavi vakaitalatala i Timoci?

¹⁶ Na cava soti e okati ena cakacaka vakaitalatala i Timoci? A tiko e so na nona itavi bibi ni rau dau veilakoyaki voli kei Paula. Ni sa lesi o Timoci me qase ni ivavakoso, e cakacaka vagumatua me vakavulici ira na nona itokani lotu Vakarisito, me vakaukauataki ira tale ga. Ia na uto tiko ga ni nona cakacaka vakaitalatala, me vaka vei rau o Jisu kei Paula, na vunautaki ni itukutuku vinaka kei na nodra vukei e so tale mera tisaipeli. (Maciu 4:​23; 1 Korinica 3:5) E kaya vei Timoci o Paula: “Ia ko iko, mo yalomatua e na ka kecega, mo vosota na ka rarawa, mo kitaka na cakacaka ni vakavuvuli, vakayacora sara na ka ko sa lesi kina moi talatala.” (Neitou na matanivola kala.)​—2 Timoci 4:5.

17, 18. (a) Na cakacaka vakaitalatala cava era vakaitavi kina na lotu Vakarisito? (b) E vakacava sara mada na bibi ni cakacaka vakavunau vua na italatala lotu Vakarisito?

¹⁷ Sega ni duidui oqo vei ira na italatala lotu Vakarisito nikua. Era vakaitavi ena cakacaka vakaitalatala e matanalevu, oqo e cakacaka ni veivakalotutaki, mera dusimaki ira na so ina sala me rawati kina na bula, oya ena yavu ni isoro i Jisu ra qai vakavulici ira na yalomalumalumu mera masuta na yaca i Jiova. (Cakacaka 2:​21; 4:​10-​12; Roma 10:13) Era vakayagataka na iVolatabu mera vakadinadinataka kina ni Matanitu duadua ga ni Kalou, na inuinui mera na vakacegui kina na kawatamata era sotava tu oqo na rarawa, ra qai vakaraitaka ni rawa ena gauna sara mada ga oqo me vinaka noda bula ke da muria na ivakavuvuli vakalou. (Same 15:​1-5; Marika 13:10) Ia na italatala lotu Vakarisito e sega ni vunautaka na itukutuku me baleta na vakavinakataki ni bula raraba e vuravura ena gauna sara ga oqo. E vakabibitaka ga ena nona veivakavulici ni “lotu sa yaga e na ka kecega, ni sa yalataki kina na ka ni bula oqo, kei na ka ni bula talega ena muri mai.”​—1 Timoci 4:8.

¹⁸ Sa macala ni na levu tu qai duidui na nodra icolacola na italatala lotu Vakarisito. E levu era vakavuvale. (Efeso 5:21–​6:4) O ira na qase kei na dauveiqaravi vakaitalatala e tu na nodra itavi ena ivavakoso. (1 Timoci 3:​1, 12, 13; Taito 1:5; Iperiu 13:7) Levu na lotu Vakarisito era dau veivuke ena tara ni Kingdom Hall. E so e nodra na itavi totoka mera bolecakacaka ena Peceli ni Watch Tower Society. Ia era vakaitavi ena vunautaki ni itukutuku vinaka na italatala lotu Vakarisito kece. Oqo e nodra itavi kece. Oya gona na cakacaka e kilai votu kina e matanalevu e dua ni italatala dina vakarisito.

Na Rai me Tiko Vua na iTalatala Lotu Vakarisito

19, 20. Na itovo ni rai cava mera teivaka na italatala lotu Vakarisito?

¹⁹ Levu sara na italatala ena lotu ni Veivanua Vakarisito era namaka mera dokai, ra qai kacivi ena yaca ni veidokai me vaka na “italatala qase” kei na “faca (father).” Ia e kila tiko na italatala lotu Vakarisito ni veidokai vaka oya e kilikili me vakaraitaki duadua ga vei Jiova. (1 Timoci 2:​9, 10) Ena sega ni tu ena vakasama ni dua na italatala lotu Vakarisito me vinakata na veivakacerecerei vaka oya, se me vakatokai ena so na yaca dokai vaka oya. (Maciu 23:​8-​12) E kila tiko o koya ni ibalebale levu ga ni vosa na di·a·ko·niʹa na “veiqaravi.” Na vosa e lakolako vata na kena ibalebale e taurivaki ena iVolatabu e dusia na cakacaka ni veiqaravi me vaka na veiqaravi ena valenikana. (Luke 4:​39; 17:8; Joni 2:​5) De na via lagilagi toka na ibalebale ni di·aʹko·nos baleta ni mai semati vata kei na cakacaka vakaitalatala vakarisito, ia o koya e vakatokai kina ena se raici tiko ga me dua e dauveiqaravi.

²⁰ Ena sega kina ni kilikili vua na italatala lotu Vakarisito me nanuma ni rui bibi o koya. Era dauveiqaravi yalomalumalumu na italatala dina vakarisito​—o ira mada ga e bibi na itavi era colata ena ivavakoso. E kaya o Jisu: “Me dauveiqaravi ga vei kemudou ko koya e via yaco me levu vei kemudou: ka me nomudou tamata dauveiqaravi ko koya e vinakata me liu vei kemudou.” (Maciu 20:​26, 27, VV) E vakaraitaka vei iratou na nona tisaipeli o Jisu na itovo ni rai dodonu me tiko vei iratou ena nona savata na yavadratou, oya na itavi i koya na tamata cakacaka lolovira duadua. (Joni 13:​1-​15) Sa ivakarau ni veiqaravi dina e caka ena dela ni yalomalumalumu oqo! O koya gona, era qarava na Kalou o Jiova kei Jisu Karisito na italatala lotu Vakarisito ena dela ni yalomalumalumu. (2 Korinica 6:4; 11:23) Nira veiqaravi, era vakaraitaka nira sega ni via laveti ira cake. Nira vunautaka na itukutuku vinaka, era vakaraitaka na yalo ni veinanumi ena nodra gole yani mera lai qaravi ira na wekadra kece ga era sega ni vakabauta.​—Roma 1:​14, 15; Efeso 3:​1-7.

Vosota Ena Cakacaka Vakaitalatala

21. A vakalougatataki vakacava o Paula ena vuku ni nona vosota ena cakacaka vakaitalatala?

²¹ A vinakati vei Paula na vosota ena nona veiqaravi vakaitalatala. E kaya vei ira mai Kolosa ni levu sara na ka rarawa e sotava me rawa ni vunautaka kina vei ira na itukutuku vinaka. (Kolosa 1:​24, 25) Ia ena vuku ni nona vosota, era tini ciqoma kina e levu na itukutuku vinaka ra qai yaco tale ga mera italatala. Era vakasucumi ena yalo tabu o ira oya mera luve vakayalo ni Kalou, mera taci Jisu Karisito tale ga, me nodra kina na inuinui ni bula vakayalo vata kei koya mai lomalagi. Sa icovi lagilagi dina ni vosota!

22, 23. (a) Na cava e rui bibi kina nikua vei ira na italatala lotu Vakarisito mera dau vosota? (b) Na veika totoka cava e rawati ena vuku ni vosota vakarisito?

²² Na cava mera dau vosota kina o ira nikua era italatala dina ni Kalou. E levu era bula tautauvimate se ra vakila e veisiga na momosi ni yago ni sa siro sobu nodra yabaki ni bula. Era cakacaka vakaukaua na itubutubu​—levu era itubutubu le dua​—mera susuga na luvedra. Ena yaloqaqa, era vorata na gone mai koronivuli na idre cala e so e bololaki ira mai na veiyasana kece. Levu na lotu Vakarisito era bula leqaleqa vakailavo. Levu tale ga era vakacacani se drakidrakita nodra bula baleta “na veigauna dredre” eda bula donuya tu oqo! (2 Timoci 3:1, VV) Io, sa rawa nira duavata kei na yapositolo o Paula na voleka na ono na milioni na italatala iVakadinadina i Jiova nikua, ni a kaya: “E na ka kecega keitou sa vakadinadina ni keitou sai talatala ni Kalou, e na dauvosota sara.” (2 Korinica 6:​4) Era sega ni dau soro na italatala lotu Vakarisito. Era vakavinavinakataki ena vuku ni nodra vosota.

²³ Kena ikuri, me vaka ga e vakila o Paula, e totoka dina na ka e rawati ena vuku ni vosota. Mai na noda vosota, eda maroroya kina na noda veiwekani veivolekati kei Jiova da qai vakamarautaka na lomana. (Vosa Vakaibalebale 27:11) Eda vaqaqacotaka kina na noda vakabauta da qai vukea e so tale mera tisaipeli, mera mai lewena na mataveiwekani vakarisito. (1 Timoci 4:​16) E vakaukauataki ira voli mai na nona italatala o Jiova qai vakalougatataka na nodra cakacaka vakaitalatala. Ra sa tini soqoni kina na kedra ivakaoti na le 144,000, ra qai mai vakanuinuidei tale ga e vica na milioni nira na marautaka na bula tawamudu ena vuravura parataisi. (Luke 23:43; Vakatakila 14:1) Sa dina sara, sa ivakadinadina ga ni nona yalololoma o Jiova na cakacaka vakaitalatala vakarisito. (2 Korinica 4:1) Meda vakamareqeta mada ga na cakacaka oqo o keda kece da qai vakavinavinaka ni veika e rawati kina ena yaga tawamudu.​—1 Joni 2:17.

[iVakamacala e ra]

Vakamacalataka Mada

• Na itavi cava era vakaitavi kina na lotu Vakarisito kece ena imatai ni senitiuri?

• Ni naica e tabaki kina e dua na italatala lotu Vakarisito, o cei e veitabaki?

• Na itovo ni rai cava me teivaka na italatala lotu Vakarisito?

• Na cava me vosovoso kina na italatala lotu Vakarisito ni sotava na ituvaki dredre?

[iYaloyalo ena tabana e 17]

E vulica na Vosa ni Kalou o Timoci ni se gonedramidrami. E qai yaco me italatala ni sa papitaiso

[iYaloyalo ena tabana e 18]

Na papitaiso na ivakadinadina ni nona sa yalataki koya vua na Kalou e dua, e dusia tale ga na nona sa vakadonui me italatala

[iYaloyalo ena tabana e 20]

Era tu vakarau na italatala lotu Vakarisito mera veiqaravi