Rawati Vakacava na Vuravura e Kunei Kina na Marau?

“NA TAMATA kilai levu duadua​—⁠sega wale ga ena ruanaudolu na yabaki sa oti ia ena itukutuku ni veigauna​—⁠o Jisu na kai Nasareci,” e kaya na ivola na Time. Ni se bula e vuravura o Jisu, e vica vata na udolu na tamata lomadina era sega wale ga ni vakila nona cecere, ia nona kauaitaki ira tale ga na tani. E sega kina ni kurabuitaki nira a via buli koya me tui. (Joni 6:10, 14, 15) Ia, me vaka sa tukuni ena ulutaga sa oti, a sega ni via vakaitavi ena politiki o Jisu.

E TOLU na ka e yavutaka kina nona vakatulewa o Jisu: na rai nei Tamana ena sasaga ni tamata, okati kina na veiliutaki; nona kila o Jisu ni tiko na igu kaukaua tawarairai e vakaseva tiko na sasaga ni veiliutaki vinaka duadua ni tamata; kei na inaki ni Kalou me tauyavutaka na matanitu vakalomalagi me liutaka na vuravura taucoko. Nida dikeva vakavoleka na tolu na tikina oqo, eda na raica na vuna e sega ni veisautaka rawa kina na tamata na vuravura oqo me vinaka. Eda na raica tale ga se na rawati vakacava.

Rawa ni Liutaki Koya ga na Kawatamata?

Ni bulia na tamata na Kalou, e solia vua me lewa na manumanu kece. (Vakatekivu 1:26) Ia na kawatamata me tiko ga ena ruku ni nona lewa cecere na Kalou. Me rau vakaraitaka nodrau talairawarawa vua na Kalou na imatai ni tagane kei na yalewa me rau kua ni kania na vua ni dua na mataqali kau, “na kau sa kilai kina na ka vinaka kei na ka ca.” (Vakatekivu 2:17) Ka ni rarawa, ni rau vakayagataka vakatani nodrau galala ni vakatulewa o Atama kei Ivi, rau talaidredre kina vua na Kalou. E sega wale ga ni rau butako ni rau kania na vuanikau vakatabui. E vakaraitaka tale ga nodrau saqata na dodonu ni veiliutaki cecere ni Kalou. Na ivakamacala e ra ni Vakatekivu 2:17 ena New Jerusalem Bible e kaya ni o Atama kei Ivi erau “via liutaki rau ga, erau via vakalecalecava ni rau a buli . . . Na imatai ni cala na saqati ni veiliutaki cecere ni Kalou.”

Ni vakalailaini ena vakatulewa oya e so na ka bibi, e vakatarai Atama kei Ivi kina na Kalou kei na nodrau kawa mera lewa ga na sala mera muria, ra mani bulia nodra ivakatagedegede ni ka e vinaka kei na ka e ca. (Same 147:19, 20; Roma 2:14) E tekivu sara ga e kea nona via liutaki koya ga na tamata. A toso vinaka? Ni laurai na ka era yaco ena vica vata na udolu na yabaki sa oti, eda rawa ni kaya ni sega! Na Dauvunau 8:9 e kaya: “Sa lewa kina na tamata vua na tamata tani ka sa mani ca kina.” Na itukutuku rarawataki oqo ni via veiliutaki e vakadeitaka na dina ni Jeremaia 10:23: “Kemuni Jiova, au sa kila, ni sa sega ni vu mai vua na tamata na nona sala: sa sega ni vu mai vua na tamata sa lako tu me lewa na nonai lakolako.” Na itukutuku ni veigauna e vakadeitaka ni kawatamata e sega vua na kaukaua me veiliutaki vinaka ke sega kina na Dauveibuli.

E duavata kina o Jisu. E cata o koya ni sega ni muri na veiliutaki ni Kalou. “Ni’u sa sega talega ni kitaka e dua na ka vakai au,” e kaya. “Ni’u sa kitaka tikoga na ka sa vinakata ko koya [na Kalou].” (Joni 4:34; 8:28, 29) Ni sega ni vakadonuya na Kalou me veiliutaki ena veidigitaki ni tamata, e sega kina ni ciqoma o Jisu. E sega ni kena ibalebale oqo ni sega ni via vukei ira na tamata. A saga vakaukaua me vukei ira mera mamarau ena gauna oya vaka kina ena gauna mai muri. E solia mada ga nona bula ena vuku ni kawatamata. (Maciu 5:3-11; 7:24-27; Joni 3:16) Ia e kila o Jisu ni “sa dui vagauna na ka kecega,” wili kina nona gauna na Kalou me liutaka na kawatamata. (Dauvunau 3:1; Maciu 24:14, 21, 22, 36-39) Nanuma lesu ni rau vakarorogo na noda itubutubu taumada mai Iteni vua na kabula ca vakayalo e lai nona waqawaqa mai na gata. E kauti keda oqo ina ikarua ni vuna e sega ni vakaitavi kina ena politiki o Jisu.

iLiuliu Vuni ni Vuravura

E kaya na iVolatabu ni dulaka o Setani vei Jisu “na matanitu kecega e vuravura, kei na kedrai ukuuku” ke sokalou vua. (Maciu 4:8-10) E soli vei Jisu me liutaka na vuravura—⁠ia ena veivakadonui ni Tevoro. E sega ni rawai o Jisu ena veivakatovolei oya. Ia, vakacava a veivakatovolei dina o Setani? E rawa ni dulaka tu na ka levu vaka oya? Io, o Jisu mada ga e vakatoka na Tevoro me “turaga ni vuravura,” kei na yapositolo o Paula e tukuni koya me “kalou ni vuravura oqo.”​—Joni 14:30; 2 Korinica 4:4; Efeso 6:12.

Io, e kila o Jisu ni sega ni kauaitaka dina na kawatamata na Tevoro. E vakatokai Setani me “daulaba,” me “tama ni lasulasu kei na lasu kece ga.” (Joni 8:44, The Amplified Bible) Ena sega kina ni marautaki na bula ena vuravura e “tu . . . e na kaukauwa” ni kabula vakayalo ca vaka oya. (1 Joni 5:19, VV) Ia ena sega ni tiko ga vua na Tevoro na lewa oqo. Nikua sa kabula vakayalo cecere tu o Jisu, sa na vakarau vaqeavutaki Setani qai vakaotia vakadua nona ilawaki.​—Iperiu 2:14; Vakatakila 20:1-3.

E kila o Setani ni sa voleka sara ni mai cava nona liutaka tiko na vuravura. E soli isele kina me bacana na kawatamata me vakaleqai keda vakadua, me vaka a cakava ena Waluvu ni siga i Noa. (Vakatekivu 6:1-5; Juta 6) Na Vakatakila 12:12 (VV) e kaya: “Drau sa kalouca ko i kemudrau vuravura kei wasawasa; ni sa lako sobu yani vei kemudrau na Tevoro e na cudru levu, ni sa kila ni sa lekaleka sara na nona gauna!” Na parofisai ena iVolatabu kei na ka sa yaco tiko e vuravura e vakaraitaka nida sa volekata na icavacava ni ‘gauna lekaleka’ oya. (2 Timoci 3:1-5) Sa voleka sara na vakacegu.

Matanitu Ena Kauta Mai na Marau

Na ikatolu ni vuna e vakatikitiki mai kina ena politiki o Jisu ni kila ni dua na gauna lokuci mai muri, ena tauyavutaka na Kalou na Matanitu vakalomalagi me liutaka na vuravura. Na iVolatabu e vakatoka na matanitu oqo me Matanitu ni Kalou, e usutu sara ga ni veivakavulici i Jisu. (Luke 4:43; Vakatakila 11:15) E vakavulici ira nona tisaipeli o Jisu mera masulaka me yaco mai na Matanitu oya, ni na vakayacori na ‘loma ni Kalou e vuravura me vaka e caka tiko mai lomalagi’ ena ruku ni kena veiliutaki. (Maciu 6:9, 10) O na rairai veinanuyaka, ‘Ke liutaka na vuravura taucoko na Matanitu oqo, na cava ena yaco ina matanitu vakatamata?’

Na kena isau e kunei ena Taniela 2:44: “E na nodra gauna na tui ko ya [era veiliutaki tiko nikua] ena qai vakatura na Kalou ni lomalagi e dua na matanitu, ena sega sara ni vakarusai rawa: ia na matanitu ko ya ena sega ni biu tu me nodra na tamata tani, ia ena vurumemeataka ga ka vakaotia na veimatanitu [vakatamata] oqori, ka na tu ga ka sega ni mudu.” Na cava na vuna ena “vurumemeataka” kina na Matanitu ni Kalou na veiliutaki e vuravura? Baleta ni se tiko ga vei ira na yalo se bucina o Setani mai na were o Iteni, oya me kua ni liutaki ira na Kalou. Me ikuri ni ka era cakava e sega ni vinaka ina kawatamata, o ira era tomana tiko na yalo vaka oqo era sa veisaqasaqa sara tiko ga kei na Dauveibuli. (Same 2:6-12; Vakatakila 16:14, 16) Koya gona, meda tarogi keda, ‘Eda tokona se saqata tiko na veiliutaki ni Kalou?’

Na Veiliutaki i Cei O na Digitaka?

Me vukei ira na tamata mera digitaka vakadodonu se veiliutaki i cei era tokona, e lesi ira kina nona tisaipeli o Jisu mera vunautaka na “i Tukutuku Vinaka ni matanitu ki na vuravura taucoko, me i vakadinadina ki na veivanua kece ga” ni bera na icavacava ni veika ni gauna oqo. (Maciu 24:14, VV) O cei nikua era kilai e vuravura taucoko nira vunautaka tiko na Matanitu ni Kalou? O ira ga na iVakadinadina i Jiova. Sa dede sara na kena volai tiko ena taqana e liu ni ivoladraudrau oqo na vosa “Kacivaka na Matanitu i Jiova.” Nikua, sa ra veivuke tiko e rauta ni ononamilioni na iVakadinadina ena sivia na 230 na vanua mera kila na tamata na Matanitu oqori.a

Veivakalougatataki Vei Ira na Vakarurugi Ena Matanitu ni Kalou

E dau cakava o Jisu na ka kece ena sala vakalou. E sega ni dre ga nona mua se tovolea me tokona se vakavinakataka na ivakarau ni bula nikua ena veika vakapolitiki, ia e cakacaka vakaukaua me vakarabailevutaka na veika ni Matanitu ni Kalou, na iwali duadua ga ni leqa e vuravura. Ena nona yalodina e vakaicovitaki me dabe ena idabedabe cecere mai lomalagi me Tui ni Matanitu oya. Sa dua na icovi totoka ni talairawarawa vua na Kalou!​—Taniela 7:13, 14.

Era vica na milioni nikua era sa vakatotomuri Jisu tiko nira vakaliuca na Matanitu ni Kalou ra qai muria na lomana, era marautaka tale ga na isolisoli totoka—⁠mera vakarurugi e vuravura ena ruku ni veiliutaki ni Matanitu ni Kalou. (Maciu 6:33) Ena kena veiliutaki, era na laveti mera kawatamata uasivi, mera bula tawamudu. (Vakatakila 21:3, 4) E kaya na 1 Joni 2:17: “Ko vuravura sa lako tani yani, kei na kena gagadre talega; ia ko koya sa cakava na ka sa vinakata na Kalou, sa tu dei ga ka sega ni mudu.” Ni sa na muduki o Setani kei ira nona ito qai veisautaki na vuravura me parataisi e sega kina na veisei vakamatatamata, veidabui ni veika vakabisinisi, kei na lotu lasu, sa na dua na ka rekitaki meda bula tu ga e ke me tawamudu!​—Same 37:29; 72:16.

Io, na Matanitu ni Kalou ena rawati duadua ga kina na vuravura e kune kina na marau, kei na itukutuku e vakamacalataka e itukutuku vinaka dina. Vakacava mo vakarorogo mada ina itukutuku vinaka oqo nira lako yani ena nomu vale ena dua tale na gauna na iVakadinadina i Jiova?

[iVakamacala e ra]

[iYaloyalo ena tabana e 5]

Na itukutuku ni veigauna e vakadeitaka ni sega ni rawa ni vinaka na veiliutaki ni tamata ke sega kina na Kalou

[iYaloyalo ena tabana e 5]

Ni liutaka tiko o Setani na “vuravura oqo,” e rawa kina vua me solia vei Jisu “na matanitu kecega e vuravura”

[iYaloyalo ena tabana e 7]

E vakavulica o Jisu ni na dua na itikotiko vinaka na vuravura ena ruku ni veiliutaki ni Matanitu ni Kalou