Mo Vukea Vakacava na Gone “Cidroi”?

“Me da reki . . . sa yali, ka sa qai kune tale.”​—LUKE 15:32.

1, 2. (a) Era vakatulewataka vakacava e so na gone na nodra qaravi Jiova? (b) E vakacava na lomadra na itubutubu kei na gone era sotava na ituvaki vaka oya?

“AU SA sega ni via qaravi Jiova!” Rau na kurabui dina na itubutubu erau saga vakaukaua tiko me rau tuberi luvedrau ena bula vakarisito ke tauca na vosa oya na luvedrau! E so na itabagone era “lako sese” galugalu ga. (Iperiu 2:1, VV) E levu era vakataki gone cidroi ena vosa vakatautauvata i Jisu, e biuta na vale i tamana qai lai vakamaumautaka na nona ivotavota ena dua na vanua yawa.—Luke 15:11-16.

² Levu na iVakadinadina i Jiova era sega ni vakila na leqa oqo, ia vei ira na sotava, e bau dredre toka na nodra vakacegui. E sega ni tukuni rawa tale ga na rarawa ena sotava na gone e lakosese. Ena vakaleqai koya voli na nona lewaeloma. Ena vosa vakatautauvata i Jisu, e marau o tamana ni “vakilai yalona tale” na gone cidroi. E rawa vakacava vei ira na itubutubu kei na lewe ni ivavakoso mera vukei ira na gone cidroi mera ‘kilai yalodra tale’?​—Luke 15:17, VV.

Vu ni Nodra Biubiu e So

3. Na cava e vakavuna nodra biuta na ivavakoso vakarisito e so na gone?

³ E vica vata na drau na udolu na gone era marautaka na nodra qaravi Jiova tiko ena ivavakoso vakarisito. Ia, na cava e vakavuna na nodra biubiu e so? Era nanuma nira sega ni marautaka tiko e so na ka e yaco tu e vuravura. (2 Timoci 4:10) Se era nanuma beka ni sa rui sivia tale na veitaqomaki ena bainisipi i Jiova. E rawa ni vakavuna tale ga na nodra lako tani mai na qelenisipi i Jiova na gone na ca ni nodra lewaeloma, nodra via vakaitau, se via veimaliwai kei ira na nodra icaba. E rawa tale ga ni bese ni qarava na Kalou na gone ke raica ni rau sega ni bulataka na nona itubutubu, se so tale na lotu Vakarisito, na ka era dau veivunauci kina.

4. Na cava e vu dina ni nodra lakosese na gone?

⁴ E dau ivakatakilakila ni nona malumalumu vakayalo na gone na nona talaidredre, ni vakatakila oya na ka e tu e lomana. (Vosa Vakaibalebale 15:13; Maciu 12:34) Se mani cava e vakavuna nona lakosese na gone, e vu dina ni leqa na nona sega ni kila vinaka “na ka dina.” (2 Timoci 3:7) E bibi gona vei ira na gone mera vaqaqacotaka na nodra veiwekani kei Jiova, mera kua ni cakava tu ga me rawa na nodra sokalou. Na cava ena vukei ira mera cakava oqo?

Toro Volekata na Kalou

5. Na cava mera cakava na gone me rawa kina nira veiwekani voleka kei na Kalou?

⁵ “Toro voleka yani vua na Kalou,” e vola na tisaipeli o Jemesa, “ka na toro voleka mai vei kemudou ko koya.” (Jemesa 4:8) Me qai rawa oqo, ena vinakati me vukei na gone me taleitaka na Vosa ni Kalou. (Same 34:8) Me vagunuvi mada e liu ena “wai-ni-sucu” ​—na yavu ni ivakavuvuli ena iVolatabu. Ni sa taleitaka na Vosa ni Kalou, ni vakila na ikanakana ni “kakana dina” se na veika e titobu vakayalo, ena sega ni bera na nona matua vakayalo. (Iperiu 5:11-14; Same 1:2) E tusanaka e dua na itabagone ni a bula tu ena ivakarau ni bula vakavuravura, ia e qai veisau me taleitaka na veika vakayalo. Na cava e vukei koya me veisau? Ni vakaturi me wilika na iVolatabu taucoko, e cakava vaka kina. Io, e bibi dina na wili iVolatabu wasoma ke da vinakata meda veiwekani voleka kei Jiova.

6, 7. Mera vukei luvedra vakacava na itubutubu mera taleitaka na Vosa ni Kalou?

⁶ E bibi gona mera vukei luvedra na itubutubu mera taleitaka na Vosa ni Kalou. E dua na goneyalewa itabagone e veimaliwai voli ga kei ira na gone ca, dina ga ni ratou vuli wasoma tiko vakavuvale. E kaya me baleta na nodratou vuli vakavuvale: “Ni taro o tamaqu, au dau wilika ga na kena isau, au sega ni bau raici tamaqu.” Era na sega ni saga ga me vakaoti na iwase ni ivola me vulici na itubutubu lomavuku, era na veivakavulici ga. (2 Timoci 4:2) Ena taleitaka na vuli na gone ke vakila ni yaga vua. Taroga na taro e vakavure vakasama me rawa kina ni vakamacalataka na gone na ka e nanuma. Vukei luvemu me vakayagataka na veika e vulici tiko.a

⁷ Me bulabula tale ga na kena veivosakitaki na iVolatabu. Ke veiganiti, e rawa nira dramataka na gone e so na ka e tukuni ena iVolatabu. Vukei ira mera raitayaloyalotaka na vanua e tiko kina kei na ituvaki ni vanua e vulici tiko. Vakayagataka na mape me vukei iko. Io, ke vakasamataki vinaka, e rawa ni bulabula qai duidui na icakacaka ni vuli vakavuvale. Mera vakasamataka tale ga na itubutubu na nodra veiwekani kei Jiova. Ke ra veivolekati kei Jiova, era na veivolekati tale ga kei Jiova na luvedra.​—Vakarua 6:5-7.

8. E veivuke vakacava na masu ena noda veiwekani voleka kei na Kalou?

⁸ E vukei keda tale ga na masu meda veivolekati kei na Kalou. A lomalomarua voli e dua na goneyalewa se me muria na ivakarau ni bula vakarisito, se me veimaliwai kei ira na nona icaba era sega ni vakabauta vata. (Jemesa 4:4) Na cava e qai cakava? E kaya: “Sa qai vakadua meu vakaraitaka vei Jiova na lomaqu.” E kaya ni vakila ni sa rogoci nona masu baleta ni qai kunea ena loma ni ivavakoso vakarisito e dua nona itokani e nuitaka. Ni vakila ni dusimaki koya tiko o Jiova, sa qai vakaukauataka na nona veiwekani kei na Kalou. E rawa tale ga nira vukei luvedra na itubutubu nira toroya cake na ivakatagedegede ni nodra masu. Nira masu vakavuvale e rawa nira masulaka na itubutubu na veika kece erau lomaleqataka voli mera vakila kina na gone ni rau veiwekani voleka sara na nodrau itubutubu kei Jiova.

Mo Vosota, ia Mo Tudei

9, 10. Na ivakaraitaki cava e kotora o Jiova ni vosoti ira vakadede na Isireli vukitani?

⁹ E vakilai nona via lakosese e dua na itabagone ni dau vinakata me tu duadua qai sega ni via rogoca na nodrau saga na nona itubutubu me rau vakamacalataka vua na veika vakayalo. Na cava me rau cakava na itubutubu ke yaco na leqa oqo? Vakasamataka na ka e cakava o Jiova vei Isireli makawa. E vosoti ira voli na Isireli “domoqa” oya me sivia e 900 na yabaki ni bera ni qai biuti ira vakadua. (Lako Yani 34:9; 2 Veigauna 36:17-21; Roma 10:21) Era “vakatovolei koya” wasoma, ia e “yalololoma” ga vei ira o Jiova. E “vakalesuya tani vakavuqa na nona cudru, ka sega ni uqeta na nona cudru me waqawaqa sara.” (Same 78:38-42) E sega ni vakamelei rawa na veika e cakava o Jiova vei ira. Era na vakatotomuri Jiova na itubutubu nira vosoti luvedra era sega ni ciqoma vakatotolo na nodra veivuke.

¹⁰ Na vosota vakadede e sega ni kena ibalebale ga na “vosota vakabalavu”; e kena ibalebale tale ga na noda nuitaka ni na vinaka cake e dua na veimaliwai ca e tiko. E ivakaraitaki ni vosota vakadede o Jiova. E ‘talai ira tiko ga’ na nona italatala vei ira na Isireli. E “yalololoma ko koya vei ira na nona tamata” dina ga nira “vakalialiai ira nai talatala ni Kalou, ka beca na nona vosa.” (2 Veigauna 36:15, 16) E vakamasuti ira na Isireli mera “lesu yadua . . . mai na nonai tovo ca.” (Jeremaia 25:4, 5) Ia, e sega ni saqata tale o Jiova na nona ivakavuvuli savasava. E vakaroti ira ga na Isireli mera “lesu” tale vua na Kalou mera muria na nona sala.

11. E rawa vakacava mera vosota vakadede ra qai dei tiko ga na itubutubu nira vukei luvedra e biuta na dina?

¹¹ Mera vakatotomuri Jiova tale ga na itubutubu ena vosota vakadede nira sega ni soro koso ena nodra nuitaka ni na veisau na luvedra e biuta na dina. Mera vakanuinui tiko ena nodra dau veivosaki tiko ga kei luvedra se saga mera veivosaki tale. Nira dei tiko ga ena ivakavuvuli dodonu, e rawa mera sagai luvedra ‘tiko ga’ mera suka mai ina dina.

Ni Vakasivoi na Gone

12. Na cava e nodrau itavi na itubutubu vua na gone sa vakasivoi mai na ivavakoso, ia e se tiko vata kei rau?

¹² Vakacava ke vakasivoi mai na ivavakoso na gone e cakava na ivalavala ca bibi qai sega ni veivutunitaka, ia e se tiko ga kei rau nona itubutubu? Ni se tiko ga kei rau na itubutubu, e nodrau itavi me rau vakavulica ka vakadodonutaki koya ena Vosa ni Kalou. Rau na cakava vakacava?​—Vosa Vakaibalebale 6:20-22; 29:17.

13. E rawa vakacava me rau kila na itubutubu na ka e tu e loma i luvedrau e cala?

¹³ De vinaka cake me rau qai vakavulica se vakadodonutaki koya ni rau vuli iVolatabu ga kei koya. Me rau kua ni vakasamataka tiko ga na itubutubu na nona yalokaukaua, ia me rau tovolea ni kila na ka e tu e lomana. Na cava e vu ni nona tauvimate vakayalo? (Vosa Vakaibalebale 20:5) E rawa beka ni rau kila na ka e tiko dina sara e lomana? Na tikinivolatabu cava e rawa ni yaga vua? E tukuna vei keda na yapositolo o Paula: “Sa bula na vosa ni Kalou, ka kaukauwa, ka gata vakalevu ka mucu ga nai seleiwau batirua, ka suaka me wasea rua kina na lomada kei na yaloda, kei na nodai sema kei na uto ni sui, a sa vakalewa sara na nanuma kei nai naki ni yaloda.” (Iperiu 4:12) Io, mera kua ni tukuna wale tiko ga na itubutubu vei luvedra mera kua ni valavala ca tale. Mera vukei ira ga mera veisau.

14. Na cava na imatai ni kalawa me taura na gone e valavala ca me vinaka tale kina nona veiwekani kei Jiova, rau na vukei koya vakacava na nona itubutubu?

¹⁴ E vinakati vua na gone e cala me rau veiwekani tale kei Jiova. Na imatai ni kalawa oya me “veivutuni ka saumaki mai.” (Cakacaka 3:19; Aisea 55:6, 7) Me rau vukea na itabagone e valavala ca e tiko e vale me veivutuni, e vinakati vei rau na itubutubu me rau ‘dau vosota, me rau veivakavulici ena yalomalumalumu.’ (2 Timoci 2:24-26) Ena vinakati me rau “vunauca” vakaivolatabu. Na vosa vakirisi ni “vunauca” e rawa ni vakadewataki tale ga me “vakatakila” se vakadinadinataka vinaka. (Vakatakila 3:19; Joni 16:8) E dodonu gona me vakadinadinataki vua na gone na cala ni ka e cakava tiko. Ena sega toka ni rawarawa na kena tukuni. Ia, ke rawa, me rau saga na itubutubu me raica rawa o gone na ka erau tukuna tiko vua ni rau vakayagataka na veisala kece e vakatara na iVolatabu me rau vukei koya kina. Me rau vukei koya me “cata na ka ca, ka vinakata na ka vinaka.” (Emosi 5:15) De rawa ni “bula tale mai nai cori ni tevoro.”

15. E yaga vakacava na masu ena nona veiwekani vinaka tale kei Jiova e dua e valavala ca?

¹⁵ E dodonu meda dau masu nida vinakata meda veiwekani tale kei Jiova. E macala ni sega ni rawa meda ‘masulaka’ na ivalavala ca bibi e cakava tiko qai sega ni veivutunitaka e dua a se lewena tu na ivavakoso vakarisito. (1 Joni 5:16, 17; Jeremaia 7:16-20; Iperiu 10:26, 27) Ia, e rawa mera kerea vei Jiova na vuku na itubutubu me vukei ira. (Jemesa 1:5) Ke vakadinadinataki ni sa veivutuni na itabagone e vakasivoi, ia e sega ni ‘doudou me vosa vua na Kalou,’ e rawa ni rau masuta na itubutubu ni kevaka e raica na Kalou ni sa veivutuni, ia me qai vakatau ga vua nona vosoti luvedrau. (1 Joni 3:21) Ni rogoca na masu oya na itabagone, ena raici Jiova me Kalou dauvosovoso.b—Lako Yani 34:6, 7; Jemesa 5:16.

16. Eda rawa ni vukei iratou vakacava na vuvale i gone e vakasivoi?

¹⁶ Ke vakasivoi e dua na itabagone sa papitaiso, era na sega “ni i lala vata kaya” na lewe ni ivavakoso. (1 Korinica 5:11, VV; 2 Joni 10, 11) Oqo e rawa ni vukei koya me ‘vakilai yalona tale’ qai suka mai ina qelenisipi e taqomaka tiko na Kalou. (Luke 15:17) Se e suka mai se sega, e rawa ga vei ira na lewe ni ivavakoso mera vakayaloqaqataki iratou na vuvale i koya na itabagone e vakasivoi. Meda vakaraitaka vei iratou nida “veinanumi” da qai “yalo vinaka.”​—1 Pita 3:8, 9, VV.

Mera Veivuke Vakacava e So?

17. Na cava mera nanuma na lewe ni ivavakoso nira via vukea na gone e lakosese?

¹⁷ Vakacava na itabagone e sega ni vakasivoi mai na ivavakoso vakarisito, ia e malumalumu ga nona vakabauta? “Kevaka sa rarawa e dua na tikina,” e vola na yapositolo o Paula, “sa rarawa vata na tikina kecega.” (1 Korinica 12:26) E dodonu meda kauaitaka na gone oqori. Ia meda qaqarauni, baleta e rawa vei ira na gone era tauvimate vakayalo mera vakaleqai ira e so tale na gone. (Kalatia 5:7-9) Era saga e so na uabula ena dua na ivavakoso mera vukei ira na gone era malumalumu vakayalo. Era sureti na gone oqo ina dua na soqo mera mai vakatagitaka kina na serenicumu. Dina nira marautaka na soqo, ia na nodra veimaliwai oya e qai vakavuna tale mera biuta na ivavakoso. (1 Korinica 15:33; Juta 22, 23) Ena sega ni vukea na gone e tauvimate vakayalo na soqo e sega ni veivosakitaki kina na veika vakayalo, ena yaga ga vua na veimaliwai e vukei koya me taleitaka na veika vakayalo.c

18. Eda na vakatotomuria vakacava na tama i gone cidroi ena vosa vakatautauvata i Jisu?

¹⁸ Ke lesu mai ina Kingdom Hall se dua na soqo ni tabacakacaka se tikina e dua na itabagone sa biuta tu na ivavakoso, meda vakasamataka na itovo ni nona rai. Eda na sega beka ni vakaraitaka na mataqali veiciqomi e vakaraitaka na tama i gone cidroi ena vosa vakatautauvata i Jisu? (Luke 15:18-20, 25-32) E kaya e dua na itabagone sa biuta na ivavakoso vakarisito, ia a qai lako ina dua na soqo ni tikina: “Au nanuma ga niu na sega ni kauaitaki, ia era kidavaki au na mataveitacini. E tarai au dina na ka oya.” E tomana tale nona vulica na iVolatabu me yacova ni papitaiso.

Kua ni Soro

19, 20. Na cava meda nuitaka tiko ga kina nira na suka mai na luveda cidroi?

¹⁹ E ka ni bolebole vei ira na itubutubu vaka kina vei keda na nona vukei na gone “cidroi” me ‘vakilai yalona tale.’ Ia meda kua ni soro. “Sa sega ni berabera na Turaga ni vakayacora na nona vosa ni yalayala, me vaka era sa nanuma na tamata eso sa berabera: sa vosoti keda ga vakadede, ni sa sega ni vinakata me rusa e dua, me yacova ga na veivutuni ko ira kecega na tamata.” (2 Pita 3:9) E vakadeitaka vei keda na iVolatabu ni vinakata o Jiova meda veivutuni me rawa kina nida vakabulai. E vakavuna sara ga o koya na noda veivinakati rawa tale kei koya. (2 Korinica 5:18, 19) Nona vosovoso e rawa kina vei ira na vica vata na milioni na tamata mera kilai yalodra mai.​—Aisea 2:2, 3.

²⁰ E sega li ni dodonu mera cakava na itubutubu na veika kece e vakatara vei ira na iVolatabu nira vukei luvedra cidroi mera kilai yalodra? Ni o vakatotomuri Jiova, mo vosovoso ena nomu vukei luvemu me lesu mai vei Jiova. Mo muria dei tiko na ivakavuvuli vakaivolatabu ni o tovolea mo vakaitovotaki iko ena itovo i Jiova na loloma, lewadodonu, kei na vuku, qai masuti koya me vukei iko. Me vaka ga nodra ciqoma na veisureti i Jiova mera suka mai vua na tamata talaidredre, e rawa tale ga ni suka mai ina qelenisipi e taqomaka na Kalou na luvemu tagane se luvemu yalewa cidroi.—Luke 15:6, 7.

[iVakamacala e ra]

O se Nanuma Tiko?

• Na cava e vu dina ni leqa ke biuta na ivavakoso e dua na itabagone?

• Mera vukei vakacava na gone mera veiwekani voleka kei Jiova?

• Na cava mera vosovoso kina ra qai dei tiko ga na itubutubu nira vukei luvedra cidroi?

• Mera veivukei vakacava na lewe ni ivavakoso ena nona suka mai na itabagone cidroi?

[iYaloyalo ena tabana e 15]

Nira masu mai vu ni lomadra na itubutubu, era na vakila na gone nira veivolekati dina na nodra itubutubu kei Jiova

[iYaloyalo ena tabana e 15]

Meda dau wilika na Vosa ni Kalou meda veivolekati kina kei Jiova

[iYaloyalo ena tabana e 17]

Kidavaka na gone cidroi ni sa ‘kilai yalona mai’

[iYaloyalo ena tabana e 18]

Saga vakaukaua me suka mai vei Jiova o luvemu