Taro na Dauwiliwili

Ena rawa ni yaco e vei na nona saqata e dua na yalewa lotu Vakarisito tawacala na nona via sereki koya o watina?

Ni qai tauyavutaka na Kalou na vakawati, a vakaroti tagane me “kabita” na watina. (Vakatekivu 2:​18-​24) Sa qai ivalavala ca na kawatamata, e mani sotavi kina e levu sara na leqa ni vakawati, ia a inaki ni Kalou me rau duavata tiko ga na veiwatini. E vola na yapositolo o Paula: “Ia au sa vakarota vei ira na vakawati, e sega ni noqu i vakaro, sa nona i vakaro na Turaga: Me kakua ni biuta na watina [se, “me kua ni lai vakawati tale,” NW] na yalewa sa vakawati, ia vua [ga] na watina, ka me kakua sara ni sereka na watina na tagane vakawati.”​​—1 Korinica 7:​10, 11, VV.

E vakaraitaka na veivosa oqori, me vaka ni sa qai mai ivalavala ca na tamata, ni rawa ni yaco ina dua vei rau na vakawati me biuti watina. Kena ivakaraitaki, ni kaya o Paula me baleti rau ruarua, ni kevaka e sa via biubiu e dua, “me kua [ga] ni lai vakawati tale.” Na cava na vuna? E sa biubiu e dua vei rau, ia erau se wili me rau duabau tiko ga ena mata ni Kalou. E qai kaya rawa oqo o Paula ni a sa vakadeitaka oti tu o Jisu na ivakatagedegede me muri ena vakawati ni lotu Vakarisito: “O koya sa veisere kei na watina, kevaka e sega ni vuna na dautagane [vakirisi, por·neiʹa], ka la’ki veiwatini kei na dua tale, sa dauyalewa.” (Maciu 19:​9, VV) Na yavu duadua ga vakaivolatabu e rawa ni tini kina ena veisere e dua na vakawati na “dautagane,” oya na veiyacovi vakasisila. E kena irairai ena ivakaraitaki e vakayagataka o Paula ni a sega ni cakava na ivalavala vakasisila e dua vei rau na veiwatini. O koya gona, ke sa na biubiu o tagane se o yalewa, e se sega ni tini na nodrau vakawati ena mata ni Kalou.

E vakamacalataka o Paula na ituvaki ni dua na lotu Vakarisito dina e tawavakabauta o na watina. Vakasamataka mada na veidusimaki i Paula: “Kevaka sa via veibiu ko koya ka tawa lotu, laiva ga me lako, sa na sega ni vauci kina na tagane se na yalewa lotu kevaka e vaka ko ya. Ni sa kacivi kemuni na Kalou mo ni tiko vakacegu ga.” (1 Korinica 7:​12-​16, VV) Na cava e rawa ni cakava e dua na yalewa vakawati tawacala ke sa biuti koya na watina tawavakabauta, de mani vinakata sara me rau sa sere vakalawa?

De na rairai gadreva o yalewa me rau tiko vata ga kei watina. De se lomani koya tiko ga, e vakila tale ga ni na vinakati me rau veitokoni, kei na nodrau dui gadreva me rau dau veiyacovi. E kila tale ga ni gadreva na veika vakailavo me ratou bula tiko kina vakaveitinani. De na tiko tale ga na nona vakanuinui ni na yaco na gauna me na qai vakabauta kina o tagane, me na vakabulai tale ga. Ia, ke sa cakacakataka o tagane me rau sa sere ga (ena dua na yavu e sega ni vakaivolatabu), me “laiva ga me lako,” me vaka e kaya o Paula. Me muri tale ga oqo ke dua na tagane e tiko ena vakabauta e vakanadakuya na rai vakalou e vauca na vakawati, qai vinakata me sa lako.

Ke sotavi oqori, de na via taqomaki iratou vakaveitinani o yalewa. Me baleta na cava? Ena nona gadreva me kua ni ratou kaliraki mai vua o iratou na luvena lomani me rawa ni vakaraitaka tiko ga vei iratou na nona loloma kei na veikauaitaki vakatina, me vakavulici iratou vakadodonu, me vakabibitaka vei iratou na vakabauta e yavutaki ena ivakavuvuli totoka ena iVolatabu. (2 Timoci 3:​15) E rawa ni tinimaka na nona dodonu kece oqo na veisere. O koya gona, ena vinaka ke saga me veilewaitaki vakavinaka na nona kisi e matadra na iliuliu me taqomaka na nona dodonu ni maroroi iratou tiko ga na luvena kei na nona via vakadeitaka me cola na nona icolacola o watina, e dina ni sa drotaki iratou. Ena so na vanua, ena rawa vei yalewa e saqata tiko na veisere me sainitaka na kena vakaivolataki vakalawa na nodratou qarauni na luvedrau wili kina na veika vakailavo baleti iratou vakaveitinani, e dina ni sega ni vakadonuya na sasaga nei watina me rau sere. Ena so tale na vanua, sa vakamatatataki tu ena ka e volai ni sa duavata o yalewa me rau sa sere kei watina; ia, ke a cala ena veibutakoci o tagane, e qai sainitaka o yalewa na veika vakaivola oqo, e kena ibalebale ni sa sega ni vinakati tagane tale.

E levu ena ivavakoso kei ira e taudaku era na sega ni kila na matailalai ni veika e tara na nodrau bula vakaveiwatini. Me kena ivakaraitaki, e yavutaki li vakaivolatabu na veisere se sega? Ni se bera na lomatarotaro vaka oya, ena vinaka vei yalewa me tukuna vua na ivakatawa daulewa vata kei na dua tale na qase ni nodratou ivavakoso (ke rawa me vola mai) na matata ni ka e yaco. Ke mani vaka kina, e sa na matata tu na kena itukutuku, de na mani dua na kena taro lesu​​—ena gauna oya se ena dua na gauna e muri.

Meda lesuva tale mada na vosa i Jisu: “O koya sa veisere kei na watina, kevaka e sega ni vuna na dautagane, ka la’ki veiwatini kei na dua tale, sa dauyalewa.” Kevaka a cala dina o tagane ena veibutakoci, ia e sega ni via sereki watina, me na vakadeitaka o yalewa (o koya e kaya o Jisu ni tawacala) se me vosoti tagane me tomani tiko ga kina na nodrau veimoceri vakaveiwatini, se sa besetaki koya sara ga vakadua. Kevaka e vakadeitaka ni sa vosoti watina rau qai veiyacovi tale, e sega ni ivalavala ca kina o yalewa.​​—Osea 1:​1-3; 3:​1-3.

Kevaka e sasagataka na nodrau sere o tagane ivalavala vakasisila, de na via vosoti koya tiko ga o watina ena nona nuitaka ni na rawai koya lesu tale. Me na vakatulewataka ga o yalewa, me yavutaki ena nona lewaeloma kei na ituvaki e sotava ke via saqata na sasaga nei watina me rau sere. Ena so na vanua, ena rawa vei yalewa e saqata tiko na sere me sainitaka na veika vakaivola e tuvanaki tu kina vakamatata se o cei ena qarauni iratou na gone kei na saumi ni veika vakailavo me baleti iratou vakaveitinani, ia e sega ga ni vakadonuya kina o yalewa na sere. Na nona sainitaka na ivola oqo e sega ni lai tukuni kina ni sa besetaki tagane. Ena so tale na vanua, ena rairai gadrevi vei yalewa e saqata tiko na veisere me sainitaka na ivola e vakamacalataki tu kina ni sa duavata o koya me rau sa sere kei watina; ni sa sainitaka oqori o yalewa, e sa vakaraitaka kina vakamatata ni sa sega tale ni qai vinakati watina ivalavala vakasisila.

Ena vinaka, me kua ni vakatitiqataki kina e dua na ka, me solia o yalewa ena gauna vata ga oya vei rau na mata ni ivavakoso, e dua na ivola e tuvai tu kina na veika sa caka kei na vuna era vakayacori kina. E rawa ni vola kina na nona sa tukuna vei watina na nona gagadre ni sa vosoti koya kei na nona vinakata me rau veiwatini tiko ga. E kena ibalebale oqo ni sega ni nona inaki me yaco na veisere; e sega ni besetaki watina, e sa na tu vakarau ga me vosoti koya. Ni sa vakamatatataka vaka oya na nona sa tu vakarau me veivosoti me rau veiwatini tiko ga, na nona sa sainitaka na ivola me vakamatatataki kina na veika vakailavo e baleti iratou vakaveitinani kei na nodratou qarauni na gone, e sega ni kena ibalebale ni sa besetaki watina.a

Ni vakaraitaka na nona sa tu vakarau me veivosoti ke sa mani yaco ga na veisere, e sa na sega ni vagalalataki rau vakaveiwatini me rau dui vakawati tale. Ia, ke sega ni ciqoma o tagane na veivosoti i yalewa tawacala, me qai vakatulewataka e muri o yalewa tawacala ni sa besetaki tagane ena vuku ni nona ivalavala vakasisila, erau sa na qai galala ruarua kina me rau dui vakawati tale. E vakaraitaka o Jisu na dodonu e tu vua o koya e tawacala me tauca na vakatulewa oqori.​​—Maciu 5:​32; 19:9; Luke 16:⁠18.

[iVakamacala e ra]