iWali ni Yalolailai
● E kudruvaka o Esafa: “E dina sa sega ni yaga ni’u sa vuya na lomaqu, ka vuluvulu e nai valavala savasava. Ni’u sa yaviti tiko e na siga ka bogi, ka cudruvi e na mataka kecega.”—Same 73:13, 14.
● E osivaka o Peruki: “Ulei koi au oqo! ni sa vakaikuritaka na noqu rarawa e na yaluma ko Jiova; au sa oca e na noqu vutugu, ia ka’u sa sega ni kunea na vakacegu.”—Jeremaia 45:3.
● E yasovaka o Neomai: “Sa cakacaka vakararawa vei au ko Koya na kaukauwa: au a sinai tu ni’u a lako yani; ia ka’u sa lala tu ni sa vakalesui au mai ko Jiova: a cava dou sa vakatokai au kina ko Neomai, ni sa beitaki au oti ko Jiova, a sa vakararawataki au oti ko Koya na kaukauwa?”—Ruci 1:20, 21.
E TU ena iVolatabu e vuqa na ivakaraitaki ni kena bikai ira na dauveiqaravi yalodina i Jiova na yalolailai ena so na gauna. Nida tamata ivalavala ca, sa macala tu ga nida na dau yalolailai ena so na gauna. So era dau yalolailai, baleta beka nira beci ira, so tale era yalolailai ena levu ni ka rarawa era sotava.
Ke sega nida tauri keda vinaka, ena rawa ni vakaleqa na yalo oqo na noda veiwekani kei ira na tani kei na noda veiwekani kei na Kalou o Jiova. E kaya e dua na marama lotu Vakarisito e dau beci koya: “Au vakadaroya e levu sara na veisureti ina soqo ni veivakalasai, baleta niu nanuma ni sega ni ganiti au meu veimaliwai kei ira na lewe ni ivavakoso.” Na yalo oqo ena rawa ni vakaleqa sara ga na nona bula e dua! Mo valuta gona vakacava?
Toro Voleka Vei Jiova
Ena Same 73, e vola vakadodonu o Esafa na yamekemeke ni yalona. E vuvutaka na nodra vutuniyau na tamata ca ni raica na lailai ni ka e taukena. E raica nira dau dokadoka ra qai voravora, ia e sega ga ni tau vei ira na kedra itotogi. Sa tekivu me vakatitiqataka o Esafa ni yaga na nona bulataka na ivalavala dodonu.—Same 73:3-9, 13, 14.
O raica beka na nodra rawaka na tamata ca, ra qai sega ni vunitaka na ka ca era cakava, me vaka ga a raica o Esafa? E rawa vakacava vei Esafa me valuta nona yalolailai? E kuria o Esafa: “Ni’u a nanuma me’u kila na ka oqo, sa ka dredre sara vei au; ia ni ka’u a qai lako ki na vale tabu ni Kalou; ka’u a qai kila rawa na kedrai vakataotioti.” (Same 73:16, 17) A masuti Jiova o Esafa, ena nona vakararavi vua. Ni taurivaki e ke na vosa a qai vakayagataka na yapositolo o Paula, e tabaka sobu o Esafa na “tamata . . . vakayago,” qai vakayadrata nona gadreva na ka “vakayalo.” Ni sa makare tale nona rai vakayalo, e qai raica rawa ni o Jiova e cata na ca, ena totogitaki ira tale ga na tamata ca ena kena gauna dodonu.—1 Korinica 2:14, 15.
E ka bibi dina mo vakalaiva na iVolatabu me vukei iko me vakamakaretaka nomu rai me rawa ni o raica na ituvaki dina ni bula! E vakadreti keda o Jiova ni kila vinaka tu na ka era vakayacora tiko na tamata ca. Ni vakavuvulitaka na iVolatabu: “Mo dou kakua ni vakaisini kemudou; a Kalou ena sega ni vakalialiai; na ka kecega sa kaburaka na tamata ena tamusuka talega ko ya . . . Ia me da kakua ni ceguoca e na caka vinaka.” (Kalatia 6:7-9) O Jiova ena biuti ira na tamata ca ena “sala titidara”; ena laiva mera ‘vakarusai.’ (Same 73:18) Ena yaco ga na lewadodonu i Jiova.
Na kana wasoma ena teveli vakayalo i Jiova kei na veimaliwai vinaka kei ira na tamata ni Kalou ena vakaukauataka nomu vakabauta, o na valuta rawa tale ga kina na yalolailai. (Iperiu 10:25) Ke o kabita tiko ga na Kalou me vakataki Esafa, ena rawa ni vukei iko o koya. E tomana nona vosa o Esafa: “Ia ka’u sa tiko ga kei kemuni e na veisiga: o ni sa taura tiko na ligaqu i matau. O ni na tuberi au e na nomuni lewa, ka kauti au emuri ki na vanua vakaiukuuku.” (Same 73:23, 24) Dua na lotu Vakarisito e dau tulivaki ni se gone e vakadinadinataka na dina ni veivosa oqori. E kaya: “Na noqu veimaliwai voleka kei ira ena ivavakoso e veisautaka sara ga na noqu rai. Au raica rawa nira dau loloma dina na qase lotu Vakarisito, era sega ni ovisa, era ivakatawa.” E nodra itavi bibi na qase lotu Vakarisito dau loloma oqo mera vakaseavutaka na mavoa ni yalo.—Aisea 32:1, 2; 1 Cesalonaika 2:7, 8.
Ciqoma na iVakasala i Jiova
E vakanuiqawaqawataki Peruki, na vunivola i Jeremaia na parofita, na nona vakasamataka vakabibi na nona ilesilesi. Ia e vakaraitaka ena yalovinaka o Jiova vei Peruki na vu dina ni nona nuiqawaqawa. “Ia ko iko ko sa dauqara beka eso na ka levu me nomu? mo kakua ni dauqara: raica, au na vakayacora na ca vei ira na tamata kecega, sa kaya ko Jiova: ia ka’u na solia vei iko na nomu bula me nomui toki ni valu e na veiyasana kecega ko sa lako voli kina.”—Jeremaia 45:2-5.
E tukuna vakadodonu o Jiova vei Peruki na vu ni nona yamekemeke, e baleta ni sa rui levu na ka e domona. Sa sega ni marautaka o Peruki na nona itavi e solia vua na Kalou, e baleta ni sa vaqara tale tiko e levu na ka me nona. Rairai o na raica ni na vinaka tale ga mo vakayacora oqori mo valuta kina na yalolailai, qai vaqara na maravu ni vakasama e vu mai ena vakacegu ni Kalou.—Filipai 4:6, 7.
E sega ni bikabika tiko e Moapi na yada o Neomai ni rarawataka nodratou takali o watina kei rau na luvena tagane. E a lomabibi vakalailai ni vakasamataki koya kei rau na vugona yalewa. E kaya o Neomai ena nona tukuna me rau lesu: “Ni’u sa rarawa vakalevu e na vukumudrau, ni sa bikai au na liga i Jiova.” E vakarota ni sa tadu i Peceliema: “Dou kakua ni vakatokai au ko Neomai [Marau], dou vakatokai au ga ko Mara [Rarawa]: ni sa cakacaka vakararawa vei au ko Koya na kaukauwa.”—Ruci 1:13, 20.
Ia e sega ga ni vakayawaki koya o Neomai mai vei Jiova kei ira na nona tamata. Ena nona tiko e Moapi e rogoca sara “ni sa talevi ira na nona tamata ko Jiova, ka solia vei ira na kakana.” (Ruci 1:6) E kila o koya ni vinaka me tiko vata ga kei ira na tamata i Jiova. Ni rau lesu tale i Juta o Neomai kei na vugona o Ruci, e qai vakavulici Ruci o Neomai ena sala matau ena ka me vakayacora vua na turaga ni mataqali, o koya ena qai voli Ruci.
O ira tale ga na yalodina edaidai e sa takali na kedra isa, era dau vakaogai ira ena cakacaka ni ivavakoso, era valuta rawa kina na momosi ni yalo. Era vakataki Neomai ena nodra ogaoga ena ka vakayalo, era wilika na iVolatabu e veisiga.
Na Yaga ni Bulataki ni Vuku Vakalou
Na itukutuku vakaivolatabu oqo eda raica kina na sala era valuta kina e so na yalolailai. E lai qara veivuke o Esafa ena vale tabu i Jiova, qai waraki Jiova toka ena vosota. E ciqoma o Peruki nona vakadodonutaki, mani sega ni rawai koya na domodomoiyau. E ogaoga tiko ga o Neomai kei ira na tamata i Jiova, qai vakarautaki Ruci na marama gone me colata na ilesilesi dokai ena vakayagataki kina o koya, e vauca na nona sokaloutaki na Kalou dina.—1 Korinica 4:7; Kalatia 5:26; 6:4.
E rawa ni o valuta na yalolailai e dau tarai iko ke o vakananuma na nona vukei ira na nona tamata o Jiova mera qaqa, na nodra qaqa yadudua vaka tale ga kina vakailawalawa. Mo vakananuma gona na loloma cecekia i Jiova ena nona vakarautaka na kemu ivoli. Mo taleitaka na veilomani dina e kunei ena mataveitacini vakarisito. Mo vakanamata ina bula ena vuravura vou ni Kalou sa tu oqo e liu. Mo duavata mada ga kei na ka e tukuna o Esafa: “Ia koi au, e yaga vei au me’u toro vua na Kalou: au sa vakararavi oti vua na Turaga ko Jiova, me’u tukuna kina na nomuni cakacaka kecega.”—Same 73:28.