Taro na Dauwiliwili

E rawa vakacava vua e dua na marama vakawati lotu Vakarisito me yalodina vua na Kalou, qai vakamalumalumutaki koya vei watina tawavakabauta e dau vakaitavi ena veiolodei vakalotu?

Ena gadrevi vua na vuku kei na yaloqaseqase. Ke veiraurautaka na nona itavi ruarua oya e sa cakava tiko kina na ka e dodonu. A veivakasalataki o Jisu ena dua na ituvaki vata vaka oya: “Mo dou qai solia vei Sisa na ka nei Sisa; vei koya talega na Kalou na ka sa nona na Kalou.” (Maciu 22:21) E dina ni tukuna tiko o koya na veika e vauca na itavi ina matanitu, ia ra qai vakasalataki kina e muri na lotu Vakarisito mera talairawarawa kina. (Roma 13:1) Ia, na nona ivakasala e tautauvata sara ga kei na marama vakawati e veiraurautaka na nona itavi me talairawarawa kina vei Jiova, qai vakamalumalumutaki koya vua na watina e tawavakabauta.

Na tamata e kila na iVolatabu ena sega ni vakalasuya ni nona itavi na lotu Vakarisito me vakaliuca na Kalou Cecere, qai yalodina vua ena veigauna. (Cakacaka 5:29) Ia ena vuqa na ituvaki, na dausokalou dina ena rawa ni rogoca na veika e tukuna vua e dua na iliuliu tawavakabauta ka na sega ga ni lai voroka kina na lawa i Jiova.

Eda na dikeva e dua na ivakaraitaki vinaka vei iratou na lewe 3 na Iperiu, me vaka e tukuni ena Taniela wase e 3. A vakarota na nodra iliuliu vakamatanitu o Nepukanesa, mera vakasoqoni kece yani ena buca o Tura. E rawa sara ga me ratou a cata na lako ni ratou kila deivaki tu ni na vakayacori kina na sokalou lasu. E rawarawa cake vei Taniela me a kua ni tiko kina, ia vei iratou na lewe tolu e sega ni rawa ni ratou levea.a Ena nodratou talairawarawa eratou a lako, ia eratou sega ga ni lai vakaitavi kina.​—Taniela 3:1-18.

E tautauvata sara ga oqo ena so na siga ni olodei, nira dau kerea na tagane tawavakabauta vei watidra lotu Vakarisito mera cakava e so na ka era na via levea. Me kena ivakaraitaki: Ena rairai tukuna o tagane vei watina me vakasaqara e dua na mataqali kakana me marautaki kina na siga ni olodei oya. Se me ratou lako vakavuvale (oka kina o watina) me ratou lai sikovi ira na weka i tagane mera lai kanavata, se gade ga kina. Ena gauna e lai volivoli kina o yalewa ni bera na siga ni olodei, ena kerei koya beka o watina me volia mai vua e so na kakana, iloloma, na kena i olo kei na card me baleta na olodei oya.

Na marama lotu Vakarisito ena raica me kua ni vakaitavi ena sokalou lasu, ia vakacava ga na veika e kerei vua? E ulunivuvale o tagane, e kaya na Vosa ni Kalou: “Oi kemudou na yalewa vakawati, mo dou talairawarawa vei ira na watimudou, me vaka sa dodonu vua na Turaga.” (Kolosa 3:18) Ena ituvaki vaka oqo e rawa beka vua me vakaraitaka na yalomalumalumu vei watina kei na nona yalodina tiko ga vua na Kalou? E dodonu me veiraurautaka vinaka na nona talairawarawa vei watina salavata kei na nona yalodina vei Jiova.

Ena so tale na gauna ena kerei koya o watina me vakasaqara e dua na mataqali kakana e dau taleitaka se dau matau vua me kania ena gauna ni olodei oya. Ena via vakaraitaka o yalewa na nona loloma, qai rokova na nona veiliutaki. Ena cakava beka kevaka e kerei me vakasaqa ena siga ni olodei? Ena sega ni vakacaraka nodra lewaeloma e so na marama lotu Vakarisito na nodra kitaka oqori, ni sa nodra itavi ga mera dau vakasaqa. E sega ni vakabibitaka e dua na lotu Vakarisito yalodina na vakasaqa oya ina dua na olodei, dina ga ni oqori beka na rai nei watina tagane. E vaka tale ga kina na nona kerei koya o watina me rau dau salavata ni sikovi ira na wekana ena so na gauna ena loma ni yabaki. E rawa beka ni cakava oqori ena siga sara ga ni olodei? Se, ena volia ga na veika e tukuni vua, ia ena sega ga ni via vakalewa na ka ena cakava kina o watina tagane?

Na marama lotu Vakarisito ena dau nanumi ira na tani​—na kena vakayacoka vei ira (Filipai 2:4). Ena sega ni cakava na ka ena nanumi kina ni a vakaitavi ena olodei, me vakataki iratou ga na tolu na Iperiu ena nodratou sega ni vinakata mera raica kece na tamata nodratou lako ina buca o Tura. O koya gona ena saga ena nona vinaka taucoko me vakamacalataka vei watina na nona gagadre, me sa na cakava duadua ga o watina tagane na veika e vauca na olodei, me vakaceguya kina na gagadre nei watina yalewa e dau lomani koya ka dokai koya tale ga. Ena raica rawa o tagane ni oqo e rai vakayalomatua ni rau na sega kina ni madua ke mani cata o watina na vakaitavi ena cakacaka ni lotu lasu. Io, ni liu taumada na veivosaki malumu ena tini vinaka.​—Vosa Vakaibalebale 22:3.

Me kena ilutua, na marama lotu Vakarisito ena vakasama mada e liu qai tarava na nona vakatulewataka na veika me cakava. Ena liu taumada na nona talairawarawa vei Jiova, me vakataki iratou ga na lewe tolu na Iperiu. (1 Korinica 10:31) Ni tiko ga ena vakasama oya, ena vakatulewataka vinaka na lotu Vakarisito yadudua na veika ena rawa ni cakava ke kerei koya o nona iliuliu mai vale se ena itikotiko.

[iVakamacala e ra]