Na iVolatabu​—Na iVola me Dusimaki Keda ina Bula

“NI SA bula na vosa ni Kalou, ka kaukauwa, ka gata vakalevu ka mucu ga nai seleiwau batirua, . . . a sa vakalewa sara na nanuma kei nai naki ni yaloda.” (Iperiu 4:12) Oqo na veika e rawa ni vakayacora na Vosa ni Kalou, e vakaraitaka gona ni iVolatabu e sega ni ivola vinaka wale ga.

E tukuna sara ga vakadodonu e dua na dauvolavola ni lotu me baleta na iVolatabu: “Na kena itukutuku e bibi dina ina noda bula me vaka ga na noda icegu.” E qai kuria: “Nida vakasamataka na noda gadreva tu, qai vinakati dina na veivakabulai nikua, da qai wilika na iVolatabu ni tiko vei keda na vakasama oya, e veivakurabuitaki na veisau ena kauta mai vei keda.” Me vaka na kena caudre vinaka na cina, e tiko ena iVolatabu na rarama me sauma kina na lomatarotaro e vu mai na sotavi ni so na leqa medremedrea, kei na veika dredre tale e so eda sotava tu nikua.​—Same 119:105.

Io, na vuku e vakamacalataki ena iVolatabu e tiko kina na kaukaua me moica na noda vakasama, me vukei keda meda walia noda leqa, meda vakavinakataka na ivakarau ni noda bula, qai solia vei keda na kila meda vosota rawa kina na ituvaki e sega ni rawa nida veisautaka. Na kena e bibi duadua, ni rawa ni vukei keda na iVolatabu meda kila na Kalou da qai lomani koya.

iVola e Rawa ni Solia na Bula e Vakainaki

O koya e vakavuna na volai ni iVolatabu, o Jiova na Kalou, e ‘kila deivaki na noda ivalavala kece ga.’ E kila vinaka cake na yagoda, na lomada, kei na veika eda gadreva vakayalo. (Same 139:​1-3) Ena nona nanumi keda, e tuvanaka tale ga kina vakamatata na ivakatagedegede meda muria. (Maika 6:8) E ka vakayalomatua meda kila na ivakatagedegede oya kei na nona veidusimaki da qai saga meda bulataka sara. E kalougata na tamata e “marau tiko e na vunau i Jiova,” e kaya na daunisame. “Na ka kecega sa cakava ko koya ena yaco.” (Same 1:​1-3) Ke rawa ni na yaco dina oqo vei keda, e dodonu meda dikeva sara vagumatua.

O Maurice, e dua na qasenivuli vakacegu, e vakabauta ni tu ena iVolatabu na itukutuku makawa yaga, qai ivola ni wilivola vinaka tale ga. Ia, e vakatitiqataka ni vu vakalou na iVolatabu. Ni oti nona rogoca e dua na ivakamacala ena vuna e solia kina na Kalou na nona Vosa vua na kawatamata, e vakadikeva sara o Maurice e vica na parofisai ena iVolatabu. Ni se cauravou a vulica na itukutuku makawa ni bula, na ivola tabaki makawa, na saenisi, kei na ituvaki ni vanua kei na veika bula e wavoliti keda. E kaya ni dua na ka na levu ni ivakaraitaki e tokona na dina ni iVolatabu, ia e sega ni vakadinata rawa ga ni a sa rui vakabekabea na vuku lailai a sa toka vua. “Au mani lai tacori tu ena vakasaqarai ni vakacegu, na vutuniyau, kei na ka ni marau. Ia, e ka ni rarawa ga niu sega ni lai kila wale kina, au qai lecava na kena vinaka kei na kena dina na ivola uasivi duadua se qai bau volai.”

Sa yabaki 70 oqo o Maurice, ni vakaibalebaletaka tiko na nona rairai o Jisu vei Tomasi, e kaya ena vakavinavinaka: “E vaka sara ga niu sa qai tara na we ni ivako, sa mai oti vakadua na noqu vakatitiqa, au sa qai kila oqo ni dina ga na iVolatabu.” (Joni 20:​24-29) E dina kina na ka e kaya na yapositolo o Paula, ni vakavotuya na iVolatabu na gagadre ni lomada, qai vakavuna me vakaibalebale cake na noda bula. E ivola dina me dusimaki keda ina bula.

Rawa ni Veivakadeitaki ke Sotavi na Bula Veilecayaki

Na iVolatabu e tu tale ga kina na ivakasala me vukei ira e levu mera biuta tani na ivalavala e sega ni vinaka. E biuta rawa na vakatavako o Taniela, sa sega tale ga ni lakova na soqo ni marau vakalialia, sa muduka tale ga na gunu vakasivia. (Roma 13:13; 2 Korinica 7:1; Kalatia 5:​19-21) Na kena dina, ni ka ni sasaga toka me qai cavuivuvutaki na ivalavala vaka oqo kei na kena tokari na “i tovo vou.” (Efeso 4:​22-24, VV) “E ka ni bolebole,” e kaya o Taniela, “baleta nida tamata ivalavala ca.” Ia, e qai biuta rawa. Nikua sa dau wilika e veisiga na Vosa ni Kalou o Taniela, qai vakavolekataki koya tale ga vei Jiova.

Ni tubu cake tiko, e dau doka vakalevu na iVolatabu o Taniela​—e dina ni sega ni dau wilika​—e dau masu tale ga vua na Kalou ena veibogi. Ia, e vaka me yali tiko vua e dua na ka. E sega ni kunea na marau. E qai yaco na veisau ina nona bula ni raica ena imatai ni gauna na yaca ni Kalou ena iVolatabu. (Lako Yani 6:3; Same 83:18) Sa tekivu sara me dau vakayagataka na yaca i Jiova ni masu, e vakaibalebale cake kina na nona masu. “Yaco me voleka sara ga vei au o Jiova, me yacova mai nikua e se noqu itokani voleka duadua tiko ga.”

Ni se bera ni vulica na iVolatabu, e sega ni dua na ka vinaka e nuitaka tu o Taniela me na yaco ena gauna mai muri. “Na tamata mada ga e sega ni vuku ena kila ni sa naulu sobu tiko na vuravura,” e kaya. “Dua na ka noqu rere, e lai levu wale kina na ka au vakacakava meu vakaogai au tu kina me vakaseavutaka na noqu rere.” Ia e qai vulica ni na kauta mai na Kalou na lewadodonu vei ira na tamata kece ena vuravura vakasavasavataki, era na rekitaka kina na tamata talairawarawa na vakacegu kei na marau me tawamudu. (Same 37:​10, 11; Taniela 2:44; Vakatakila 21:​3, 4) Nikua sa tiko na inuinui i Taniela. Na veivakadeitaki oqo ni iVolatabu e vukei koya me raica tiko ga kina vakadodonu na bula.

iVukevuke me Wali Kina na Leqa ni Vakasama

E yabaki vitu o George ni mate o tinana. E dau leqataka me lai moce ena bogi, de na sega ni yadra rawa tale ena mataka e tarava. E qai wilika na ka e kaya o Jisu me baleta na mate kei na veivakaturi: “Ni sa lako mai na gauna era na rogoca kina na domona ko ira kecega e nai bulubulu, a ra na lako maikina.” E lauti koya dina na vosa i Jisu: “Oi au na vu ni tu-cake-tale, kei na vu-ni-bula: ko koya sa vakabauti au, kevaka sa mate, ena bula ga.” (Joni 5:​28, 29; 11:25) Au sega ni vakamelea rawa na vakasama oqo, e sega tale ga ni dredre na noqu vakabauta, e veivakacegui tale ga. “Na ka dina oqo,” e kaya o George, “e sega wale ga ni vakayacoka ina vakasama, ia e tara sara ga na lomada.”

E dau tu tale ga vei Taniela, o koya e vakamacalataki mai liu na rere. A sega tale ga ni susugi koya rawa o tinana, sa mani lai biu tu kina ena levu na itikotiko ni gone luveniyali. E vaka me vulagi tu ga o koya qai gadreva na veitaqomaki me lai lewe ni dua na vuvale e dau veilomani. E qai yaco dina na ka e vakasaqara tiko ni vuli iVolatabu. E mai lewe ni isoqosoqo vakarisito ni iVakadinadina i Jiova me mai tiki ni vuvale vakayalo, e vakila ni ciqomi qai lomani kina mai vei ira. O koya gona, e yaga dina na iVolatabu, qai veivakacegui tale ga.

Nanuma, ni o Jiova e raica na veika e tiko e lomada qai kila na ka eda vakasaqara. Na Kalou e “vakadikeva . . . na yalo ni tamata,” qai solia “ki na tamata yadua me vaka na nonai valavala.”​—Vosa Vakaibalebale 21:2; Jeremaia 17:10.

iVakasala Yaga Ena Bula Vakavuvale

Na iVolatabu e tu tale ga kina na ivakasala yaga me baleta na noda veimaliwai kei ira na tani. E kaya o George: “Na veicoqacoqa ni rai kei na duidui ni vakasama, e rua vei ira na ituvaki e dau vakadredretaka dina na bula.” E walia vakacava? “Kevaka au kila ni sega ni vinaka na noqu veimaliwai kei na dua, au vakayagataka sara na ivakasala sega ni wereubiubi ena Maciu 5:​23, 24: ‘Mo drau veivinakati mada eliu kei na wekamu.’ Na noqu veivosakitaka na leqa e vakayacoka vakalevu. Au rawa ni vakila na vakacegu ni Kalou e kaya na iVolatabu. E cakayaco na ivakasala vakaivolatabu. E yaga vakalevu dina.”​—Filipai 4:​6, 7.

Ni rau sega ni duavata na veiwatini, e dodonu vei rau me rau ‘kusarawa yadua me rau vakarorogo, me rau berabera ga ni vosa, me rau berabera ni cudru.’ (Jemesa 1:19) Na ivakasala vaka oqo e vakavinakataka na veivosaki. E kuria o George: “E totolo na kena vakayacoka niu muria na ivakasala meu lomani watiqu me vaka na noqu lomani au. E rawarawa kina vei watiqu me dokai au.” (Efeso 5:​28-33) Io, e vakavulici keda na iVolatabu ena sala meda kila da qai walia kina na noda dui leqa, kei na sala meda veimaliwai vinaka kina kei ira na tani.

iVakasala e Yaga Tawamudu

E kaya na tui vuku o Solomoni: “Mo vakararavi vei Jiova e na vu ni yalomu: ka mo kakua ni vakararavi ki na nomu yalomatua: mo vakarogotaka vua na nomu sala kecega, ia ena vakadodonutaka na nomui lakolako ko koya.” (Vosa Vakaibalebale 3:​5, 6) E sega ni dredre, ia e titobu na veivosa oqo!

Na iVolatabu e rawa ni vakavinakataka na noda bula. E rawa kina vei ira era lomana na Kalou mera veisautaka nodra bula me salasalavata kei na lomana, mera kunea tale ga kina na marau ena nodra “muria na vunau i Jiova.” (Same 119:1) Se ituvaki cava ga eda sotakaya, e tu ena iVolatabu na idusidusi kei na ivakasala me vukei keda. (Aisea 48:​17, 18) Wilika e veisiga, vakananuma na ka o wilika, qai bulataka sara. Ena vakamakaretaka nomu vakasama, ena rawa ni coba dei tale ga kina ena veika savasava kei na veika vinaka. (Filipai 4:​8, 9) O na sega wale ga ni vulica na sala mo bula kina kei na sala mo marautaka kina na nomu bula, ia o na vulica tale ga mo lomana na Dauveibuli.

Ni o cakava oqo, ena yaco kina na iVolatabu​—me vaka vei ira e vica vata na milioni​—me sega ni ivola vinaka wale ga vei iko. Ena yaco dina me ivola me dusimaki keda ina bula!

[iYaloyalo ena tabana e 6]

Na iVolatabu e rawa ni vakaukauataka na nona vakatulewa e dua me levea na ivakarau ca

[iYaloyalo ena tabana e 7]

E vakavulici iko na iVolatabu ena sala mo toro voleka kina vua na Kalou